Nobel Prize 2024: વિક્ટર એમ્બ્રોઝ અને ગેરી રુવકોન mRNAની શોધ બદલ નોબેલ પુરસ્કારથી સન્માનિત
સ્ટોકહોમ : વર્ષ 2024 માટે નોબેલ પુરસ્કારોની(Nobel Prize 2024)જાહેરાત સોમવારથી શરૂ થઈ ગઈ છે. આ અંતર્ગત ફિઝિયોલોજી અથવા મેડિસિન ક્ષેત્ર માટે આ સન્માનના વિજેતાઓના નામની જાહેરાત કરવામાં આવી હતી. આ વર્ષે અમેરિકાના વિક્ટર એમ્બ્રોઝ અને ગેરી રુવકોનને મેડિસિનનું નોબેલ પુરસ્કાર એનાયત કરવામાં આવ્યો છે. આ બંનેને માઇક્રો આરએનએ(mRNA)ની શોધ માટે આ સન્માન આપવામાં આવ્યું છે. આ વર્ષનો પુરસ્કાર 1901 થી ફિઝિયોલોજી અથવા મેડિસિન ક્ષેત્રે આપવામાં આવતો 115મો નોબેલ પુરસ્કાર છે. ભૌતિકશાસ્ત્રમાં 2024 નોબેલ પુરસ્કાર મંગળવારે જાહેર કરવામાં આવશે. ત્યારબાદ રસાયણશાસ્ત્ર પુરસ્કાર બુધવારે આપવામાં આવશે.
વર્ષ 2023માં એવોર્ડ મળ્યો હતો
આ પહેલા વર્ષ 2023માં મેડિસિનમાં નોબેલ પુરસ્કાર કેટાલિન કેરીકો અને ડ્રૂ વેઈસમેનને આપવામાં આવ્યો હતો. તેમને ન્યુક્લિયોસાઇડ બેઝ મોડિફિકેશન સંબંધિત તેમની શોધ માટે આ સન્માન આપવામાં આવ્યું હતું. આ શોધે કોરોના વાયરસ એટલે કે કોવિડ-19 સામે અસરકારક mRNA રસી વિકસાવવામાં મદદ કરી.
જેમને 2022માં એવોર્ડ મળ્યો હતો
2022 માં સ્વીડનના સ્વાંતે પાબોને ફિઝિયોલોજી અથવા મેડિસિન ક્ષેત્રે નોબેલ પુરસ્કાર એનાયત કરવામાં આવ્યો હતો. તેમને આ પુરસ્કાર લુપ્ત થઈ ગયેલા હોમિનિન્સ અને માનવ ઉત્ક્રાંતિના જિનેટિક્સ (જીનોમ) સંબંધિત તેમની શોધ માટે આપવામાં આવ્યો હતો.
આ પણ જાણો
નોબેલ પુરસ્કાર વિજેતાને 11 મિલિયન સ્વીડિશ ક્રોના (લગભગ 1 મિલિયન યુએસ ડોલર) આપવામાં આવે છે. આ પુરસ્કાર સ્વીડિશ વૈજ્ઞાનિક આલ્ફ્રેડ નોબેલના નામે આપવામાં આવે છે. 10 ડિસેમ્બરે નોબેલની પુણ્યતિથિએ યોજાયેલા સમારોહમાં પુરસ્કારો પ્રાપ્ત કરવા માટે વિજેતાઓને આમંત્રણ આપવામાં આવ્યું છે.
