૨૦૦૦ કરતાં પણ વધુ શીખો જશે પાકિસ્તાન! તણાવ બાદ પણ કેમ પાકિસ્તાને આપ્યા વિઝા?

નવી દિલ્હી: શીખ ધર્મના સ્થાપક ગુરુ નાનક દેવજીની 556મી જન્મજયંતિ નિમિત્તે યોજાનાર ઉત્સવમાં ભાગ લેવા માટે, આશરે 2,150 ભારતીય સિખો આવતીકાલે વાઘા સરહદ થઈને લાહોર પહોંચે તેવી સંભાવના છે. પાકિસ્તાન સરકારના ‘ઇવક્યુઇ ટ્રસ્ટ પ્રોપર્ટી બોર્ડ’ (ETPB)ના પ્રવક્તા ગુલામ મોહિઉદ્દીને આ અંગેની માહિતી આપી હતી. ગુરુ નાનક દેવજીનું જન્મસ્થળ લાહોરથી લગભગ 80 કિલોમીટર દૂર આવેલા ગુરુદ્વારા જન્મસ્થાન નનકાના સાહિબ ખાતે 5 નવેમ્બરના રોજ મુખ્ય સમારોહ યોજાશે.

અધિકારીઓએ જણાવ્યું કે પાકિસ્તાન સરકારે ભારતીય સિખોને ગુરુ નાનક દેવજીની જયંતિના ઉત્સવમાં ભાગ લેવા માટે 2,150 વિઝા જારી કર્યા છે. ભારતીય સિખોનો આ સમૂહ 4 નવેમ્બરના રોજ વાઘા સરહદ મારફતે લાહોર પહોંચશે. પોતાની 10 દિવસની યાત્રા દરમિયાન, ભારતીય સિખો વિવિધ ગુરુદ્વારાઓના દર્શન કરશે અને 13 નવેમ્બરના રોજ સ્વદેશ પરત ફરશે. ખાસ વાત એ છે કે, પહલગામ આતંકવાદી હુમલો અને ત્યારબાદ મે મહિનામાં ભારતના આતંકવાદ વિરોધી ઓપરેશન ‘સિંદૂર’ પછી આ પહેલી મોટી સરહદ પારની યાત્રા છે.

1974ના પ્રોટોકોલ હેઠળ યાત્રાનું આયોજન

આ તીર્થયાત્રા વર્ષ 1974માં ભારત અને પાકિસ્તાન વચ્ચે થયેલા ધાર્મિક સ્થળોના પ્રવાસ માટેના પ્રોટોકોલ હેઠળ આવે છે. આ પ્રોટોકોલ રાજકીય તણાવ હોવા છતાં, બંને તરફના શ્રદ્ધાળુઓને જરૂરી ધાર્મિક કાર્યક્રમો માટે યાત્રા કરવાની મંજૂરી આપે છે. નવી દિલ્હીમાં પાકિસ્તાન હાઈ કમિશને પણ વિઝાની પુષ્ટિ કરી છે. શિરોમણી ગુરુદ્વારા પ્રબંધક કમિટી (SGPC) અને ભારતના વિદેશ મંત્રાલય દ્વારા સંકલિત આ જથ્થો નનકાના સાહિબ અને હસન અબ્દાલમાં આવેલા પંજા સાહિબ સહિતના અનેક પવિત્ર ગુરુદ્વારાઓની મુલાકાત લેશે.

નનકાના સાહિબમાં હજારો શ્રદ્ધાળુઓ ઉમટશે

ગુરુ નાનક દેવજીની જન્મભૂમિ નનકાના સાહિબ, જે ભારત-પાકિસ્તાન સરહદથી આશરે 85 કિલોમીટર પશ્ચિમમાં આવેલું છે, ત્યાં આ ગુરુપર્વના તહેવારોમાં ભાગ લેવા માટે હજારો શ્રદ્ધાળુઓ એકઠા થવાની સંભાવના છે. આ યાત્રા બંને દેશોના લોકો વચ્ચે ધાર્મિક સૌહાર્દ અને સાંસ્કૃતિક જોડાણ જાળવી રાખવામાં મહત્વની ભૂમિકા ભજવે છે.