ઉત્તર કોરિયાની વધુ એક ઉશ્કેરણી: સમુદ્રમાં બેલેસ્ટિક મિસાઈલ છોડી, જાપાન અને દક્ષિણ કોરિયામાં ફફડાટ…
પ્યોંગયાંગઃ વિશ્વભરની શાંતિ સમિતિઓની ચેતવણી છતાં ઉત્તર કોરિયા પોતાની સૈન્ય ગતિવિધિઓને રોકવાનું નામ નથી લઈ રહ્યું. ફરી સરહદી વિસ્તારોમાં ભયનો માહોલ પેદા કરતા ઉત્તર કોરિયાએ આજે સવારે દરિયામાં બેલેસ્ટિક મિસાઇલ છોડી હતી. આ ઘટના બાદ દક્ષિણ કોરિયા, જાપાન અને અમેરિકાની નજર પ્યોંગયાંગની હિલચાલ પર ટકેલી છે. આ વિસ્તારમાં સતત વધી રહેલા મિસાઇલ પરીક્ષણો આંતરરાષ્ટ્રીય સુરક્ષા માટે ફરી ચિંતાનો વિષય બન્યા છે.
દક્ષિણ કોરિયાના સંરક્ષણ વિભાગ ‘જોઈન્ટ ચીફ્સ ઓફ સ્ટાફ’ દ્વારા બહાર પાડવામાં આવેલા નિવેદન અનુસાર ઉત્તર કોરિયાએ તેના પૂર્વી તટથી ‘જાપાન સાગર’ તરફ એક શંકાસ્પદ બેલેસ્ટિક મિસાઇલ લોન્ચ કરી છે. જાપાનના સંરક્ષણ મંત્રાલયે પણ આ સમાચારની પુષ્ટિ કરી છે. હાલમાં સૈન્ય નિષ્ણાતો આ મિસાઇલની રેન્જ અને તેના પ્રકાર વિશે ઊંડાણપૂર્વક તપાસ કરી રહ્યા છે, જોકે હજુ સુધી કોઈ જાનમાલના નુકસાનના સમાચાર નથી.
આ પણ વાંચો…અમેરિકાના વેનેઝુએલા પરના હુમલાની ચીને ટીકા કરી, માદુરો અને તેમની પત્નીને મુક્ત કરવાની માંગ
મિસાઇલ પરીક્ષણ પહેલા ઉત્તર કોરિયાના સર્વોચ્ચ નેતા કિમ જોંગ ઉને દેશની મહત્વની હથિયાર ફેક્ટરીની મુલાકાત લીધી હતી. સરકારી મીડિયાના અહેવાલ મુજબ કિમ જોંગે સૈન્ય અધિકારીઓને સ્પષ્ટ સૂચના આપી છે કે વ્યૂહાત્મક માર્ગદર્શિત શસ્ત્રોનું ઉત્પાદન બમણું કરવામાં આવે. આ ઉપરાંત, તેમણે પરમાણુ શક્તિથી ચાલતી સબમરીનનું પણ નિરીક્ષણ કર્યું હતું, જે દર્શાવે છે કે આગામી વર્ષે યોજાનારી ‘વર્કર્સ પાર્ટી’ની કોંગ્રેસ પહેલા ઉત્તર કોરિયા પોતાની સૈન્ય શક્તિને ચરમસીમાએ લઈ જવા માંગે છે.
ઉત્તર કોરિયાની આ સક્રિયતા પાછળ અનેક કારણો હોવાનું માનવામાં આવે છે. નવેમ્બર મહિનામાં જ્યારે અમેરિકાએ દક્ષિણ કોરિયાને પરમાણુ સબમરીન બનાવવાની મંજૂરી આપી હતી, ત્યારે પણ કિમ જોંગે મિસાઇલ છોડીને વિરોધ નોંધાવ્યો હતો.વિશ્લેષકોનું માનવું છે કે ઉત્તર કોરિયા પોતાની હુમલો કરવાની ક્ષમતાને સચોટ બનાવવા માંગે છે. સાથે જ, એવી પણ શક્યતા છે કે તે પોતાના અત્યાધુનિક હથિયારો રશિયા જેવા દેશોને નિકાસ કરવા માટેનું મેદાન તૈયાર કરી રહ્યું છે, જે વૈશ્વિક રાજનીતિમાં નવા સમીકરણો બનાવી શકે છે.
આ પણ વાંચો…કિમ જોંગની ‘જાસૂસી’: ઉત્તર કોરિયામાં અમેરિકાના નિષ્ફળ ઓપરેશનની રિયલ સ્ટોરી જાણો
