દોહાઃ ઈરાનના પરમાણુ ઠેકાણા પર અમેરિકાના હવાઈ હુમલા બાદ ઈરાન અને અમેરિકા વચ્ચે સતત તણાવ વધી રહ્યો છે. ઈરાને કતાર સ્થિત અમેરિકન બેઝને નિશાન બનાવ્યું હતું. દોહામાં અમેરિકાના બેઝ પર 6 મિસાઈલથી હુમલો કરવામાં આવ્યો હતો. ઈઝરાયલના અધિકારી દ્વારા પણ હુમલાની પુષ્ટિ કરવામાં આવી હતી. આ હુમલાને અમેરિકા પર ઈરાનની જવાબી કાર્યવાહી તરીકે જોવામાં આવે છે.
ઈરાને કતારના અલ ઉદીદ એરબેઝને નિશાન બનાવ્યું હતું. અમેરિકાએ ઈરાનના પરમાણુ કેન્દ્રો પર બોમ્બમારો કર્યો હતો, જેના જવાબમાં આ કાર્યવાહી કરવામાં આવી હતી. ઈરાનની સરકારી ટેલીવિઝન પર આ હુમલાની જાહેરાત કરી હતી. ટેલીવિઝન પર તેને અમેરિકાની આક્રમકતા સામે જવાબ આપવામાં આવ્યો હોવાનું જણાવાયું હતું.
ઈઝરાયલના અધિકારીએ જણાવ્યું કે, ઈરાને કતારમાં આવેલા અમેરિકન સૈન્ય ઠેકાણા પર 6 મિસાઈલ છોડી હતી. આ પહેલા રવિવારે અમેરિકાએ ઈરાનની ત્રણ ન્યૂક્લિયર સાઈટ્સને નિશાન બનાવી હતી.
