કંગાળ પાકિસ્તાનને આઇએમએફએ કરી મદદ: 1.10 અબજ અમેરિકન ડૉલરની લોનની આપી મંજૂરી
વોશિંગ્ટનઃ ઇન્ટરનેશનલ મોનેટરી ફંડ (આઇએમએફ) એ રાહત પેકેજ હેઠળ પાકિસ્તાનને 1.10 અબજ યુએસ ડોલરની તાત્કાલિક સહાયને મંજૂરી આપી છે. આઇએમએફએ કહ્યું હતું કે દેશે તેની અર્થવ્યવસ્થાને પાટા પર લાવવા માટે કડક પગલાં લેવાની જરૂર છે.
આ અંગેનો નિર્ણય ઇન્ટરનેશનલ મોનેટરી ફંડના એક્ઝિક્યુટિવ બોર્ડ દ્વારા લેવામાં આવ્યો છે. આઇએમએફ એડિશનલ એરેન્જમેન્ટ (એસબીએ) દ્વારા સમર્થિત પાકિસ્તાનના આર્થિક સુધારણા કાર્યક્રમની બીજી અને અંતિમ સમીક્ષા પૂર્ણ કર્યા બાદ તેમણે આ નિર્ણય લીધો હતો. આ સાથે એસબીએ હેઠળ ચૂકવવાપાત્ર રકમ આશરે 3 અબજ અમેરિકન ડોલર સુધી પહોંચી ગઈ છે.
આપણ વાંચો: હેડ-કોચ બન્યા પછી ગૅરી કર્સ્ટને પાકિસ્તાનને શું પ્રોમિસ આપ્યું?
આઇએમએફના ડેપ્યુટી મેનેજિંગ ડિરેક્ટર એન્ટોનેટ સયેહે જણાવ્યું હતું કે આગળના પડકારોને જોતાં પાકિસ્તાને સખત મહેનતથી મેળવેલી આ સ્થિરતાનો લાભ લેવો જોઈએ. વર્તમાન સિસ્ટમથી આગળ વધીને આપણે મજબૂત, સમાવિષ્ટ અને ટકાઉ વિકાસ હાંસલ કરવા માટે મજબૂત આર્થિક નીતિઓ અને માળખાકીય સુધારાઓ અમલમાં મુકવાની જરૂર છે.
તેમણે કહ્યું કે સતત બાહ્ય સમર્થન પણ મહત્વપૂર્ણ રહેશે. આઇએમએફના અધિકારીએ જણાવ્યું હતું કે મજબૂત, લાંબા ગાળાની સમાવેશી વૃદ્ધિ અને રોજગારીનું સર્જન હાંસલ કરવા માટે માળખાકીય સુધારાને વેગ આપવાની જરૂર છે અને પર્યાપ્ત ધિરાણવાળા બેનઝીર ઈન્કમ સપોર્ટ પ્રોગ્રામ દ્વારા સૌથી વધુ વંચિતોને સતત રક્ષણ પૂરું પાડવાની જરૂર છે.