સાઉદી અરેબિયામાં ખુલશે પહેલી સરકારી વાઇન શોપ, શું ગિફ્ટ સિટી જેવા છે નિયમો કે પછી કોઈ પણ… ?
સાઉદી અરેબિયામાં દારૂની દુકાન ખોલવાના પગલાને ઐતિહાસિક ગણાવવામાં આવી રહ્યું છે. સાઉદી અરેબિયામાં આલ્કોહોલ પર પ્રતિબંધ છે કારણ કે તે ઇસ્લામના બે પવિત્ર સ્થળોની મેજબાની કરી રહ્યું છે. દેશમાં દારૂ વેચવાનું તો દૂર, સામાન્ય લોકો તેનું સેવન પણ કરી શકતા નથી. દારૂની દુકાન ખોલવાના નિર્ણયને ક્રાઉન પ્રિન્સ મોહમ્મદ બિન સલમાનના સુધારાના પગલાં સાથે જોડવામાં આવી રહ્યો છે. એવું માનવામાં આવે છે કે આ નિર્ણય દ્વારા તેઓ સાઉદી અરેબિયા પર અતિ રૂઢિચુસ્ત મુસ્લિમ દેશનું લેબલ હટાવવા માંગે છે, જેથી દેશમાં પ્રવાસન અને વેપારને વેગ મળે.
આપને જણાવી દઈએ કે સાઉદી અરેબિયાની રાજધાની રિયાધમાં તેની પહેલી વાઇન શોપ (દારૂની દુકાન) ખોલવાની તૈયારી કરી રહ્યું છે. આ સ્ટોર ખાસ કરીને બિન-મુસ્લિમ રાજદ્વારીઓ માટે હશે. આવી સ્થિતિમાં, સામાન્ય લોકો આ સ્ટોરમાંથી દારૂ ખરીદી શકશે નહીં. મીડિયા રિપોર્ટ્સ જણાવે છે કે આ દારૂની દુકાનમાંથી દારૂની ખરીદી કરતા પહેલા ગ્રાહકોએ મોબાઈલ એપ દ્વારા રજીસ્ટ્રેશન કરાવવું પડશે. આ સિવાય તેમણે સાઉદી અરેબિયાના વિદેશ મંત્રાલય પાસેથી ક્લિયરન્સ કોડ પણ મેળવવો પડશે. રાજદ્વારીઓ માટે દારૂની ખરીદી માટે માસિક ક્વોટા પણ નક્કી કરવામાં આવશે. તેનાથી વધુ ખરીદી શકાતી નથી.
વધુમાં જાણવા મળ્યું છે કે આ દારૂની દુકાન રિયાધના ડિપ્લોમેટિક ક્વાર્ટરમાં સ્થિત હશે, જ્યાં ઘણા દેશોના દૂતાવાસ છે અને વિદેશી રાજદ્વારીઓ પણ ત્યાં રહે છે. તે અસ્પષ્ટ હતું કે અન્ય બિન-મુસ્લિમ વિઝિટરોને સ્ટોર્સમાં પ્રવેશ મળશે કે કેમ! સાઉદી અરેબિયામાં લાખો વિદેશીઓ રહે છે પરંતુ તેમાંથી મોટાભાગના એશિયા અને ઇજિપ્તના મુસ્લિમ મજૂરો છે. યોજનાઓથી વાકેફ એક સૂત્રએ જણાવ્યું હતું કે આગામી અઠવાડિયામાં સ્ટોર ખોલવાની શક્યતા છે.
સાઉદી અરેબિયામાં દારૂ પીવા પર કડક કાયદા છે, જેના માટે સેંકડો કોરડા, દેશનિકાલ, દંડ અથવા કેદની સજાને પાત્ર છે અને વિદેશીઓને પણ દેશનિકાલનો સામનો કરવો પડે છે. સુધારાના ભાગરૂપે, કોરડા મારવાની સજાને મોટાભાગે જેલની સજા દ્વારા બદલવામાં આવી છે. આલ્કોહોલ માત્ર રાજદ્વારી મેઈલ દ્વારા અથવા બ્લેક માર્કેટ પર ઉપલબ્ધ છે. સાઉદીની સરકારી મીડિયાએ અહેવાલ આપ્યો છે કે સરકાર રાજદ્વારી મિશનમાં દારૂની આયાત પર નવા નિયંત્રણો લાદી રહી છે, જે નવા સ્ટોર્સની માંગમાં વધારો કરી શકે છે.
