Donald Trumpને મોટો ફટકો, માનહાનિના કેસમાં E Jean Carrollને $83 મિલિયન ચુકવવા આદેશ

ન્યૂયોર્ક સિટીની કોર્ટે શુક્રવારે યુએસના ભૂતપૂર્વ રાષ્ટ્રપતિ ડોનાલ્ડ ટ્રમ્પ(Donald Trump)ને મોટો ઝટકો આપ્યો હતો. લેખક અને ભૂતપૂર્વ કોલમનિસ્ટ ઇ જીન કેરોલ(E Jean Carroll)ની માનહાની કેસમાં જ્યુરીએ ડોનાલ્ડ ટ્રમ્પને 83.3 મિલિયન ડોલર($83 million) આપવા આદેશ કર્યો હતો.

જ્યુરીએ કહ્યું કે 2019માં યોગ્ય અને આપત્તિજનક નિવેદનો આપીને ટ્રમ્પે કેરોલની પ્રતિષ્ઠાને હાનિ પહોંચાડી હતી અને ભાવનાત્મક તકલીફ પહોંચાડી હતી. ટ્રમ્પે કેરોલને વળતર રૂપે 18.3 મિલિયન ડોલર આપવા જોઈએ અને દંડાત્મક નુકસાની માટે 65 મિલિયન ડોલર ચૂકવવા જોઈએ.

કેરોલે ટ્રમ્પ પર 1990ના દાયકાના મધ્યમાં મેનહટનમાં એક હાઈ-એન્ડ ડિપાર્ટમેન્ટલ સ્ટોરના ડ્રેસિંગ રૂમમાં તેના પર બળાત્કાર કરવાનો આરોપ મૂક્યો હતો. જૂન 2019માં ન્યૂ યોર્ક મેગેઝિન દ્વારા પ્રકાશિત કરવામાં આવેલા કેરોલના પુસ્તક What Do We Need Men For? આ ખુલાસો કરવામાં આવ્યો હતો.

ટ્રમ્પે આ તમામ આરોપને નકારી કાઢ્યા હતા અને તેણે કેરોલને જુઠ્ઠી અને રાજકીય કાર્યકર્તા ગણાવી હતી. ટ્રમ્પએ કહ્યું હતું કે હું એવો માણસ નથી, હું તેને ક્યારેય મળ્યો પણ નથી. જોકે 1987ની એક પાર્ટીના એક ફોટોમાં તેઓ બંને એક સાથે જોવા મળે છે.

કેરોલે નવેમ્બર 2019માં ટ્રમ્પ પર બદનક્ષીનો દાવો કર્યો હતો. કેરોલે દાવો કર્યો હતો કે તેને બદનામ કરવામાં આવી રહી છે અને તેની કારકિર્દીને નુકસાન પહોંચ્યું છે. તેણે જાન્યુઆરી 2022 માં એક અલગ કેસ પણ દાખલ કર્યો હતો, જેમાં આરોપ મૂક્યો હતો કે ટ્રમ્પે તેની સાથે શારીરિક સતામણી કરી હતી.

જાતીય હુમલાનો મુકદ્દમો સુનાવણીમાં પ્રથમ ગયો, અને જૂન 2022 માં જ્યુરીએ ટ્રમ્પને દોષિત ગણાવ્યા અને કેરોલને 5 મિલિયન ડોલર ચૂકવવાનો આદેશ આપ્યો. બંને કેસોમાં ન્યાયાધીશ લુઈસ કેપ્લાને ચુકાદો આપ્યો હતો કે પ્રથમ ટ્રાયલમાં જ્યુરીના ચુકાદાને બીજી ટ્રાયલમાં હકીકત તરીકે સ્વીકારવામાં આવશે, એટલે કે ટ્રમ્પ કેરોલના બળાત્કારના દાવાને ફરીથી પડકારી શકશે નહીં.

બીજા કેસની સુનાવણીમાં ટ્રમ્પના બદનક્ષીભર્યા નિવેદનોથી કેરોલની પ્રતિષ્ઠાને કેટલું નુકસાન થયું હતું અને ભવિષ્યમાં આવા નિવેદનો ન આપે તેટલી રકમનો દંડ કરવા પર ધ્યાન કેન્દ્રિત કરવામાં આવ્યું હતું.

ટ્રમ્પ પ્રથમ સુનાવણીમાં માટે હાજર થયા ન હતા, જ્યારે તેઓ બીજી સુનાવણી માટે કોર્ટમાં હાજર થયા હતા, પરંતુ તેમનું વર્તન અયોગ્ય રહ્યું હતું. તેમણે ઘણી વખત કાર્યવાહીમાં વિક્ષેપ પાડ્યો, ન્યાયાધીશ અને વકીલો પર બૂમો પાડી અને તેના સોશિયલ મીડિયા પ્લેટફોર્મ ટ્રુથ સોશિયલ પર ઉશ્કેરણીજનક મેસેજ પોસ્ટ કર્યા.

જ્યુરીએ તેનો ચુકાદો જાહેર કર્યા પછી, ટ્રમ્પે તેને “એકદમ હાસ્યાસ્પદ” ગણાવ્યો હતો. ટ્રમ્પે લખ્યું, “હું બંને ચુકાદાઓ સાથે સંપૂર્ણપણે અસંમત છું, અને મારા અને રિપબ્લિકન પાર્ટીને બદનામ કરવા બાઈડેન તંત્ર વિચ હન્ટ કરી રહ્યું છે.”
કેરોલે કહ્યું કે તે જ્યુરીના નિર્ણયથી ખુશ છે. તેણે લખ્યું કે મને આશા છે કે તે જાતીય હિંસાનો ભોગ બનેલી અન્ય મહિલાઓને ન્યાય મેળવવા માટે પ્રેરણા મળશે.