અમેરિકામાં છ વર્ષના દીકરાની હત્યારી ભારતમાંથી ઝડપાઈ, 2 કરોડનું હતું ઈનામ, કેમ કરેલી દીકરાની હત્યા ?

અમેરિકાની ફેડરલ બ્યુરો ઓફ ઇન્વેસ્ટિગેશન (FBI)એ ભારતીય અધિકારીઓના સહયોગથી એક મહત્વપૂર્ણ ઓપરેશન હાથ ધરીને સિન્ડી રોડ્રિગ્ઝ સિંઘની ધરપકડ કરી છે, જે FBIની “ટોપ 10 મોસ્ટ વોન્ટેડ” ભાગેડુઓની યાદીમાં સામેલ હતી. આ 40 વર્ષીય મહિલા પર તેના 6 વર્ષના પુત્ર નોએલ આલ્વેરેઝની હત્યાનો આરોપ છે. FBIના ડિરેક્ટર કાશ પટેલે X પર જણાવ્યું કે સિન્ડીને ભારતમાંથી ઝડપી લેવામાં આવી છે અને તેને ટેક્સાસ લઈ જવામાં આવશે, જ્યાં તેની સામે કેસ ચલાવવામાં આવશે.

ભારતીય અધિકારીઓ અને ઇન્ટરપોલના સહયોગથી FBIએ સિન્ડી સિંઘની ધરપકડ 20 ઓગસ્ટ, 2025ના રોજ કરી. તેના પર “ગેરકાયદેસર રીતે દેશ છોડી ફરાર થવું” અને “10 વર્ષથી ઓછી ઉંમરના બાળકની હત્યા”ના ગંભીર આરોપો લાગ્યા છે. માર્ચ 2023માં સિન્ડીએ તેના પતિ અને છ અન્ય બાળકો સાથે ભારત જવા માટે ફ્લાઇટ લીધી હતી, પરંતુ તેનો 6 વર્ષનો પુત્ર નોએલ તેમાં સામેલ નહોતો. FBIએ તેની ધરપકડ માટે $250,000નું ઇનામ જાહેર કર્યું હતું.

સિન્ડી સિંઘે તેના 6 વર્ષના પુત્ર નોએલ આલ્વેરેઝની હત્યા કેમ કરી તે અંગેની સ્પષ્ટ વિગતો હજુ સુધી જાહેર થઈ નથી, પરંતુ પોલીસની પ્રાથમિક તપાસમાં ઘરેલું હિંસા અને વ્યક્તિગત મનમેળાપની શક્યતા દર્શાવવામાં આવી છે. અહેવાલો અનુસાર, સિન્ડીના પરિવારમાં આર્થિક તંગી અને કૌટુંબિક વિવાદોનો ઇતિહાસ હતો, જે હત્યાનું એક સંભવિત કારણ હોઈ શકે છે. નોએલના ગુમ થયા બાદ સિન્ડીનું જૂઠું બોલવું અને ભારત ભાગી જવું તેની ગુનાહિત ઇરાદાને દર્શાવે છે.

આ ઘટના માર્ચ 2023માં પ્રકાશમાં આવી જ્યારે ટેક્સાસના એવરમેનમાં પોલીસે નોએલ આલ્વેરેઝની શોધખોળ શરૂ કરી, જે ઓક્ટોબર 2022થી ગુમ હતો. સિન્ડીએ પોલીસને ગુમરાહ કરતાં કહ્યું કે નોએલ તેના જન્મદાતા પિતા સાથે મેક્સિકોમાં છે. તપાસમાં જાણવા મળ્યું કે તેણે નવેમ્બર 2022માં તેના અન્ય બાળકો માટે પાસપોર્ટ માટે અરજી કરી હતી, પરંતુ નોએલને આમાંથી બાકાત રાખ્યો હતો. જો કે નોએલનું શબ હજુ સુધી મળ્યું નથી, અને તેને મૃત માનવામાં આવે છે.

કાનૂની કાર્યવાહી અને આંતરરાષ્ટ્રીય સહયોગ

ઓક્ટોબર 2023માં, ટેક્સાસની ટેરેન્ટ કાઉન્ટીની અદાલતમાં સિન્ડી સામે હત્યાનો આરોપ નોંધાયો હતો. નવેમ્બર 2023માં તેની સામે ફેડરલ અરેસ્ટ વોરંટ જારી થયું, અને ઓક્ટોબર 2024માં ઇન્ટરપોલે રેડ નોટિસ જારી કરી. આ રેડ નોટિસના આધારે ભારતીય અધિકારીઓએ FBI સાથે મળીને તેની ધરપકડ કરી. FBI ડિરેક્ટર કાશ પટેલે ટેક્સાસ, ન્યૂયોર્ક અને ભારતના કાયદા અમલીકરણ અધિકારીઓના સહયોગની પ્રશંસા કરી, અને આ ધરપકડને છેલ્લા સાત મહિનામાં ચોથી મોટી સફળતા ગણાવી.

આ ધરપકડથી નોએલના મૃત્યુના કેસમાં ન્યાય મળવાની આશા જાગી છે. ટેક્સાસના સેનેટર ટેડ ક્રૂઝે X પર જણાવ્યું કે, સિન્ડી સિંઘની ધરપકડ એ ન્યાયની દિશામાં મહત્વનું પગલું છે. આ ઘટનાએ આંતરરાષ્ટ્રીય સહયોગનું મહત્વ દર્શાવ્યું છે. સિન્ડી સિંઘ હવે ટેક્સાસમાં કોર્ટમાં હાજર થશે, જ્યાં તેના પર લાગેલા ગંભીર આરોપોનો સામનો કરવો પડશે.

આ પણ વાંચો…આણંદમાં મોર્નિંગ વોક પર નીકળેલા કોંગ્રેસ નેતાની ઘાતકી હત્યા; પોલીસ વ્યવસ્થા સામે કોંગ્રેસના સવાલ