પ્રામાણિકતા અને શિસ્તમાં અમેરિકનો હેરિસને ટ્રમ્પ પર સરસાઈ આપે છે: સર્વેનું તારણ

વોશિંગ્ટન: વાઇસ પ્રેસિડેન્ટ કમલા હેરિસને પ્રામાણિકતા જેવા નેતૃત્વના ગુણો માટે ભૂતપૂર્વ રાષ્ટ્રપતિ ડોનાલ્ડ ટ્રમ્પ કરતાં વધુ વિશ્ર્વાસ રાખતા હોવાનું માનવામાં આવે છે. એસોસિએટેડ પ્રેસ-એનઓઆરસી સેન્ટર ફોર પબ્લિક અફેર્સ રિસર્ચના એક સર્વેમાં એવું પણ જાણવા મળ્યું છે કે અમેરિકનો ટ્રમ્પ પર અર્થતંત્ર અને ઇમિગ્રેશનના મુદ્દે વધુ ભરોસો રાખે છે.

લગભગ અડધા અમેરિકનો કહે છે કે ‘લોકશાહી માટે પ્રતિબદ્ધ’ અને ‘શિસ્તબદ્ધતા’ એવા લક્ષણો છે જે હેરિસને વધુ સારી રીતે દર્શાવી શકે છે, જ્યારે લગભગ 10માંથી 3 લોકો કહે છે કે આ ગુણો ટ્રમ્પમાં વધુ સારી રીતે જોવા મળે છે.

લગભગ 10 માંથી 4 લોકો કહે છે કે હેરિસ એવી વ્યક્તિ છે જે ‘તમારા જેવા લોકોની ચિંતા કરે છે’ જ્યારે 10 માંથી લગભગ 3 ટ્રમ્પ વિશે આવું માને છે. લગભગ 10 માંથી 4 લોકો કહે છે કે ‘પ્રામાણિકતા’ હેરિસમાં છે અને 24 ટકા લોકો કહે છે કે ટ્રમ્પમાં ગુણવત્તા વધુ સારી છે.

બંને પક્ષો હેરિસને વ્યાખ્યાયિત કરવા દોડી રહ્યા છે કારણ કે તેઓ આગામી અઠવાડિયે પાર્ટીના સંમેલનમાં ડેમોક્રેટિક પાર્ટી તરફથી ઉમેદવારી સ્વીકારવાની તૈયારી કરી રહ્યાં છે. સર્વેક્ષણમાં એવું જોવા મળ્યું છેે કે પ્રમુખ જો બાઈડેનને તેમની પુન:ચૂંટણીની તૈયારીઓ છોડી દેવા માટે જે કારણો જવાબદાર હતા, તેવા ઘણા કારણો હેરિસને પણ એટલે જ અંશે લાગુ પડે છે, પરંતુ જ્યારે તેમની સરખામણી ટ્રમ્પ સાથે કરવામાં આવે ત્યારે તેમની પાસે કેટલીક સરસાઈ છે. બીજી તરફ ડેમોક્રેટ્સ તેમની ઉમેદવારી વિશે બાઈડનની તુલનામાં વધુ ખુશ છે.

આ પણ વાંચો: ડોનાલ્ડ ટ્રમ્પ કમલા હેરિસથી ડરી ગયા! ડિબેટ કરવાથી ઇનકાર કર્યો, જાણો રેસમાં કોણ આગળ

દેશ સામેની કઠિન કટોકટીનો સામનો કરવા સક્ષમ એક મજબૂત નેતા તરીકેની છબી ટ્રમ્પે ઊભી કરવાનો પ્રયાસ કર્યો છે અને એવી દલીલ કરી છે કે વિદેશી નેતાઓ વ્હાઇટ હાઉસમાં હેરિસનું સન્માન નહીં કરે.

સર્વેક્ષણમાં જોકે ટ્રમ્પના દાવા સાથે અમેરિકનો સહમત ન હોવાનું જણાઈ આવ્યું છે. 10 માંથી ચાર પુખ્ત વયના અમેરિકનો ટ્રમ્પને મજબૂત નેતા તરીકે જુએ છે અને લગભગ આટલા જ લોકો હેરિસ માટે પણ આવું જ માને છે. લગભગ 10માંથી 4 કહે છે કે ટ્રમ્પ કટોકટીનો સામનો કરવામાં વધુ સક્ષમ છે અને આટલા જ લોકો હેરિસને આમ કરવા માટે વધુ સારી સ્થિતિમાં માને છે. નવેમ્બરમાં જીતવા માટે કોણ વધુ સક્ષમ છે એ મુદ્દે અમેરિકનો લગભગ સમાનરૂપે વિભાજિત છે.

જુલાઈમાં બાઈડન રેસમાંથી બહાર નીકળી ગયા પહેલાં, 10 માંથી માત્ર 2 અમેરિકનોને એવું લાગતું હતું કે તેઓ જીતવા માટે વધુ સક્ષમ છે, જ્યારે ટ્રમ્પ વિશે લગભગ બમણા લોકો એવું વિચારતા હતા.

આ પણ વાંચો: ‘…તમારે ફરીથી મતદાન કરવાની જરૂર નહીં રહે’ ડોનાલ્ડ ટ્રમ્પ સરમુખત્યાર બનવા ઈચ્છે છે!

એલ્કો, નેવાડામાં રહેતી 42 વર્ષીય વિદ્યાર્થિની અને રિપબ્લિકન લિસા મિલરે કહ્યું હતું કે જો બાઈડન રેસમાં હતા ત્યારે ટ્રમ્પ પાસે વધુ સારી તક હતી. મને લાગે છે કે જો બાઈડન વિશે ચિંતિત ઘણા લોકો કમલા હેરિસની ઉંમર અને જ્ઞાનાત્મક ક્ષમતાઓ પર વધુ ભરોસો કરી રહ્યા છે.

અર્થતંત્ર અથવા ઇમિગ્રેશનને સંભાળવાની વાત આવે ત્યારે અમેરિકનો હેરિસ કરતાં ટ્રમ્પ પર વધુ વિશ્વાસ કરે છે, પરંતુ તફાવત ઘણો ઓછો છે – 45 ટકા કહે છે કે ટ્રમ્પ અર્થતંત્રને સંભાળવા માટે વધુ સારી સ્થિતિમાં છે, જ્યારે 38 ટકા લોકો હેરિસ માટે આવું કહે છે. ઇમિગ્રેશન સંબંધી બાબતો સંભાળવામાં પણ લગભગ આટલા જ પ્રમાણમાં ટ્રમ્પની સ્થિતિ છે. સ્વતંત્ર લોકો આર્થિક મુદ્દાઓ પર હેરિસ કરતાં ટ્રમ્પ પર વધુ વિશ્વાસ કરે તેવી શક્યતા છે અને તેઓ ઇમિગ્રેશનના મુદ્દે પણ ટ્રમ્પ પર વધુ ભરોસો કરે છે.

જ્યારે જાતિ અને વંશીય અસમાનતા, ગર્ભપાત નીતિ અને આરોગ્યની સંભાળ સંબંધિત મુદ્દાઓ પર હેરિસને ટ્રમ્પ કરતાં વધુ ફાયદો છે. લગભગ અડધા પુખ્ત વયના અમેરિકનો ઉપરોક્ત મુદ્દા પર હેરિસની તરફેણમાં છે જ્યારે ટ્રમ્પ માટે 10 માંથી ફક્ત 3 લોકો આવું માને છે.

લગભગ બે તૃતીયાંશ અશ્ર્વેત વયસ્કો કહે છે કે હેરિસ એવા ઉમેદવાર છે જેમના પર તેઓ આ મુદ્દે વધુ વિશ્વાસ કરે છે, તેમજ લગભગ અડધા હિસ્પેનિક પુખ્તો અને ગોરા પુખ્ત વયના લોકો પણ આવું જ માને છે. (એપી)