ગાંધીનગર: ગુજરાતના મુખ્ય પ્રધાન ભૂપેન્દ્ર પટેલે આજે નવી દિલ્હીમાં વડાપ્રધાન નરેન્દ્ર મોદીની અધ્યક્ષતામાં યોજાયેલી નીતિ આયોગની ગવર્નિંગ કાઉન્સિલની 10મી બેઠકમાં સહભાગી થયા હતા. આ બેઠકમાં મુખ્ય સચિવ પંકજ જોશી ઉપસ્થિત રહ્યા હતા. આ બેઠકમાં તેમણે ભારપૂર્વક જણાવ્યું કે વિકસિત ભારત@2047 એ રાષ્ટ્રનો સામૂહિક સંકલ્પ છે અને આ સંકલ્પને સિદ્ધ કરવામાં દરેક રાજ્યની અર્થપૂર્ણ અને રણનીતિક ભૂમિકા અનિવાર્ય છે.
વડાપ્રધાનની અધ્યક્ષતામાં યોજાયેલી આ બેઠકમાં રાજ્યોના મુખ્ય પ્રધાનોએ વિકસિત ભારત@2047માં તેમના રાજ્યોની સજ્જતા અને આયોજનની રૂપરેખા આપી હતી. મુખ્ય પ્રધાન ભૂપેન્દ્ર પટેલે ઓપરેશન સિંદૂરની સફળતા માટે વડાપ્રધાન નરેન્દ્ર મોદી અને દેશની સેનાને અભિનંદન પાઠવ્યાં હતાં. ભૂપેન્દ્ર પટેલે જણાવ્યું કે, વિકસિત ભારત@2047 માટે વિકસિત રાજ્યનો રોડમેપ તૈયાર કરનારા અગ્રણી રાજ્યોમાંનું ગુજરાત પણ એક રાજ્ય છે. આ રોડમેપ અંતર્ગત રાજ્યના બધા જ લોકોના અર્નિંગ વેલ અને લિવિંગ વેલનું વિઝન ગુજરાતે રાખ્યું છે.
GRITની સ્થાપના કરી
મુખ્ય પ્રધાને કહ્યું કે, આ વિઝનને સંસ્થાગત સ્વરૂપ આપવા ગુજરાતે નીતિ આયોગની તર્જ પર ગુજરાત રાજ્ય ઇન્સ્ટિટ્યૂશન ફોર ટ્રાન્સફોર્મેશન- GRITની સ્થાપના કરી છે. ગ્રીટ સર્વસમાવેશી વિકાસ ઉન્મુખ લક્ષ્યોને સિદ્ધ કરવામાં મહત્વપૂર્ણ ભૂમિકા નિભાવશે એમ પણ તેમણે જણાવ્યું હતું. CM ભૂપેન્દ્ર પટેલે વિકસિત ગુજરાત@2047ને ધરાતલ પર ઉતારવાના ફ્રેમવર્કને બે પરિમાણોમાં અપનાવવાનો વ્યૂહ રાખ્યો છે તેની પણ ભૂમિકા આપી હતી.
રિજીયોનલ ઇકોનોમિક માસ્ટર પ્લાન
તેમણે આ અંગે વધુમાં કહ્યું કે ડેવલપમેન્ટ ઓફ ઇમ્પ્લિમેન્ટેશન રોડમેપ અંતર્ગત જળ સંસાધન, એગ્રીકલ્ચર, એનર્જી, સ્પોર્ટ્સ, હેલ્થ, સ્કુલ એજ્યુકેશન અને સ્કિલિંગ જેવા સેક્ટર્સમાં અસરકારક સ્ટ્રેટેજી ડેવલપ કરવા સાથે યોજનાઓના સુદ્રઢ અમલ પર ફોકસ કરવામાં આવી રહ્યું છે. મુખ્ય પ્રધાને એ બીજા પરિમાણમાં રિજિયોનલ ઇકોનોમિક માસ્ટર પ્લાન એપ્રોચ અપનાવીને સુરત ઇકોનોમિક રિજીયન ડેવલપમેન્ટ માસ્ટર પ્લાન નીતિ આયોગના માર્ગદર્શનમાં લાગુ કર્યો છે તેની વિગતો આપી હતી. આ જ પેટર્ન પર રાજ્યમાં અન્ય પાંચ વિસ્તારો માટે પણ રિજીયોનલ ઇકોનોમિક માસ્ટર પ્લાન તૈયાર કરવામાં આવી રહ્યા છે તેમ તેમણે ઉમેર્યુ હતું.
વિકસિત ગુજરાત ફંડનું પણ પ્રાવધાન આ વર્ષના બજેટમાં કર્યું છે અને માત્ર આયોજન જ નહીં મોનિટરિંગ મિકેનિઝમ પણ ગોઠવ્યું છે એમ મુખ્ય પ્રધાને જણાવ્યું હતું. આ હેતુસર સસ્ટેનેબિલિટી તથા ડેટા ડિસિઝન મેકિંગ સુનિશ્ચિત કરવા ડિજિટલ ડેશબોર્ડ અને 500થી વધુ કી પરફોર્મન્સ ઇન્ડિકેટર્સ (KPI) નિર્ધારિત કરવામાં આવી રહ્યા છે એમ તેમણે કહ્યું હતું.
રાજ્યમાં 3.36 લાખ સોલાર રૂફટોપ ઇન્સ્ટોલેશન થયા
ગ્લોબલ કેપેબિલિટી સેન્ટર પોલીસી, સ્પેસ ટેક પોલિસી, સેમિકન્ડક્ટર પોલિસી જેવી સેક્ટર સ્પેસિફિક પોલીસિઝ અને એ.આઈ. વિઝનને આગળ ધપાવતા ગિફ્ટ સિટીમાં એ.આઈ. સેન્ટર ઓફ એક્સેલેન્સ કાર્યરત છે એની પણ વિગતો મુખ્ય પ્રધાને આ બેઠકમાં આપી હતી. મુખ્ય પ્રધાને જણાવ્યું હતું કે ગુજરાતે પર્યાવરણ સંરક્ષણ સાથેના વિકાસ માટેના વડાપ્રધાનના વિઝનને અનુરૂપ ગ્રીન ગ્રોથ અને રિન્યુએબલ એનર્જીને પ્રાથમિકતા આપી છે. પ્રધાનમંત્રી સૂર્ય ઘર મુફ્ત બિજલી યોજના અન્વયે રાજ્યમાં 3.36 લાખ સોલાર રૂફટોપ ઇન્સ્ટોલેશન થયા છે અને દેશમાં આ યોજનામાં 34 ટકા હિસ્સેદારી ગુજરાતની છે તેમ પણ જણાવ્યું હતું.
આ પણ વાંચો…નીતિ આયોગની બેઠકમાં પીએમ મોદીએ મૂક્યો વિકસિત ભારત મિશન પર ભાર, કર્યા આ સૂચનો