ગુજરાત બોર્ડ આવતીકાલે જાહેર કરશે ધોરણ દસનું પરિણામ; ઓનલાઈન પણ મેળવી શકશો રિઝલ્ટ

ગાંધીનગર: ધોરણ 12 બોર્ડનું પરિણામ જાહેર થયા બાદ હવે ધોરણ 10 બોર્ડની પરીક્ષાનાં પરિણામની તારીખ જાહેર કરવામાં આવી છે. ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા જણાવવામાં આવ્યું હતું કે ફેબ્રુઆરી-માર્ચ 2025માં યોજાયેલી ધોરણ-10ની બોર્ડની પરીક્ષાનું પરિણામ આવતીકાલે જાહેર કરવામાં આવશે.

આવતીકાલે જાહેર થશે પરિણામ

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા એક અખબારી યાદીમાં જણાવવામાં આવ્યું હતું કે ફેબ્રુઆરી-માર્ચ 2025માં યોજાયેલી ધોરણ-10ની બોર્ડની પરીક્ષાનું પરિણામ તારીખ 8 મેના રોજ સવારના 8 કલાકે બોર્ડની વેબસાઇટ www.gseb.org પર જાહેર કરવામાં આવશે.

આપણ વાંચો: બોર્ડના પરિણામો બાદ ‘આપ’ ધારાસભ્યની મોટી જાહેરાત: 100% પરિણામ લાવનાર શાળાને 5 લાખની ગ્રાન્ટ!

વ્હોટ્સએપ નંબરથી પણ મળશે રિઝલ્ટ

વિદ્યાર્થીઓ તેમનું પરિણામ વેબસાઇટ પર તેમનો પરીક્ષાનો બેઠક ક્રમાંક (Seat Number) દાખલ કરીને મેળવી શકશે. આ ઉપરાંત, વિદ્યાર્થીઓ વ્હોટ્સએપ નંબર 6357300971 પર પણ પોતાનો બેઠક ક્રમાંક મોકલીને પરિણામ જાણી શકશે.

બોર્ડ દ્વારા જણાવવામાં આવ્યું છે કે વિદ્યાર્થીઓના ગુણપત્રક અને S.R. નકલ શાળાવાર મોકલવા અંગેની વિગતવાર સૂચનાઓ ટૂંક સમયમાં આપવામાં આવશે.

આપણ વાંચો: મહારાષ્ટ્રમાં એચએસસીનું પરિણામ જાહેરઃ છોકરીઓએ બાજી મારી, જાણો એટુઝેડ

પરીક્ષા બાદ ગુણચકાસણી અને દફતર ચકાસણી સંબંધિત સૂચનાઓ પણ બોર્ડની વેબસાઇટ પર મૂકવામાં આવશે અને ગુણચકાસણી માટેની અરજી ઓનલાઇન કરવાની રહેશે. પરિણામ બાદ નામ સુધારાની દરખાસ્ત નિયત નમૂનામાં કરવાની રહેશે.

વધુમાં, પૂરક પરીક્ષા-2025ના આવેદનપત્રો ઓનલાઇન ભરવાની સૂચનાઓ પણ આગામી સમયમાં જાહેર કરવામાં આવશે. શાળાના આચાર્ય, વાલીઓ, વિદ્યાર્થીઓ અને તમામ સંબંધિતોને આ બાબતની નોંધ લેવા અનુરોધ કરવામાં આવ્યો છે.