રાજકોટમાં અચાનક ત્રણ માળની ઈમારત થઈ ધરાશાયી, કોઈ જાનહાનિ નહીં
રાજકોટ: ગુજરાતના રાજકોટ શહેરના મવડી વિસ્તારમાં એક દુર્ઘટના થતા ટળી ગઈ છે. મંગળવારની બપોરે આ વિસ્તારમાં એક ત્રણ માળની જર્જરિત ઇમારત અચાનક ધરાશાયી થતાં હોબાળો મચ્યો હતો. ઈમારત ધરાશાયી થતો વીડિયો પણ સામે આવ્યો છે. અચાનક એક મકાન કેવી રીતે જમીનદોસ્ત થઈ ગયું તે આ વીડિયોમાં જોઈ શકાય છે.
સ્થાનિકો પાસેથી મળતી માહિતી મુજબ, આ ઈમારત બહું જૂની અને જર્જરિત હતી. લાંબા સમયથી આ મકાનમાં કોઈ રહેતું ન હતું. મકાનની આસપાસ રહેનારા લોકોનું કહેવું હતું કે, મહાનગરપાલિકા દ્વારા આ અંગે સૂચના પણ આપવામાં આવી હતી. જોકે મકાન સંપૂર્ણ ખાલી હતું. જેથી કોઈ જાનહાનિ થઈ નથી. જો મકાનમાં લોકો હોત તો મોટી દુર્ઘટના સર્જાઈ હોત.
આપણ વાંચો: બેંગલૂરુના ક્રિકેટપ્રેમીઓની દુર્ઘટનાથી મારું હૃદય કંપી ઉઠ્યુંઃ પીએમ મોદી
ઘટનાની માહિતી મળતા જ ફાયર બ્રિગેડની ટીમ અને સ્થાનિક વહીવટીતંત્ર તાત્કાલિક ઘટનાસ્થળે પહોંચ્યું હતું. ફાયર બ્રિગેડની ટીમ દ્વારા ધરાશાયી થયેલી ઈમારતના કાટમાળની નજીક કોઈ ન જઈ શકે તે માટે ચારે બાજુથી વિસ્તારને ઘેરી લીધો હતો. જેથી કાટમાળની આસપાસ કોઈ જાય નહી. કાટમાળના કારણે આસપાસની ઇમારતોને વધુ નુકસાન થયું ન હતું અને પરિસ્થિતિ ટૂંક સમયમાં કાબુમાં આવી ગઈ હતી.
રાજકોટ મહાનગરપાલિકાએ ઘટના બાદ આ વિસ્તારમાં આવેલી અન્ય જર્જરીત ઈમારતોનો સર્વે શરૂ કરી દીધો છે. જેથી ભવિષ્યમાં આવી ઘટનાઓ ન ઘટે. લોકોને પણ અપીલ કરવામાં આવી છે કે જો તમારી આસપાસ કોઈ આવી ઈમારત છે, તો તેની જાણ કરે. જેથી સમયસર કાર્યવાહી કરી શકાય.