રાજકોટમાં 12 સાયન્સની વિદ્યાર્થિનીએ કરી આત્મહત્યા, રૂમમાંથી મળી આવી સ્યૂસાઈડ નોટ
રાજકોટ: રાજકોટની ડાલીબાઈ કન્યા છાત્રાલયમાં રહી લાલબહાદુર શાસ્ત્રી કન્યા વિદ્યાલયમાં ધોરણ 12 સાયન્સમાં અભ્યાસ કરતી વિદ્યાર્થિનીએ આત્મહત્યા કરી હતી. 16 વર્ષીય રિંકલ મનસુખભાઈ ગાબુ મૂળ ચોટીલાના તાજપર ગામની છે. અત્યારે તે રાજકોટની ડાલીબાઈ કન્યા છાત્રાલયમાં રહી લાલબહાદુર શાસ્ત્રી કન્યા વિદ્યાલયમાં અભ્યાસ કરતી હતી. રિંકલે કોઈ અગમ્ય કારણોસર હોસ્ટેલના રૂમમાં ગળાફાંસો ખાઈ આત્મહત્યા કરી લીધી હતી. પોલીસે આ કેસમાં તપાસ શરૂ કરી દીધી છે.
16 વર્ષીય રિંકલે હોસ્ટેલના રૂમમાં આત્મહત્યા કરી
રિંકલ હોસ્ટેલમાં નવેક રૂમ પાર્ટનર સાથે બેઠી હતી. રાત્રે 10:30 વાગ્યા આસપાસ તે સુવા જતી રહી હતી. મોડી રાત્રે બધી રૂમ પાર્ટનર સુઈ ગયા બાદ તેજ રૂમમાં તેણે બારીના એંગલ સાથે ચુંદડી બાંધી ગળાફાંસો ખાઈ લીધો હતો. થોડી વાર પછી તેની રૂમ પાર્ટનર જાગી ત્યારે તેણે રિંકલ લટકતી જોઈ હતી. જેથી આ મામલે ગૃહમાતાને જાણ કરી હતી. ત્યારબાદ 108ના તબીબે દ્વારા રિંકલને સ્થળ પર મૃત જાહેર કરવામાં આવી હતી.
પોલીસ તપાસમાં રિંકલની સ્યૂસાઈડ નોટ મળી આવી
પોલીસ દ્વારા હોસ્ટેલની તપાસ કરવામાં આવી ત્યારે રિંકલની સ્યૂસાઈડ નોટ મળી આવી હતી. જેમાં તેણે લખ્યું હતું કે, મારાથી કોઈને દુઃખ પહોંચ્યું હોય તો મને માફ કરશો, મારા આત્માને શાંતિ મળે. આ સ્યૂસાઈડ નોટ સાથે સ્કૂલનો રજા રિપોર્ટ પણ લખેલો હતો. જોકે સ્યૂસાઈડ નોટ પરથી આપઘાતનું કારણ જાણવા મળ્યું નથી. આ પહેલા રિંકલે હોસ્ટેલના નંબર પરથી તેના પિતા સાથે વાત કરી ખબર-અંતર પૂછયા હતા. પરંતુ પિતા સાથે વાત થઈ ન હતી. આખરે શા કારણે રિંકલે આત્મહત્યા કરી તે મામલો પોલીસ દ્વારા તપાસ શરૂ કરી દેવામાં આવી છે.
