મોરબી: મોરબીમાં પાનેલી રોડ પર સિરામિક કારખાના બહાર ત્રણ બાળકો રમતા રમતા પાણી ભરેલા ખાડામાં પડી જતા પાણીમાં ડૂબી જતા ત્રણ માસૂમ બાળકોના મોત થયા હતા. બે સગા ભાઈ-બહેન સહીત ત્રણ માસૂમ બાળકોના મોતને પગલે શ્રમિક પરિવાર પર આભ ફાટ્યું હતું અને હૈયાફાટ રુદનના દ્રશ્યો જોવા મળ્યા હતા.
બાળકો ખાડામાં પડી ગયા બાદ પણ કોઈને જાણ ના થઈ
મોરબીના પાનેલી રોડ પર આવેલ આરકોસ માઈક્રોન કારખાના બહાર બપોરના સમયે ત્રણ બાળકો રમતા હતા અને રમતા રમતા નજીક આવેલ પાણી ભરેલા ખાડામાં પડી ગયા હતા.
શ્રમિક પરિવારના બાળકો પ્રતિજ્ઞા ભુરુભાઈ જમરા (ઉંમર વર્ષ 5), કુલદીપ કૈલાસભાઈ દાવર (ઉંમર વર્ષ 6) અને ખુશ્બુ કૈલાસભાઈ દાવર (ઉંમર વર્ષ 4) એમ ત્રણ બાળકોના મોત નીપજ્યા હતા. આ ત્રણેય બાળકો મૂળ મધ્યપ્રદેશના વતની એક શ્રમિક પરિવારના હતા. બાળકો ખાડામાં પડી ગયા બાદ ઘણા સમય સુધી કોઈને જાણ ના હતી અને પાણીમાં ડૂબી જતા બાળકોના મૃત્યુ નીપજ્યું હોવાનું પ્રકાશમાં આવ્યું હતું.
છેલ્લા સાત વર્ષથી આ પરિવાર મોરબીમાં મજૂરી કામ કરે છે
મૃતક બાળકો મૂળ મધ્યપ્રદેશના વતની છે, તેમનો પરિવાર છેલ્લા સાતેક વર્ષથી મોરબીમાં રહીને કામ કરે છે. કુલદીપ અને ખુશ્બુ એમ બે સગા ભાઈ બહેનના કરુણ ઘટનામાં મોત થયા છે. બે પરિવારના ત્રણ માસૂમ બાળકોના અકાળે મૃત્યુને કારણે શ્રમિક પરિવાર પર આભ ફાટ્યું હતું. આ સમગ્ર બનાવને પગલે વિસ્તારમાં સોપો પડી ગયો હતો. પરિવારમાં પણ ભારે શોકનો માહોલ જોવા મળ્યો હતો.
આ પણ વાંચો…મોરબીના રવાપરમાં મહિલાઓએ થાળી વગાડી ચક્કાજામ કર્યો, જાણો શું છે મામલો
