ભાવનગર જિલ્લા NSUI પ્રમુખને સસ્પેન્ડ કરવામાં આવ્યો હોવાની વિગતો પ્રકાશમાં આવી છે. ગઈકાલે IPO ફ્રોડ કેસમાં અમદાવાદ સાયબર ક્રાઇમ બ્રાન્ચે ભાવનગર જિલ્લા NSUI પ્રમુખ અર્શમાન બલોચની ધરપકડ કરી હતી. ત્યારે તાત્કાલિક કોંગ્રેસે તેની સામે કાર્યવાહી કરી છે. ફ્રોડ કેસમાં ધરપકડ બાદ જિલ્લા કોંગ્રેસ કમિટીએ તાત્કાલિક કાર્યવાહી હાથ ધરી હતી અને જિલ્લા NSUI પ્રમુખની ધરપકડ કરી છે. સાયબર ફ્રોડ કેસમાં પ્રાથમિક તપાસમાં પૂરતા પુરાવા મળ્યા હોવાથી કોંગ્રેસ કમિટીએ પ્રમુખને સસ્પેન્ડ કરવાનો નિર્ણય લીધો હતો. આ ઉપરાંત કોંગ્રેસ જણાવ્યુ હતુ કે, તપાસ પૂરી ન થાય ત્યાં સુધી સંસ્થામાં તમામ જવાબદારી કે હોદ્દા પરથી દૂર કર્યા છે.
કોંગ્રેસ કમિટીએ પ્રમુખને સસ્પેન્ડ કરવાનો નિર્ણય લીધો
અમદાવાદ શહેરની સાયબર ક્રાઇમ શાખાએ ભાવનગર જિલ્લા એનએસયુઆઈના પ્રમુખ અર્શમાન ખાન જોરાવર ખાન શુક (બલુચ) ની ધરપકડ કરી હતી, જે કથિત રીતે આંતરરાજ્ય સાયબર છેતરપિંડીના ગુનામાં સંકળાયેલો છે. અર્શમાનએ કથિત રીતે આંતરરાષ્ટ્રીય સાયબર ક્રાઇમ સિન્ડિકેટને બેંક ખાતા પૂરા પાડ્યા હતા અને હવાલા વ્યવહારો દ્વારા ભારે કમિશન મેળવ્યું હતું. 107 ફ્રેન્કલિન ટેમ્પલટન ઇન્વેસ્ટમેન્ટ સ્ટ્રેટેજી નામના નકલી વોટ્સએપ ઇન્વેસ્ટમેન્ટ ગ્રુપમાં જોડાયા બાદ અમદાવાદના એક રહેવાસી સાથે રૂપિયા 50.50 લાખની છેતરપિંડી થયાની ફરિયાદની તપાસ દરમિયાન આ ધરપકડ કરવામાં આવી હતી.
આઈપીઓ અને શેરમાં રોકાણ કરવા માટે લોકોને લાલચ આપતો
ફેલિસિટી વોલ્શ, જેફ મેસન અને ફ્રેન્કલિન ટેમ્પલટન (બી-એચએનઆઈ) નામથી કાર્યરત વ્યક્તિઓએ પીડિતને છેતરપિંડીવાળી એપ ડાઉનલોડ કરવા અને આઈપીઓ અને શેરમાં રોકાણ કરવા માટે લલચાવ્યા હતા. પીડિતે પચાસ લાખ રૂપિયાથી વધુ ઘણા બેંક ખાતાઓમાં ટ્રાન્સફર કર્યા હતા, જેમાંથી ફક્ત રૂપિયા 03 લાખ પરત મળ્યા હતા.
પોલીસે પૈસાની તપાસ કરતા, તેમને જાણવા મળ્યું કે વૈદિક ભોગિનાલાલ જશુભાઈના બેંક ખાતામાં રૂપિયા 02,99,000 જમા કરવામાં આવ્યા હતા. તેણે તપાસકર્તાઓને જણાવ્યું કે તેણે જુનેદ મકુફભાઈ નામના વ્યક્તિને ચેક આપ્યો હતો, જેણે કહ્યું કે તેણે આંગડિયા રૂટ દ્વારા અર્શમાનને પૈસા આપ્યા હતા. આ માહિતી સાથે પોલીસ ભાવનગર પહોંચી હતી અને અર્શમાનની ધરપકડ કરી હતી.
આરોપી બાંધકામ અને સોનાના વેપારમાં સંકળાયેલો છે
અર્શમાન બાંધકામ અને સોનાના વેપારનો વ્યવસાય કરે છે અને રાજકીય વર્તુળોમાં ભાવનગર જિલ્લા નેશનલ સ્ટુડન્સ્ટ્સ યુનિયન ઓફ ઈન્ડિયા (એનએસયુઆઈ), જે કોંગ્રેસની વિદ્યાર્થી પાંખી છે, તેના પ્રમુખ તરીકે જાણીતો છે. વધારે વિગતે વાત કરવામાં આવે તો, અર્શમાનના દુબઈ અને ચીન સ્થિત આંતરરાષ્ટ્રીય સાયબર ક્રાઈમ નેટવર્ક સાથે સંબંધો હતા.
પોલીસ સૂત્રોના જણાવ્યા અનુસાર તેણે અલગ અલગ વ્યક્તિઓના 11 બેંક ખાતાઓ માટે દસ્તાવેજો પૂરા પાડ્યા હતા અને તે સારું કમિશન કમાતો હતો. તેની મોડસ ઓપરેન્ડીમાં કેટલાક નાણાને ક્રિપ્ટોકરન્સીમાં કન્વર્ટ કરવાનો પણ સમાવેશ થતો હતો અને પછી તેને વિદેશી ગેંગને ટ્રાન્સફર કરતો હતો.
27 સાયબર ક્રાઇમ ફરિયાદોમાં આરોપી સામેલ હોવાની શંકા
ગુજરાત, તમિલનાડુ, રાજસ્થાન, તેલંગાણા અને આંધ્રપ્રદેશમાં નોંધાયેલી 27 સાયબર ક્રાઇમ ફરિયાદોમાં તેની સંડોવણી બહાર આવી હોવાનું પણ પોલીસ સૂત્રો પાસેથી જાણવા મળ્યું હતું. પોલીસે ગુનામાંથી મળેલી રકમમાંથી એકઠી કરેલી સંપત્તિ પણ જપ્ત કરી છે, જેમાં બીએમડબલ્યુ, ફોર્ચ્યુનર, થાર અને ઇનોવા જેવી અનેક લક્ઝરી કારનો સમાવેશ થાય છે. આ સાથે તેણે થોડા મહિનાઓમાં જ મોટું રોકાણ કર્યું હોવાનું પણ પોલીસ સૂત્રોએ જણાવ્યું હતું. આ કેસમાં હજુ વધારે લોકોની સંડોવણી બહાર આવી શકે તેમ છે, તેમ પણ પોલીસે જણાવ્યું હતું.
