પાંચ નોરતા તો નીકળી ગયા, પણ આવતીકાલે વરસાદ રમઝટ બોલાવે તેવા એંધાણઃ જાણો હવામાન ખાતાની આગાહી

અમદાવાદ: નવરાત્રિનો તહેવાર ચાલી રહ્યો છે. ઠેર ઠેર ઉત્સાહ પૂર્વક ગરબાની રમઝટ ચાલી રહી છે. આ વચ્ચે હવામાન વિભાગે ફરી એક વખત ગરબાના રંગમાં ભંગ પડવાની આગાહી વ્યક્ત કરી છે. હવામાન વિભાગ પ્રમાણે ગુજરાતમાં આગામી પાંચ દિવસ રાજ્યના વિવિધ ભાગોમાં ભારે વરસાદની શક્યતા વ્યક્ત કરી છે. જે નવરાત્રિના બાકીના દિવસોની મજા બગાડી શકે છે.

રાજ્યમાં ભારે વરસાદની આગાહી
હવામાન વિભાગે જણાવ્યું છે કે આજે 27 સપ્ટેમ્બરના દક્ષિણ ગુજરાતના સાત જિલ્લાઓ છોટાઉદેપુર, નર્મદા, સુરત, તાપી, નવસારી, વલસાડ, ડાંગ તેમજ દમણ અને દાદરા-નગર હવેલીમાં યલો એલર્ટ સાથે ભારે વરસાદની આગાહી વ્યક્ત કરી હતી.

આ ઉપરાંત, માછીમારોને આગામી પાંચ દિવસ સુધી દરિયો ન ખેડવાની સૂચના આપવામાં આવી છે. જ્યારે 28 સપ્ટેમ્બરના નવરાત્રિના સાત દિવસ એટલે કે છઠ્ઠા નોરતે રાજ્યના અનેક જિલ્લાઓમાં રેડ એલર્ટ જાહેર કરવામાં આવ્યું છે, જેમાં સુરત, નવસારી, વલસાડ, ડાંગ, દમણ અને દાદરા-નગર હવેલીમાં અતિ ભારે વરસાદની શક્યતા છે.

આ ઉપરાંત છોટાઉદેપુર, નર્મદા, તાપી, ડાંગ, ભરૂચ, ભાવનગર અને અમરેલીમાં ઓરેન્જ એલર્ટ સાથે ભારે વરસાદની આગાહી વ્યક્ત કરવામાં આવી છે. ઉલ્લેખનીય છે કે, અમદાવાદમાં આજે હળવા વરસાદની શક્યતા છે, પરંતુ આગામી બે દિવસ ભારે વરસાદની આગાહીને ધ્યાને લઈને સ્થાનિક વહીવટી તંત્રને સતર્ક રહેવાનું જણાવવામાં આવ્યું છે.

ચોમાસાની વિદાય
રાજ્યમાં ચોમાસાની વિદાયની શરૂઆત થઈ ગઈ છે, પરંતુ આ સિઝનમાં 111 ટકા સરેરાશ વરસાદ નોંધાયો છે. જેમાં સૌથી વધુ કચ્છમાં 136 ટકા, ઉત્તર ગુજરાતમાં 119 ટકા, પૂર્વ-મધ્ય ગુજરાતમાં 113 ટકા, સૌરાષ્ટ્રમાં 96 ટકા અને દક્ષિણ ગુજરાતમાં 117 ટકા વરસાદ વરસ્યો છે. આજે 27 સપ્ટેમ્બરના રોજ તાલાલામાં નવરાત્રિ વચ્ચે મેઘરાજાની સવારી આવી પહોંચી હતી. અહીં 15 મિનિટમાં અડધો ઈંચ વરસાદ નોંધાયો છે.

આ પણ વાંચો…વડોદરામાં ગરબાના વધુ બે કિસીંગ વીડિયો વાયરલ થયા, એક છે દુષ્કર્મનો આરોપી