આણંદ અમૂલ ડેરીની ચૂંટણી: 4 બેઠકો બિનહરીફ, હવે 9 બેઠકો માટે 22 ઉમેદવારો વચ્ચે જંગ…
આણંદ: શહેર અમૂલ ડેરીની નિયામક મંડળની 13 બેઠકો માટે ચૂંટણી પ્રક્રિયા ચાલી રહી છે, જેમાં 10 સપ્ટેમ્બર, 2025ના રોજ મતદાન યોજાશે. આજે ઉમેદવારી પત્રો પરત ખેંચવાના છેલ્લા દિવસે 16 પત્રો પાછા ખેંચાયા.
જેના પરિણામે ચાર બેઠકો બિનહરીફ થઈ છે. હવે બાકીની નવ બેઠકો માટે 22 ઉમેદવારો વચ્ચે રસાકસી થશે, જેમાં ભાજપ અને અપક્ષ ઉમેદવારો વચ્ચે રોમાંચક સ્પર્ધા જોવા મળશે.
અમૂલ ડેરીની ચૂંટણી પ્રક્રિયા 28 ઓગસ્ટથી શરૂ થઈ હતી. 29 ઓગસ્ટે ઉમેદવારી પત્રોની ચકાસણી દરમિયાન 13 પત્રો રદ થયા, અને 42 ઉમેદવારોના પત્રો માન્ય જાહેર થયા. આજે, 31 ઓગસ્ટે, 16 ઉમેદવારોએ પોતાના ફોર્મ પરત ખેંચ્યા.
જેનાથી 26 ઉમેદવારો માન્ય રહ્યા. બાલાસિનોર, ઠાસરા, મહેમદાવાદ અને વીરપુર બેઠકો બિનહરીફ થઈ, જ્યારે નવ બેઠકો માટે 10 સપ્ટેમ્બરે બેલેટ પેપર દ્વારા ચૂંટણી યોજાશે. આણંદ બેઠક પર પાંચ અને માતર બેઠક પર ત્રણ ઉમેદવારો વચ્ચે ટક્કર થશે.
આણંદ બેઠકનો રોમાંચક જંગ
આણંદ બેઠક પર અમૂલના વાઇસ ચેરમેન કાંતિભાઈ સોઢા પરમાર માટે આ ચૂંટણી પ્રતિષ્ઠાનો સવાલ બની ગઈ છે. કોંગ્રેસ છોડીને ભાજપમાં જોડાયેલા કાંતિભાઈની સામે ચાર મજબૂત અપક્ષ ઉમેદવારો છે, અને 107 મતદારો ધરાવતી આ બેઠક પર ભારે ઉત્તેજના જોવા મળશે. જો કાંતિભાઈ આ બેઠક હારી જશે, તો તેમના રાજકીય ભવિષ્ય પર પ્રશ્નો ઊભા થઈ શકે છે.
પેટલાદ બેઠક પર ભાજપની પ્રતિષ્ઠા
ભાજપ માટે મહત્વની ગણાતી પેટલાદ બેઠક પર KCC બેંકના ચેરમેન તેજસ પટેલના પત્ની બીનાબેન પટેલ ઉમેદવાર છે. આ બેઠકને બિનહરીફ કરવાના ભાજપના પ્રયાસો નિષ્ફળ રહ્યા, અને હવે અહીં ચૂંટણીનો રોમાંચક જંગ થશે. સાત બેઠકો પર ભાજપ અને અપક્ષ ઉમેદવારો વચ્ચે સીધી ટક્કર જોવા મળશે, જે આ ચૂંટણીને ખૂબ જ રસપ્રદ બનાવશે.
