અમદાવાદ: ગુજરાતમાં વરસાદના જોરમાં આંશિક ઘટાડો થયો છે, છતા વરસાદી માહોલ યથાવત્ છે. ગુજરાતમાં આગામી દિવસોમાં ભારે વરસાદની શકયતાઓ હોવાના આગાહી કરવામાં આવી છે. હવામાન વિભાગ દ્વારા જાહેર કરાયેલા જિલ્લાવારની આગાહી પ્રમાણે શુક્રવાર 25 જુલાઈ એટલે કે આજે રાજ્યના અનેક જિલ્લામાં ગાજવીજ સાથે મધ્યમથી ભારે વરસાદ પડી શકે તેવી શક્યતાઓ છે. ખાસ કરીને દક્ષિણ ગુજરાતના જિલ્લાઓમાં વરસાદની વધારે શક્યતાઓ વર્તાઈ રહી છે. વરસાદની વાત કરવામાં આવે તો ગુજરાતમાં આ સીઝનનો 50 ટકાથી વધારે વરસાદ થઈ ગયો છે. જેમાં સૌથી વધારે વરસાદ દક્ષિણ ગુજરાતમાં નોંધાયો છે. ત્યારબાદ સૌરાષ્ટ્રમાં સારો એવો વરસાદ નોંધાયો છે. આ વચ્ચે ગુજરાતમાં 24 કલાકમાં 91 તાલુકામાં હળવાથી મધ્યમ વરસાદ નોંધાયો હતો.
સ્ટેટ ઇમરજન્સી ઓપરેશન સેન્ટર (SEOC), ગાંધીનગરના આંકડા અનુસાર, 23 જુલાઈ 2025, સવારે 6 વાગ્યાથી 24 જુલાઈ, સવારે 6 વાગ્યા સુધીના 24 કલાકમાં રાજ્યના 91 તાલુકામાં વરસાદ નોંધાયો. સૌથી વધુ વરસાદ વલસાડ જિલ્લાના ધરમપુરમાં 2.13 ઇંચ વરસાદ વરસ્યો હતો. આ ઉપરાંત વલસાડના પારડી, તાપીના વ્યારા, તાપીના વાલોદમાં પોણા બે ઈંચ વરસાદ નોંધાયો હતો. જ્યારે સુરતના મહુવામાં દોઢ ઈંચ વરસાદ ખાબક્યો હતો. તો નવસારીના ખેરગામ, વલસાડના કપરાડામાં સવા ઈંચ જેટલો વરસાદ નોંધાયો હતો. ગુજરાતના 83 તાલુકામાં એક ઈંચ નીચે વરસાદ નોંધાયો છે. જેમાં 31 તાલુકામાં વાંછટીયો વરસાદ નોંધવામાં આવ્યો હતો.
રાજ્યમાં 24 જુલાઈએ સાવરે 6 વાગ્યાથી 10 વાગ્યા સુધીમાં ગુજરાતમાં વાંછટીયો વરસાદ નોંધાયો હતો. જ્યાં 26 તાલુકામાં અડધા ઈંચથી નીચે વરસાદ વરસ્યો હતો. જેમાં નવસારીના જલાલપોર વિસ્તારમાં સારો વરસાદ જોવા મળ્યો હતો. આજે સવારથી દક્ષિણ ગુજરાત અને સૌરાષ્ટ્રમાં વરસાદી મોહલ જોવા મળ્યો હતો.
હવામાન વિભાગની આગાહી
હવામાન વિભાગે 24 જુલાઈ, ગુરુવાર માટે દક્ષિણ ગુજરાતના 8 જિલ્લાઓ – છોટા ઉદેપુર, નર્મદા, ડાંગ, તાપી, નવસારી, વલસાડ, દમણ અને દાદરા નગર હવેલીમાં ભારે વરસાદની આગાહી કરી છે. આ આગાહીથી રાજ્યના જળાશયોમાં પાણીની આવક વધવાની શક્યતા છે, જે ખેતી અને પીવાના પાણી માટે ફાયદાકારક રહેશે.
રાજ્યમાં ચોમાસાની સરેરાશ 54.67 ટકા વરસાદ નોંધાયો છે. નર્મદા ડેમ 58.19 ટકા ભરાયો છે, જ્યારે 206 જળાશયોમાંથી 28 સંપૂર્ણ, 62 જળાશયો 70-100 ટકા, 41 જળાશયો 50-70 ટકા, 37 જળાશયો 25-50 ટકા અને 38 જળાશયો 25 ટકાથી ઓછા ભરાયેલા છે. વરસાદને કારણે 48 ડેમ પર હાઇ એલર્ટ, 17 પર એલર્ટ અને 25 પર ચેતવણી જાહેર કરવામાં આવી છે.
આ પણ વાંચો…ગુજરાતના મોટા ભાગના વિસ્તારોમાં આજે હળવાથી મધ્યમ વરસાદની શક્યતા
