વોન્ટેડ ગુનેગાર પાસેથી 5 લાખની લાંચ માંગનારો કોન્સ્ટેબલ ઝબ્બે

અમદાવાદ: ભ્રષ્ટાચારની ઘટનાઓ સામે લાલ આંખ કરીને એન્ટિ કરપ્શન બ્યૂરો (ACB) કાર્યવાહી કરી રહી છે. ત્યારે અમદાવાદનાં ચાંદખેડામાં પોલીસ કોન્સ્ટેબલને એસીબીએ લાંચ લેતો ઝડપી પાડ્યો હતો. પોલીસે વોન્ટેડ કરેલા આરોપીને તે ગુનામાં રજુ કરવા તેમજ પાસા નહી કરવા અંગે પાંચ લાખની લાંચ માંગી હતી.

ચાંદખેડા પોલીસ સ્ટેશનના કોન્સ્ટેબલે માંગી હતી લાંચ

પ્રાપ્ત વિગતો અનુસાર અમદાવાદનાં ચાંદખેડા પોલીસ સ્ટેશનમાં પ્રોહીબીશનના ગુનામાં ફરીયાદીને વોન્ટેડ જાહેર કરવામાં આવ્યો હતો. આથી ચાંદખેડા પોલીસ સ્ટેશનનાં કોન્સ્ટેબલ રજનીશ હરીભાઇએ તે ગુનામાં રજુ કરવા તેમજ પાસા એક્ટની કલમો નહિ લાગુ કરવા માટે 5,30,000 રૂપિયાની લાંચ માંગી હતી. જો કે ફરિયાદીએ હાલ તેની પાસે માત્ર 2 લાખ રૂપિયા હોય બાકીનાં પૈસા પછીથી આપવા જણાવ્યું હતું.

ACBએ ગોઠવ્યું હતું છટકું

આથી ચાંદખેડાનાં નવા સી.જી.રોડ ચાર રસ્તા પર ACBએ ટ્રેપ કરી હતી. જેમાં ચાંદખેડા પોલીસ સ્ટેશનનાં કોન્સ્ટેબલ રજનીશ હરીભાઇએ ફરિયાદીને લાંચની રકમ આપવા બોલાવ્યો હતો અને આ દરમિયાન પોલીસ કોન્સ્ટેબલનાં કહેવાથી આ ગુનાનાં અન્ય એક આરોપી મીતુલ ઉર્ફે મોન્ટુ રાજુભાઇ ગોહીલે લાંચની રકમ લીધી હતી.

આ પણ વાંચો : દારુના કેસમાં ફસાવવાની ધમકીઃ અમદાવાદમાં હેડ કોન્સ્ટેબલ લાંચ લેતા ઝડપાયો

ખોટા કેસની ધમકી આપી માંગી હતી લાંચ

થોડા દિવસ પહેલા જ નારોલ પોલીસ સ્ટેશનનાં હેડ કોન્સ્ટેબલને ACBએ લાંચ લેતા ઝડપી લીધો હતો. કેસની વિગતો અનુસાર ફરિયાદીએ છેલ્લા ચારેક માસથી તેમણે દારૂનો ધંધો બંધ કરી દીધો હતો. આરોપી નારોલ પોલીસ સ્ટેશનનાં અનાર્મ હેડ કોન્સ્ટેબલ તરીકે ફરજ બજાતવતા વનરાજસિંહ વલકુભાઈ વાળાએ ફરીયાદી પાસે રૂ.2500ની માંગણી કરી હતી. જો પૈસા ના આપે તો દારૂના ખોટા કેસ કરવાની ધમકી આપી હતી.

આ પણ વાંચો : દહેગામમાં નાયબ મામલતદાર લાંચ લેતા ઝડપાયોઃ એસબીએ કરી મોટી કાર્યવાહી

ફરજ મોકુફ નાયબ મામલતદારને પણ ACBએ ઝડપ્યા

માર્ચ મહિનામાં ગાંધીનગર જિલ્લાના દહેગામમાં લાંચ રૂશ્વત વિરોધી બ્યુરો (ACB)એ એક મોટી કાર્યવાહી કરી હતી અને દહેગામ મામલતદાર કચેરીનાં ફરજ મોકુફ નાયબ મામલતદાર પ્રવિણભાઇ પરમાર અને ટાઇપીંગ કરનારા નિતેષકુમાર રાજન નામના બે શખ્સને રંગે હાથે ઝડપી લીધા હતા. ખેતીની જમીનમાં વેચાણ નોંધો રદ કરી આપવાના અને અપીલના કાગળો મેળવી આપવા લાંચની માંગ કરી હતી.