અમદાવાદઃ અમદાવાદના નરોડામાં 2 વર્ષ અગાઉ સગીરાના અપહરણની ફરિયાદ નોંધાઈ હતી જે મામલે પોલીસે ગુનો નોંધ્યો હતો. આરોપી ઘણાં સમયથી નાસતો ફરતો હતો. પરિવારે આપેલી ફરિયાદ બાદ પોલીસને એક યુવક પર શંકા ગઈ હતી. પરંતુ તે યુવક ક્યાં છે તેની કોઈ જાણકારી પોલીસ પાસે નહોતી. આરોપીને ઝડપી પાડવા માટે પોલીસે એક અલગ રસ્તો અપનાવ્યો હતો. પોલીસ બીએલઓ બનીને યુવકના પિતાને મળી અને ઇલેક્શન કાર્ડને લગતી વાતચીત કરી પિતા પાસેથી પુત્રનો નંબર મેળવી લીધો હતો. આ નંબરના આધારે પોલીસે ફરાર થયેલા યુવક રોહિત ઠાકોરને પણ શોધી કાઢ્યો છે.
સગીરાના પિતાએ પોલીસ ફરિયાદ નોંધાવી હતી
અમદાવાદ પોલીસે યુવકની ધરપકડ કરીને સગીરાને મુક્ત કરાવી છે. અમદાવાદના નરોડામાં રહેતી સગીરાને અજાણ્યો વ્યક્તિ લગ્ન કરવાના બહાને ભગાડીને લઈ ગયો હતો. જે મામલે સગીરાના પિતાએ નરોડા પોલીસ સ્ટેશનમાં ફરિયાદ નોંધાવી હતી. સગીરાના પિતાને દહેગામના રોહિત ઠાકોર પર શંકા હતી જેથી તેમને પોલીસને પણ જાણ કરી હતી. પરંતુ તેનું કોઈ લોકેશન કે વિગતો પોલીસ પાસે નહોતી. પરંતુ પોલીસે છટકું ગોઠવીને આરોપીની ધરપકડ કરી લીધી હતી. ખાસ કરીને વાત કરવામાં આવે તો, પોલીસ દ્વારા હવે આરોપી સામે આગળની કાર્યવાહી હાથ ધરી દેવામાં આવી છે.
સગીરાને મેડિકલ હોસ્પિટલ મોકલવામાં આવી
કાર્યવાહીની વાત કરવામાં આવે તો, રોહિતનો નંબર મળતા પોલીસે નંબર વેરીફાઈ કરી લોકેશન મેળવ્યું હતું. લોકેશનના આધારે પોલીસને ખબર પડી કે, આરોપી મહેસાણાના શોભાસણ ગામમાં રહી રહ્યો છે. જેથી પોલીસની તાત્કાલિક એક ટીમ મહેસાણા પહોંચી હતી. લોકેશન પરથી સગીરાને ભગાડી જનાર રોહિત અને સગીરા મળી આવ્યા હતા. આરોપીની ધરપકડ કરવામાં આવી છે. જ્યારે સગીરાને મેડિકલ હોસ્પિટલ મોકલવામાં આવી છે. મેડિકલ રિપોર્ટ આવ્યા બાદ આગળની કાર્યવાહી કરવામાં આવશે.
આ પણ વાંચો…મહેસાણાઃ સુદાસણા ગામના BLOનું નિધન, રાજ્યમાં ચૂંટણી સંબંધિત કર્મચારીના મોતની પાંચમી ઘટના
