ગુજરાતમાં મેઘરાજાએ લીધો વિરામ! છૂટાછવાયા સ્થળોએ હળવાથી મધ્યમ વરસાદની આગાહી
અમદાવાદઃ ગુજરાતમાં છેલ્લા કેટલાક દિવસથી અનેક વિસ્તારમાં ભારે વરસાદ નોંધાયો હતો. જોકે, અત્યારે વરસાદે વિરામ લીધો હોય તેવું લાગી રહ્યું છે. હવામાન વિભાગ દ્વારા હળવાથી મધ્યમ વરસાદની આગાહી કરવામાં આવી છે. હળવાથી મધ્યમ વરસાદની આગાહી હોવાના કારણે આગામી બે દિવસ એટલે કે 2જી ઓગસ્ટ સુધી માછીમારોને દરિયો ના ખેડવા માટે આદેશ આપવામાં આવ્યો છે. અત્યાર સુધીમાં કુલ સીઝનનો સામાન્ય કરતાં 30 ટકા વધુ વરસાદ તો નોંધાઈ ગયો છે. જ્યારે હજી તો ચોમાસું શરૂ થયું છે. આગામી દિવસોમાં વરસાદ વધારે આવી શકે છે.
આ જિલ્લાઓમાં વરસાદની આગાહી કરવામાં આવી
હવામાન વિભાગની આગાહી પ્રમાણે ગુજરાતમાં ખેડા, આણંદ, બનાસકાંઠા, પાટણ, અરવલ્લી, છોટા ઉદેપુર, નર્મદા, ભરૂચ, સુરત, ડાંગ, ગાંધીનગર, પંચમહાલ, જામનગર, પોરબંદર, અમદાવાદ, દાહોદ, મહેસાણા, સાબરકાંઠા, સુરેન્દ્રનગર, રાજકોટ, મહીસાગર, તાપી, નવસારી, વલસાડ, જૂનાગઢ, અમરેલી, દ્વારકા, ગીર સોમનાથ, બોટાદ, કચ્છ, ભાવનગર, મોરબીમાં માત્ર હળવા વરસાદની આગાહી કરવામાં આવી છે.
ગુજરાતમાં અત્યારે 49 ડેમ હાઈ એલર્ટ પર
જળાશયોની વાત કરવામાં આવે તો, અત્યારે સરદાર સરોવર નર્મદા ડેમ એલર્ટ પર હોવાનું જાણવા મળ્યું છે. એટલું જ નહીં પરંતુ ડેમમાં પાણીનું સ્તર મહત્તમ થઈ જતા આજે પાંચ દરવાજા પણ ખોલવામાં આવી શકે છે. અન્ય ડેમોની વાત કરવામાં આવે તો, ગુજરાતના 207 ડેમમાં ઉત્તર ગુજરાતના 15 ડેમમાં 60.31, મધ્ય ગુજરાતના 17 ડેમમાં 69.21, દક્ષિણ ગુજરાતના 13 ડેમમાં 61.51, કચ્છના 20 ડેમમાં 55.69 અને સૌરાષ્ટ્રના 141 ડેમમાં 65.95 ટકા પાણી ભકાયું છે. જેથી અત્યારે 49 ડેમ હાઈ એલર્ટ, 24 ડેમ એલર્ટ અને 19 ડેમને વોર્નિંગ પર રાખવામાં આવ્યા હોવાનું જાાણવા મળ્યું છે.
આપણ વાંચો: સરદાર સરોવર નર્મદા ડેમ 70% ભરાયો, આજે ડેમના 5 ગેટ ખોલવામાં આવે તેવી શક્યતા…
