વાઇબ્રન્ટ ગુજરાત: માંડલ-બેચરાજી SIRમાં ઇન્ફ્રાસ્ટ્રક્ચર પ્રોજેક્ટ્સ પૂરજોશમાં

અમદાવાદઃ માંડલ બેચરાજી સ્પેશિયલ ઇન્વેસ્ટમેન્ટ રિજન ખાતે વાઇબ્રન્ટ ગુજરાત રિજનલ કોન્ફરન્સ (વીજીઆરસી) પહેલાં ઇન્ફ્રાસ્ટ્રક્ચર પ્રોજેક્ટ્સનું કામ પુરજોશમાં ચાલી રહ્યું છે. આ કાર્યક્રમ માટે માંડલ બેચરાજી સ્પેશિયલ ઇન્વેસ્ટમેન્ટ રિજન ડેવલપમેન્ટ ઑથોરિટી વિકાસલક્ષી ઇન્ફ્રાસ્ટ્રક્ચર પ્રોજેક્ટ્સને વેગ આપી રહી છે.

આ મહત્વાકાંક્ષી પ્રોજેક્ટ્સ ઉત્તર ગુજરાતના ઔદ્યોગિક ક્ષેત્રને વધુ મજબૂત બનાવશે, જે કનેક્ટિવિટી, ક્ષમતા સાથે રોકાણને વેગ આપશે. નોંધનીય છે કે, આગામી 9-10 ઑક્ટોબર, 2025ના રોજ મહેસાણામાં ઉત્તર ગુજરાત માટેની વાઇબ્રન્ટ ગુજરાત રિજનલ કોન્ફરન્સ યોજાશે.

આપણ વાંચો: વાઇબ્રન્ટ ગુજરાત સમિટમાં પહોંચ્યું ‘અયોધ્યાધામ’ જાણો કઈ રીતે?

માંડલ બેચરાજી સ્પેશિયલ ઇન્વેસ્ટમેન્ટ રિજન ડેવલપમેન્ટ ઑથોરિટીએ તેની વિકાસલક્ષી પહેલ હેઠળ કેટલાક ઇન્ફ્રાસ્ટ્રક્ચર પ્રોજેક્ટ્સ હાથ ધર્યા છે. જેમાં અંદાજે ₹190 કરોડના રોકાણ સાથે 33 કિમીના રસ્તાઓનું બાંધકામ પૂર્ણ થઈ ગયું છે.

લગભગ ₹500 કરોડના ખર્ચે પાણી પુરવઠો, ગટર અને ઉદ્યોગોના ગંદા પાણીના નિકાલની પાઇપલાઇન જેવી સુવિધાઓ સાથે 66 કિમીના ટાઉન પ્લાનિંગ રસ્તાઓનું બાંધકામ ચાલુ છે.

₹70 કરોડની ઔદ્યોગિક માળખાકીય સુવિધાઓને મજબૂત બનાવવા માટે માંડલ બેચરાજી સ્પેશિયલ ઇન્વેસ્ટમેન્ટ રિજન ડેવલપમેન્ટ ઑથોરિટી કેટલાક પ્લાન્ટનું નિર્માણ પણ કરશે.

આપણ વાંચો: વાઇબ્રન્ટ ગુજરાત સમિટમાં ‘મોદી બ્રાન્ડ’ના કુર્તા અને જેકટે આકર્ષણ જમાવ્યું

જેમાં 20 મિલિયન લિટર પ્રતિ દિવસની ક્ષમતા ધરાવતો વધારાનો વૉટર ટ્રીટમેન્ટ પ્લાન્ટ, 4થી 15 મિલિયન લિટર પ્રતિ દિવસની ક્ષમતા ધરાવતા ત્રણ સીવેજ ટ્રીટમેન્ટ પ્લાન્ટ્સ, ઉદ્યોગો માટે 19 મિલિયન લિટર પ્રતિ દિવસની ક્ષમતા ધરાવતો એક કૉમન એફ્લુઅન્ટ ટ્રીટમેન્ટ પ્લાન્ટનો સમાવેશ થાય છે.

ઉલ્લેખનીય છે કે, ઉત્તર ગુજરાત માટે મહેસાણામાં જે આગામી વીજીઆરસીનું આયોજન થવાનું છે તે વૈશ્વિક સ્તરે પ્રખ્યાત વાઇબ્રન્ટ ગુજરાત ગ્લોબલ સમિટ મૉડેલનું વિસ્તરણ છે. આ કાર્યક્રમ કૃષિ, ડેરી, ફૂડ પ્રોસેસિંગ અને ઑટોમોબાઇલ ઉદ્યોગોમાં ઉત્તર ગુજરાતની આર્થિક ક્ષમતાને પ્રકાશિત કરશે.

માંડલ બેચરાજી સ્પેશિયલ ઇન્વેસ્ટમેન્ટ રિજન ખાતેની પ્રગતિ એ સૂચવે છે કે આ પ્રદેશ રોકાણ અને ઔદ્યોગિક વિકાસ માટે સજ્જ છે, જે વાઇબ્રન્ટ ગુજરાત રિજનલ કોન્ફરન્સમાં પણ ઝળકશે. વીજીઆરસીનો ઉદ્દેશ્ય વ્યાપક જાહેર ભાગીદારી અને પરસ્પર વિકાસને પ્રોત્સાહન આપવાનો છે, જે ગુજરાતના સમાવેશી ઔદ્યોગિક વિકાસના વિઝનને પ્રતિબિંબિત કરે છે