અમદાવાદ: ગુજરાતમાં બે દિવસથી વરસાદનું જોર ઘટ્યું છે. લોકોએ વરસાદી વિરામ સાથે રાહત અનુભવી હતી. ચોમાસાની શરૂઆતથી મેઘરાજા રાજ્યમાં મન મુકી વરસી રહ્યા છે. ઘણા વિસ્તારમાં જળબંબાકાર જેવી સ્થિતિ સર્જાઈ હતી. આ વચ્ચે હવામાન વિભાગે ફરી વરસાદનો રાઉન્ડ શરૂ થવાની આગાહી વ્યક્ત કરી છે. ત્યારે 11 જુલાઈ 6 વાગ્યાથી 12 જુલાઈ 6 વાગ્યા સુધીમાં 101 તાલુકામાં છૂટો છવાયો વરસાદ નોંધાયો હતો. હવામાન વિભાગે 48 કલાક બાદ ભારે વરસાદ થવાની શક્યતા વ્યક્ત કરી છે.
101 તાલુકામાં નોંધાયો વરસાદ
સ્ટેટ ઈમરજન્સી ઓપરેશન સેન્ટરના આંકડા પ્રમાણે 24 કલાકમાં 101 તાલુકામાં નોંધપાત્ર વરસાદ નોંધાયો છે. જેમાં સૌથી વધુ વરસાદ સાબરકાંઠા જિલ્લાના તલોદમાં 2 ઈંચ વરસાદ નોંધાય હતો. જ્યારે 9 તાલુકામાં 1 ઈંચથી વધુ વરસાદ નોંધાયો હતો. જ્યારે 91 તાલુકમાં એક ઈંચથી ઓછો વરસાદ નોંધાયો હતો.
હવામાન વિભાગની આગાહી
હવામાન વિભાગે આગામી 7 દિવસ માટે વરસાદને લઈ આગાહી વ્યક્ત કરી છે. જેના પ્રમાણે બે દિવસ સુધી ગુજરાતના મોટા ભાગના વિસ્તારોમાં હળવાથી ભારે વરસાદ નોંધાય રહ્યો છે. જ્યારે બે દિવસ પછી વરસાદનો બીજો રાઉન્ટ શરૂ થવાની શક્યતા પણ વ્યક્ત કરવામાં આવી છે. જેમાં ખાસ કરીને રાજ્યના નવસારી અને વલસાડમાં ભારેથી અતિભારે વરસાદ પડી શકે છે.આ ઉપરાંત દમણ દાદરા નગર હવેલીમાં પણ ભારે વરસાદની આગાહી કરવામાં આવી છે.
આપણ વાંચો: અમદાવાદ પ્લેન ક્રેશના અહેવાલમાં મોટો ખુલાસો, ટેક ઓફ પછી કેમ બંને એન્જિન બંધ થયા
આજે 12 જુલાઈના કુલ 7 જિલ્લાઓમાં ભારે વરસાદ પડી શકે છે. જેમાં અરવલ્લી, મહિસાગર, દાહોદ, અમરેલી, ભાવનગર, નવસારી, વલસાડ અને દમણ અને દાદરા નગર હવેલીમાં આજે ભારે વરસાદની આગાહી હવામાન વિભાગ દ્વારા કરવામાં આવી છે.
