ગુજરાતના 15 જિલ્લાની 2398 ગ્રાન્ટેડ શાળાનું ખાતાકીય ઓડિટ કરવા આદેશ

અમદાવાદઃ ગુજરાતની 15 જિલ્લાની કુલ 2398 ગ્રાન્ટેડ શાળાઓના ખાતાકીય ઓડિટ કરવા આદેશ કર્યો છે. જેમાં આજ 15મી એપ્રિલથી લઈને 19મી જુલાઈ સુધી શાળાઓનું ખાતાકીય ઓડિટ પૂર્ણ કરવા આદેશ અપાયા છે. શાળાઓનું ખાતાકીય ઓડિટ માટે જુદીજુદી ત્રણ ટીમોની રચના કરવામાં આવી છે. અમદાવાદમાં શાળાઓમા ખાતાકીય ઓડિટ આજથી શરૂ થશે અને આ કામગીરી એક અઠવાડિયામાં પૂર્ણ કરી દેવાશે.

તમામ જિલ્લા શિક્ષણાધિકારીને રેકર્ડ સાથે હાજર રહેવા સૂચના

રાજ્યની બિનસરકારી અનુદાનિત માધ્યમિક અને ઉચ્ચતર માધ્યમિક શાળાઓના ખાતાકીય હિસાબી ઓડિટ કરાવવા માટે આદેશ કરવામાં આવ્યો છે. આ માટે કમિશનર શાળાઓની કચેરી દ્વારા તમામ જિલ્લા શિક્ષણાધિકારીને પત્ર લખીને ઓડિટની કામગીરી પૂર્ણ કરવા માટે જણાવાયું છે. જેથી જિલ્લાની કચેરી દ્વારા સંબંધિત શાળાઓને જાણ કરી કામગીરી સાથે સંકળાયેલા કર્મચારીઓ- આચાર્યને સંપૂર્ણ રેકર્ડ સાથે હાજર રહેવા સૂચના અપવામાં આવી છે.

ઓડિટ માટેની જુદીજુદી ત્રણ ટીમોની રચના

રાજ્યમાં જુદીજુદી ત્રણ ટીમો દ્વારા ઓડિટની કામગીરી કરવામાં આવશે. જેમાં 2021-22ના વર્ષના ઓડિટ સાથે અગાઉના બાકી રહેલા વર્ષોના ઓડિટની કામગીરી પૂર્ણ કરવા માટે જણાવાયું છે. ટીમ-1 દ્વારા 15મી એપ્રિલથી 19મી જુલાઈ સુધીમાં ઓડિટની કામગીરી પૂર્ણ કરવામાં આવશે, જેમાં સાત જિલ્લાની 762 શાળાનો સમાવેશ કરાયો છે.
જ્યારે ટીમ-2 દ્વારા 15મી એપ્રિલથી 18મી જુલાઈ દરમિયાન ચાર જિલ્લામાં ઓડિટની કામગીરી કરાશે, જેમાં 815 શાળાઓનો સમાવેશ કરવામાં આવ્યો છે. ટીમ-3 દ્વારા 15મી એપ્રિલથી 19મી જુલાઈ દરમિયાન ચાર જિલ્લામાં ઓડિટની કામગીરી કરાશે, જેમાં 821 શાળાનો સમાવેશ કરાયો છે.

આ પણ વાંચો: વિદ્યાર્થીઓના ભાવિ સાથે ચેડા કરતી ડમી શાળાઓ! તપાસ થઈ તો બહાર આવ્યું ચોંકાવનારૂ સત્ય

ખાતાકીય ઓડિટ કેમ્પનુ ઓડિટ આજથી શરૂ થશે

અમદાવાદ શહેરની 393 શાળાનું ખાતાકીય ઓડિટ 15મી એપ્રિલથી 21મી એપ્રિલ દરમિયાન કરવા માટે આદેશ અપાયા છે. જેને પગલે અમદાવાદ શહેર જિલ્લા શિક્ષણાધિકારી દ્વારા રાયખડ ખાતે આવેલી સરકારી ગર્લ્સ હાઈસ્કૂલમાં ખાતાકીય ઓડિટ કેમ્પનુ ઓડિટ આજથી શરૂ થશે. અને શાળાઓના ખાતાકીય ઓડિટની કામગીરી એક અઠવાડિયામાં પૂર્ણ કરી દેવાશે.