સ્વચ્છતા બાદ સુરક્ષામાં પણ અમદાવાદ નંબર વન! જોકે સરકારનો નહીં આમ ખાનગી કંપનીનો અહેવાલ કહે છે…
અમદાવાદે ગુજરાતના ગૌરવમાં ફરી વધારો કર્યો છે. ભારતનું સૌથી વધુ સુરક્ષિત શહેર તરીકે અમદાવાદનું નામ જાહેર કરવામાં આવ્યું છે. એક ખાનગી એજન્સી દ્વારા ક્રાઈમ અને સેફ્ટી ઈન્ડેક્સ રિપોર્ટમાં અમદાવાદને ભારતના સુરક્ષિત શેહરમાં પ્રથમ સ્થાન આપ્યું છે. જો કે સરકારી આંકડા વિપરીત પણ હોઈ શકે છે. તાજેતરમાં નમ્બિઓહનો ક્રાઈમ એન્ડ સેફ્ટ ઈન્ડેક્સ રિપોર્ટ 2025 જાહેર કરવામાં આવ્યો હતો.
આ રિપોર્ટ પ્રમાણ અમદાવાદને 68.3 રેન્ક મળ્યો છે. અમદાવાદે મુંબઈ, દિલ્હી, બેંગલુરુ અને હૈદરાબાદ જેવા મહાનગરોને પાછળ છોડી ભારતમાં પ્રથમ અને એશિયાના શહેરો પ્રમાણે 29મું સ્થાન મળ્યું છે. આ સિદ્ધિ શહેરની અદ્યતન સુરક્ષા વ્યવસ્થા અને નાગરિકોના સહકારનું પરિણામ છે.
તાજેતરમાં નમ્બિઓહ દ્વારા જાહેર કરેલા અહેવાલ પ્રમાણે, અમદાવાદે ભારતના સૌથી સુરક્ષિત શહેર તરીકેનું સ્થાન મેળવ્યું છે, જ્યારે એશિયામાં 29મો ક્રમ પ્રાપ્ત કર્યો છે. અમદાવાદ ઉપરાંત ભારતના જયપુરને 34, હૈદરાબાદને 45, મુંબઈને 46, કોલકાતાને 48, ગુરુગ્રામને 54, બેંગલુરુ 55 અને નોઈડાને 56મો ક્રમાંક પ્રાપ્ત કર્યો છે. અમદાવાદની આ સફળતા પાછળ વ્યાપક સીસીટીવી નેટવર્ક, પોલીસની સજ્જતા અને નાગરિકોની જાગૃતિ મહત્વની ભૂમિકા ભજવે છે.
અદ્યતન ટેકનોલોજી અને સુરક્ષા વ્યવસ્થા
અમદાવાદની સુરક્ષા માટે 25,000થી વધુ સીસીટીવી કેમેરાનું નેટવર્ક કાર્યરત છે, જેમાંથી 22,000 કેમેરા નાગરિકોએ ગુજરાત પબ્લિક સેફ્ટી એક્ટ હેઠળ લગાવ્યા છે. જ્યારે બાકીના કેમેરા ગૃહ વિભાગ, અમદાવાદ મ્યુનિસિપલ કોર્પોરેશન અને નિર્ભયા પહેલ હેઠળ સ્થાપિત કરવામાં આવ્યા છે. આ મામલે અમદાવાદ પોલીસ કમિશનરે જણાવ્યું કે, આ તમામ કેમેરાનું લાઈવ ફીડ અદ્યતન કંટ્રોલ રૂમમાં 24 કલાક મોનિટર થાય છે, જે શહેરની સુરક્ષામાં મહત્વનું યોગદાન આપે છે.
ગુજરાત પોલીસે આ સફળતાનો શ્રેય સતત કાયદા અમલીકરણ, નાગરિકોની ભાગીદારી અને ટેકનોલોજી આધારિત પોલીસિંગને આપ્યો છે. રથયાત્રા જેવા તહેવારો દરમિયાન અમદાવાદમાં મોટી સંખ્યામાં ભીડ હોવા છતાં શાંતિ જળવાય છે, જે ભારતના સૌથી મોટા પોલીસ બંદોબસ્તનું પરિણામ છે. દરેક ડેપ્યુટી કમિશનર ઓફ પોલીસ (ડીસીપી) માટે સ્થાનિક ક્રાઈમ બ્રાન્ચની સ્થાપનાથી ગુનાખોરીમાં નોંધપાત્ર ઘટાડો થયો છે. મહિલાઓ, બાળકો અને વૃદ્ધોની સુરક્ષા માટે શહેરની શી ટીમ પણ સતત કાર્યરત રહે છે.
નમ્બિઓહ શું છે?
નમ્બિઓહએ વિશ્વનું સૌથી મોટું ડેટાબેઝ કલેક્શન કરનાર એજન્સી છે, નમ્બિઓહ જીવનની ગુણવત્તાના ડેટાનો ક્રાઉડ-સોર્સ્ડ વૈશ્વિક ડેટાબેઝ પણ છે. તે જીવનખર્ચ, આવાસ, આરોગ્યસંભાળ, ટ્રાફિક, કથિત ગુનાખોરી અને પ્રદૂષણ જેવી બાબતોની વિશ્વસનીય માહિતી પ્રદાન કરે છે. આ ડેટાબેઝ વૈશ્વિક સ્તરે જીવનધોરણ અને સામાજિક-આર્થિક પરિસ્થિતિઓનું વિશ્લેષણ કરવામાં મદદરૂપ થાય છે.
