મુન્દ્રામાં દુષ્કર્મ: શ્રમિક પરિવારની છ વર્ષની માસૂમ બાળકીને નરાધમે પીંખી

મુન્દ્રા: છેલ્લા કેટલાક સમયથી રાજ્યની માસૂમ બાળકીઓ પર બળાત્કારના કિસ્સાઓ સામે આવી રહ્યા છે. આવા કિસ્સાઓમાં વધુ એક કિસ્સો સામે આવ્યો છે. કચ્છમાં એક શ્રમિક પરિવારની માસૂમ દીકરીને એક નરાધમે પોતાની હવસનો શિકાર બનાવી છે. પોલીસે નરાધમની ધરપકડ કરીને વધુ કાર્યવાહી હાથ ધરી છે.

છ વર્ષની દીકરી પર દુષ્કર્મ

ઝારખંડનો એક શ્રમિક પરિવાર કચ્છ ખાતે રોજગારીની શોધમાં આવ્યો હતો. આ પરિવારના સભ્યો મુન્દ્રા તાલુકાનાં એક ગામમાં કાર્યરત ખાનગી એકમમાં મજૂરી કામ કરીને પોતાનું ગુજરાન ચલાવી રહ્યા હતા. આ પરિવારમાં એક છ વર્ષની બાળકી પણ છે. આ બાળકી પર એક 26 વર્ષીય નરાધમે દુષ્કર્મ આચર્યું હતું.

મુન્દ્ર મરીન પોલીસ સ્ટેશનમાં નોંધાયેલી ફરિયાદ મુજબ, બાળકીના માતા-પિતા ગત 12 જાન્યુઆરી, 2026ના રોજ નિત્યકર્મ મુજબ મજૂરીકામ અર્થે કંપનીમાં ગયા હતા. ત્યારે બાજુમાં રહેતા આરોપી મનીષ કુમાર માંઝીએ ફરિયાદીની છ વર્ષની સગીરવયની પુત્રીની એકલતાનો લાભ લઈને તેની સાથે દુષ્કર્મ ગુજાર્યું હતું. આરોપીએ બાળકીને શારીરિક-માનસિક ઈજા પહોંચાડી હતી.

આરોપીની વિધિવત રીતે ધરપકડ થશે

શ્રમિક પરિવારની ફરિયાદ બાદ મરીન પોલીસ હરકતમાં આવી હતી. મુન્દ્રા મરીન પોલીસે મૂળ બિહારના રહેવાસી એવા 26 વર્ષીય મનીષકુમાર માંઝીને ઝડપીને વધુ તપાસ હાથ ધરવામાં આવી છે. આ ઘૃણાસ્પદ કિસ્સાના તપાસકર્તા પી.આઈ પી.કે. રાડાએ મીડિયાને જણાવ્યું હતું કે, આરોપીની ઓળખ પરેડ બાદ તેની વિધિવત ધરપકડ કરવામાં આવશે.

આ પણ વાંચો…બહેન-દીકરીઓ માટે અસલામત ગુજરાત, વાંસદા બાદ વડોદરામાં પણ સગીરા પર ગેંગરેપ…