ભુજઃ સમગ્ર ભારતની સાથે સાથે કચ્છ અને ગુજરાતમાં પણ સૂર્યનો પાવર ઘટતો જતો હોવાના ચોંકાવનારાં તારણ બનારસ હિન્દૂ યુનિવર્સીટી, ઇન્ડિયન ઇન્સ્ટિટ્યૂટ ઓફ ટ્રોપિકલ મિટીરીયોલોજી અને ભારતીય હવામાન ખાતા દ્વારા તાજેતરમાં સંપન્ન કરાયેલા એક સંશોધન પત્રમાં જણાવાયું છે. આ સંશોધન પત્રમાં જણાવ્યા પ્રમાણે ભારતમાં છેલ્લા ત્રણ દાયકાથી સૂર્યનો પાવર ઝંખવાઈ રહ્યો છે અને તેના કિરણો ઓછી માત્રામાં ભૂપૃષ્ઠ તેમજ દરિયાની સપાટી પર ઓછા પડી રહ્યાં હોવાથી મોટી સમસ્યા ઉભી થવાનો ભય ઉભો થયો છે.
સૂર્યના કિરણો પ્રતિ વર્ષ 13 કલાકનો ઘટાડો
આ સંશોધનમાં જણાવ્યા પ્રમાણે દેશના ઉત્તરના મેદાનો પર હવે સૂર્યના કિરણો પ્રતિ વર્ષ 13 કલાક જેટલાં ઓછાં પડી રહ્યાં છે, જયારે હિમાલયના વિસ્તારો, પશ્ચિમ ઘાટ અને ડેકનના મેદાનોમાં પણ સૂર્યપ્રકાશની હાજરી ઓછી થવા પામી છે. આ અભ્યાસ પ્રમાણે ઉત્તરના મેદાનોમાં 13 કલાક, તો હિમાલય પર્વત માળાઓમાં વાર્ષિક સાડા નવ કલાક, પશ્ચિમ ઘાટના મેદાની વિસ્તારોમાં 8.6 કલાક, મધ્ય ભારતમાં 4.7 કલાક અને ડેકનના મેદાનોમાં વાર્ષિક 3.1 કલાક જેટલો ઓછો સૂર્ય પ્રકાશ નોંધાયો છે. આમાં સતત ક્રમશ ઘટાડો થતો રહેવા પામ્યો છે.
ઉત્તર-પૂર્વીય રાજ્યોમાં સૂર્યપ્રકાશની સ્થિતિ સારી છે
જો કે, ઉત્તર-પૂર્વીય રાજ્યોમાં તેમના વિશિષ્ઠ ભૌગોલિક પરિબળોને કારણે ત્યાં સૂર્યપ્રકાશમાં ખાસ ઘટાડો નોંધાયો નથી. અભ્યાસમાં જણાવ્યા પ્રમાણે ચોમાસાં દરમિયાન વધારે ગાઢ અને સતત વાદળછાયા હવામાનના દિવસોની સંખ્યામાં વધારો થવા પામ્યો છે. જે પણ દેશમાં સૂર્યપ્રકાશની વધી રહેલી ગેરહાજરીનું એક કારણ છે. અભ્યાસમાં પરાલી બળવાને કારણે, ઉદ્યોગોની ચીમની અને વાહનોમાંથી નીકળતા ધુમાડા તેમજ વધતા જતા શહેરીકરણને કારણે દેશભરમાં જયારે પર્યાવરણની પરિસ્થિતિ ખુબ ગંભીર બની છે ત્યારે સૂર્યનારાયણ દેવનો ઘટતો પાવર ચિંતાનું કારણ બની ચુક્યો છે.
સૂર્યના કિરણોની ગેરહાજરી ખતરો સર્જી શકે છે
વધુમાં વાત કરવામાં આવે તો, પ્રદુષણને કારણે હવામાં ઉભા થતા ભેજયુક્ત ‘એરોસોલ’ સૂર્યના કિરણોને અવરોધે છે અને તેને સપાટી સુધી પહોંચવા દેતા નથી જેને લઈને આ સમસ્યા ઉભી થવા પામી છે. ભારત જયારે સૌરઉર્જાના ઉપયોગ માટે કમર કસી રહ્યું છે. ભારતમાં ક્રમશ: ઘટતી જતી સૂર્યપ્રકાશની હાજરી, સૌર ઉર્જાના ઉત્પાદન માટેના નિયત કરાયેલાં લક્ષ્યાંકો સુધી પહોંચવામાં અંતરાય ઉભો કરે તેવો ભય ઉભો થયો છે. આ ઉપરાંત સૂર્યના કિરણોની ગેરહાજરી નજીકના ભવિષ્યમાં ‘હેલ્થ હેઝાર્ડ’ ઉભા કરે તેવી પણ શક્યતા છે.
યુરોપના દેશોમાં સૂર્યપ્રકાશની હાજરી ઘટાડો નોંધાયો
અત્રે નોંધનીય છે કે, આવી પરિસ્થિતિ માત્ર ભારતમાં જ નથી પરંતુ યુરોપના દેશોમાં પણ ઈ.સ 1970થી શરૂ કરીને છેક 2009 સુધીના સમયગાળામાં સૂર્યપ્રકાશની હાજરી 11 ટકા જેટલી ઘટી જવા પામી છે, જો કે યુરોપના દેશોમાં પર્યાવરણને નુકશાનકર્તા પરિબળો પર સખત નિયમો બનાવાતાં યુરોપમાં પરિસ્થિતિ સુધરી છે. ભારતમાં જાણે સૂર્ય ‘ધુમાડા’ પાછળ છુપાઈ ગયો છે અને આની અસર ખેતીવાડી પર પણ પડી રહી છે.
આ પણ વાંચો: ચિંતાજનક UN રિપોર્ટ: વિશ્વના ગીચ શહેરોમાં ગુજરાતના બે શહેરો સામેલ! પ્રતિ ચો. કિમી. 20,000થી વધુ લોકો!
