ભુજના દિનારા ગામમાં સાળી પર કુહાડીનો હુમલો: બનેવીને સાત વર્ષની જેલ

ભુજઃ કચ્છના ભુજમાં સાળી પર જીવલેણ હુમલો કરનાર બનેવીને સાત વર્ષની સજા અને દંડ ફટકારવામાં આવ્યો. દિનારા ગામમાં બનેલી આ ઘટનામાં પીડિતાએ પોતાની આંખોની દ્રષ્ટિ ગુમાવી હતી. ભુજ તાલુકાના પશ્ચિમ વિસ્તારમાં આવેલા દિનારા ગામમાં વર્ષ 2021માં સાળીના હત્યા કરવાનો બનેવીએ પ્રયાસ કર્યો હતો.

સાળી તેની બહેનને પોતાના વિરુદ્ધ ઉશ્કેરતી હોવાની શંકામાં સાળીના માથા ઉપર કુહાડીનો ઘા મારીને હત્યાનો પ્રયાસ કર્યો હતા. જેથી મામદ અમીન સમા નામના વ્યક્તિની કોર્ટે હત્યાના પ્રયાસના ગુનામાં ચાર વર્ષ બાદ ચુકાદો આપ્યો છે અને આરોપીને સાત વર્ષની સાદી કેદની સજા અને રૂપિયા પાંચ હજારનો દંડ ફટકાર્યો છે.

આપણ વાંચો: ગુજરાતમાં મહિલાઓ સુરક્ષિત? અમરેલીમાં યુવતી પર થયો જીવલેણ હુમલો, યુવકે છરીના ઘા માર્યા…

આરોપીએ કુહાડી વડે સાળી પર કર્યો હતો હુમલો

કેસની વાત કરવામાં આવે તો, ઓગસ્ટ 2021માં આરોપી મામદની પત્ની હવાબાઈ રિસામણે તેના પીયર ચાલી ગઈ હતી અને પત્નીએ ફેમિલી કોર્ટ-ભુજમાં ભરણ-પોષણ મેળવવા આરોપી સામે કેસ દાખલ કર્યો હતો. આરોપીએ પત્ની હવાબાઈ સાથે સમાધાન કરી પોતાની સાથે લઈ જવા મોટા દિનારા આવ્યો હતો.

બપોરના અરસામાં હવાબાઈ તથા સલમાબાઈ અને કુવરબેન ઘરના ફળિયામાં બેઠા હતા ત્યારે મામદ કુહાડી લઈને આવ્યો અને માથાના પાછળના ભાગે કુહાડી વડે હુમલો કર્યો હતો. તું તારી બહેનને ચઢાવે છે તેવું કહીને કુહાડી વડે હુમલો કર્યો હતો.

આ દરમિયાન સાળીને ગંભીર ઈજાઓ પહોંચાડી હતી. આ હુમલામાં સલમાબાઈને હેમરેજ થઇ ગયું હતું અને હાલમાં તેમની બંને આંખમાં અંધાપો આવી ગયો હોવાનું પણ સૂત્રો દ્વારા જાણવા મળ્યું છે.

આપણ વાંચો: વેરાવળના વાવડીમાં એક યુવકે ચાર લોકો પર કર્યો જીવલેણ હુમલો! એકનું મોત, ત્રણ ઘાયલ

ફરિયાદી પક્ષે 23 સાક્ષી અને 34 પુરાવા કોર્ટમાં રજૂ કર્યાં

કાર્ટ કાર્યવાહી દરમિયાન આ ગુનામાં ફરિયાદી પક્ષ દ્વારા સેશન્સ કોર્ટમાં 23 સાક્ષી અને 34 દસ્તાવેજી પુરાવા રજૂ કરવામાં આવ્યા હતા, જેની તપાસ બાદ અદાલતે હત્યાનો પ્રયાસ કરવાના ગુનામાં આરોપી મામદને સાત વર્ષની સાદી કેદ અને રૂપિયા 5000નો દંડ ફટકારતો હુકમ કર્યો છે.

આ સાથે અન્ય કલમ હેઠળ નોંધાયેલા ગુનામાં છ માસની સાદી કેદની સજા અને રૂપિયા 1000નો દંડ પણ ફટકાર્યો હતો. કુલ મળીને આરોપીને સાડા સાત વર્ષની જેલ અને 6000 રૂપિયાને દંડ ફટકારવામાં આવ્યો છે.