ગુજરાતમાં દારૂ-ડ્રગ્સ મુદ્દે મેવાણી આક્રમક, હર્ષ સંઘવીના રાજીનામાની કરી માગ

ગુજરાતના વિવિધ જિલ્લાઓ અને તાલુકાઓમાં દારૂ, ડ્રગ્સ, જુગાર અને કુટણખાનાના બેફામ વેપારના વિવાદે હવે ઉગ્ર રાજકીય સ્વરૂપ ધારણ કર્યું છે. આ ગંભીર મુદ્દે ગુજરાત પ્રદેશ કોંગ્રેસ સમિતિના કાર્યકારી પ્રમુખ જીગ્નેશ મેવાણીએ ફરી એકવાર નાયબ મુખ્યમંત્રી હર્ષ સંઘવી પર આકરા પ્રહારો કર્યા છે અને ‘નથિંગ લેસ ધેન ધેટ’ કહીને તેમના રાજીનામાની માંગણી દોહરાવી છે. એટલું જ નહીં, મેવાણીએ રાજ્યના વડા મુખ્યમંત્રી ભૂપેન્દ્ર પટેલની આ મુદ્દે લાંબી ચૂપકિદી સામે પણ સવાલો ઉઠાવ્યા છે અને કહ્યું છે કે તેમનું પેટનું પાણી કેમ નથી હલતું.

પ્રેસ કોન્ફરન્સ યોજીને જીગ્નેશ મેવાણીએ આક્ષેપ કર્યો હતો કે ગુજરાતના તમામ 33 જિલ્લા અને 250થી વધારે તાલુકાઓમાં જાણે કાયદો અને બંધારણના ધજાગરા ઉડતા હોય તેમ જુગારના અડ્ડા, કુટણખાના, દારૂના અડ્ડા અને ડ્રગ્સનો વેપલો ચારે બાજુ ચાલી રહ્યો છે. તેમણે ભારપૂર્વક કહ્યું કે, રાજ્ય સરકાર અને પોલીસના સંપૂર્ણ આશીર્વાદ અને રહેમ નજર વિના આ કાળો કારોબાર શક્ય નથી. મેવાણીએ મોટો આંકડો રજૂ કરતા કહ્યું કે ગુજરાતના દરિયાકાંઠા પરથી અંદાજિત 64 હજાર કરોડ રૂપિયાનું ડ્રગ્સ પકડાયું છે. તેમણે સવાલ ઉઠાવ્યો કે, “કોણ છે ગુજરાતનો એક બદમાશ મંત્રી જે ગુજરાતની યુવા પેઢીની નસોમાં ડ્રગ્સ ઘુસાડી રહ્યો છે.” તેમણે ભારપૂર્વક કહ્યું કે જે મંત્રી આ કાળા કારોબારમાંથી કમાય છે, તેને ગુજરાત અને ભારત ભૂમિનો ગદ્દાર કહેવાય.

આ પણ વાંચો: મેવાણી Vs સંઘવીઃ ગોપાલ ઈટાલિયાએ ગૃહ પ્રધાન મુદ્દે કર્યાં ચોંકાવનારા ખુલાસા

મેવાણીએ ગૃહમંત્રીને ‘આઠ ચોપડી પાસ’ ગણાવીને સત્તાના કોઈ સ્થાન પર રહેવાનો તેમને અધિકાર ન હોવાનો દાવો કર્યો હતો. આ ઉપરાંત, તેમણે મુખ્યમંત્રીને સીધી ચેલેન્જ આપી કે તેઓ આ મુદ્દે કોઈ બ્લુપ્રિન્ટ જાહેર કરે, જેથી ગુજરાતમાં હવે પછી ડ્રગ્સનો કાળો કારોબાર નહીં થાય. તેમણે રાજ્યના ડીજી, હોમ સેક્રેટરી અને મુખ્યમંત્રીને ચેલેન્જ આપી હતી કે હર્ષ સંઘવી અને ભૂપેન્દ્ર પટેલના વિધાનસભા ક્ષેત્રોમાંથી દારૂ-જુગારના અડ્ડા બંધ કરીને બતાવે. મેવાણીએ સ્પષ્ટ કર્યું કે શાળાઓ, કોલેજો અને યુનિવર્સિટીઓની બહાર છડેચોક ડ્રગ્સ મળી રહ્યું છે. કોંગ્રેસ ટૂંક સમયમાં હેલ્પલાઈન નંબર પણ જાહેર કરશે અને આ મુદ્દાને એક્સપોઝ કરવા બદલ કોઈ નાગરિકને નિશાન બનાવવામાં આવશે તો કોંગ્રેસ ચલાવી લેશે નહીં. તેમણે જનતાને અપીલ કરી કે વીડિયો અપલોડ કરે અને નેતાઓને ટેગ કરે. તેમણે ‘જનતા રેડ’ કરવાની પણ જાહેરાત કરી.

કોંગ્રેસ નેતા જીગ્નેશ મેવાણી દ્વારા દારૂ અને ડ્રગ્સના મુદ્દાને ઉઠાવવા બદલ આમ આદમી પાર્ટી (AAP) એ તેમને ખુલ્લું સમર્થન આપ્યું છે. AAP એ કહ્યું કે તેઓ લોકોના પ્રશ્નો માટે કોંગ્રેસને સમર્થન આપશે. AAPના પ્રમુખે ગૃહમંત્રી પર આક્ષેપ કર્યો કે તેઓ નાના પોલીસ કર્મચારીના પરિવારના લોકોને તો રસ્તા પર ઉતારે છે, પણ મેવાણીનો વિરોધ કરવા માટે કોઈ IPS અધિકારીના પરિવારના લોકોને કેમ રોડ પર ન લાવ્યા? આ મુદ્દે વિપક્ષી દળો હવે એકઠા થઈને સરકારને ઘેરવાનો પ્રયાસ કરી રહ્યા છે.