ડુમસ સી-ફેસ પ્રોજેક્ટનો પ્રથમ તબક્કો પૂર્ણતાના આરે, જાણો શું સુવિધા મળશે

સુરત: SMC દ્વારા ડુમસ બીચના કિનારે તૈયાર કરવામાં આવી રહેલા ડુમસ સી-ફેસ ડેવલપમેન્ટ પ્રોજેક્ટને લઈને સુરતવાસીઓમાં ઉત્સુકતા જોવા મળી રહી છે. આ મહત્વકાંક્ષી પ્રોજેક્ટનો સૌથી મહત્વપૂર્ણ ભાગ ગણાતો ઝોન 1 ડિસેમ્બર સુધીમાં પૂર્ણ થઈ જવાની અપેક્ષા છે, જેનું લગભગ 75% કામ અત્યાર સુધીમાં સમાપ્ત થઈ ચૂક્યું છે. એકવાર આ પ્રોજેક્ટ પૂર્ણ થઈ જશે, પછી સુરત શહેરને મનોરંજન સુવિધાઓ અને નેચર ટૂરિઝમ આકર્ષણોથી સજ્જ એક આધુનિક બીચફ્રન્ટ મળશે.

શુક્રવારે મહાનગરપાલિકાની સામાન્ય સભા દરમિયાન કોર્પોરેટર હિમાંશુ રાવલજીએ પ્રોજેક્ટની પ્રગતિ વિશે વિગતવાર માહિતી માંગી હતી, જેના જવાબમાં ડેપ્યુટી કમિશનર દિનેશ આર. ગુરુવે વ્યાપક સ્ટેટસ રિપોર્ટ રજૂ કર્યો હતો.

ડુમસ સી-ફેસ પ્રોજેક્ટ કુલ 102 હેક્ટરમાં ફેલાયેલો છે અને તે 5 કિલોમીટરના દરિયાકિનારાને આવરી લે છે. આખા પ્રોજેક્ટને ચાર મુખ્ય ઝોનમાં વિભાજિત કરવામાં આવ્યો છે:

ઝોન 1: અર્બન ઝોન
ઝોન 2: પબ્લિક સ્પેસ ઇકો ઝોન અને વૉકવે
ઝોન 3: ફોરેસ્ટ ઇકો-ટૂરિઝમ અને વેલનેસ સેન્ટર
ઝોન 4: ડુમસ પોર્ટનું પુનર્વિકાસ

ઝોન 1 ની મુખ્ય સુવિધાઓ

ઝોન 1 (12.86 હેક્ટર વિસ્તાર) માં આધુનિક સુવિધાઓ વિકસાવવામાં આવી રહી છે, જેમાં બાળકો માટે કિડ્સ પ્લે એરિયા, ઇવેન્ટ ગ્રાઉન્ડ, 3,800 ચો.મી.નો અર્બન બીચ, યોગા ઝોન, 52,000 ચો.મી.નો પબ્લિક હોર્ટિકલ્ચર એરિયા, કાફે, વૉકવે, સાઇકલ ટ્રેક, ગોલ્ફ કાર્ટ ટ્રેક, INS સુરત યુદ્ધજહાજ પ્લાઝા, અરાઇવલ પ્લાઝા અને સરફેસ પાર્કિંગનો સમાવેશ થાય છે. આ ઉપરાંત, 750 મીટર લાંબો વૉકવે અને નવ આકર્ષક સ્કલ્પ્ચર પણ વિકસાવવામાં આવી રહ્યા છે.

ઝોન 1 માટે કુલ ₹257.66 કરોડનું ભંડોળ ફાળવવામાં આવ્યું છે, જેમાં પેકેજ-1 હેઠળ ₹174.22 કરોડ અને પેકેજ-2 હેઠળ ₹83.44 કરોડનો સમાવેશ થાય છે. અત્યાર સુધીમાં પેકેજ-1 હેઠળ ₹128.46 કરોડનું કામ પૂર્ણતાના આરે છે, અને હાલમાં કામગીરી પૂરપાટ ઝડપે ચાલી રહી છે.

આ પણ વાંચો…મુંબઈ અને ગોવા બીચ જેવી મજા હવે સુરતમાં મળશે, ડુમસ બીચ ફેઝ-1ની કામગીરી પુરજોશમાં