નવસારીમાં LCBની મોટી કાર્યવાહી: દમણથી જૂનાગઢ જતો 1 કરોડથી વધુ કિંમતનો વિદેશી દારૂ જપ્ત…
નવસારીઃ અહીંની લોકલ ક્રાઈમ બ્રાન્ચ (એલસીબી) પોલીસની ટીમે ટ્રકમાં લસણની આડમાં લઇ જવાતો વિદેશી દારૂનો જથ્થો ઝડપી પાડ્યો છે. આ દારૂની કિંમત લગભગ 1 કરોડ રૂપિયાથી વધુ હોવાનું જાણવા મળ્યું છે. આ દારૂ લસણની આડમાં દમણથી જૂનાગઢ લઇ જવામાં આવી રહ્યો હતો. જો કે, પોલીસને આ મામલે બાતમી મળતા કાર્યવાહી કરવામાં આવી હતી. પોલીસે દારૂ અને અન્ય મુદામાલ મળી કુલ 1.11 કરોડનો મુદામાલ જપ્ત કર્યો હતો. એલસીબી કચેરી દારૂના બોક્સથી છલકાઈ ગઈ હતી.
તુલસી હોટેલની પાસે નાકાબંધીમાં દારૂ ઝડપ્યો
નવસારી એલસીબી પોલીસની ટીમે નેશનલ હાઈવે નંબર 48 મુંબઈથી અમદાવાદ જતી ટ્રેક ઉપર ખારેલ ઓવર બ્રીજ તુલસી હોટલની પાસે નાકાબંધી કરી હતી. આ દરમિયાન ટ્રક આવતા તેને રોકીને તપાસ કરતા લસણની આડમાં લઇ જવાતો દારૂનો જથ્થો મળી આવ્યો હતો. પોલીસે 11,88,720 રૂપિયાની કિંમતનો વિદેશી દારૂનો જથ્થો, 10 લાખની કિમંતની એક ટ્રક, 10 હજારની કિમંતનો મોબાઈલ ફોન મળી કુલ 1,11,98,720 રૂપિયાનો મુદામાલ જપ્ત કર્યો હતો.
દારૂ મંગાવનાર અને ભરાવનાર વોન્ટેડ જાહેર
આ ઘટનામાં પોલીસે ટ્રક ચાલક દેવા ઉર્ફે ડીએન નારણભાઈ કરશનભાઈ સાવધારીયાને ઝડપી પાડવામાં આવ્યો છે તેમ જ આ બનાવમાં દારૂનો જથ્થો મંગાવનાર તેમજ ભરાવનારને વોન્ટેડ જાહેર કરવામાં આવ્યા છે, જેમાં કિશન ઉર્ફે બોડો લખણભાઈ રાડા અને નેશનલ હાઈવે નંબર 48 બગવાડા ટોલનાકા સુધી દારૂના જથ્થા સહિતની ટ્રક આપી જનાર કિશનના માણસને વોન્ટેડ જાહેર કરવામાં આવ્યો છે. આ મામલે ગણદેવી પોલીસ મથકમાં ગુનો નોંધવામાં આવ્યો છે. તેમજ આ દારૂ દમણથી જૂનાગઢ ખાતે લઇ જવામાં આવતો હોવાનું બહાર આવ્યું હતું.
આ કેસમાં વિગતો આપતા પોલીસે જણાવ્યુ્ં કે, ટ્રકમાં લસણની આડમાં દારૂની હેરાફેરી કરવામાં આવી રહી હતી. આ દારૂને જૂનાગઢ લઈ જવામાં આવી રહ્યો હતો. આ દારૂનો જથ્થો જૂનાગઢના કિશોર રાણા નામના વ્યક્તિને ત્યાં જઈ રહ્યો હતો, જ્યારે ટ્રક દેવા રબારી નામનો વ્યક્તિ ચલાવી રહ્યો હતો. આ મામલે એક આરોપીની ધરપકડ કરી લેવામાં આવી છે. નવસારી પોલીસ દારૂની તસ્કરી સામે સતત કાર્યવાહી કરી રહી હોવાનું પોલીસે જણાવ્યું હતું.
