₹3000 ની મામૂલી ફીથી આલિશાન ઘર ખરીદવા સુધીની સફર: જાણો ટીવીની આ સુપરસ્ટાર એક્ટ્રેસનો સંઘર્ષ…
મુંબઈ: ટેલિવિઝન જગતમાં પોતાની દમદાર એક્ટિંગ અને ખાસ કરીને નેગેટિવ પાત્રોથી ઘરે-ઘરેમાં જાણીતા બનેલા અભિનેત્રી સુધા ચંદ્રન આજે કોઈ ઓળખના મોહતાજ નથી. ફિલ્મો હોય કે નાના પડદાના લોકપ્રિય શો, તેમણે દરેક જગ્યાએ પોતાની એક્ટિંગ સ્કીલથી લોકો મંત્રમુગ્ધ કર્યા છે. જોકે, ગ્લેમરની આ દુનિયામાં ટોચ પર પહોંચવા માટે તેણે જે સંઘર્ષ કર્યો છે, તે ખરેખર પ્રેરણાદાયી છે. તાજેતરમાં એક ઇન્ટરવ્યુમાં તેણે પોતાના શરૂઆતના દિવસો અને મળતી મામૂલી ફી વિશે ખુલાસો કરીને ચાહકોને આશ્ચર્યમાં મૂકી દીધા છે.
સુધા ચંદ્રને જણાવ્યું કે, જ્યારે તેણે એકતા કપૂરના લોકપ્રિય શોમાં ‘રમોલા સિકંદ’ જેવું આઇકોનિક પાત્ર ભજવ્યું હતું, ત્યારે તેને દિવસના માત્ર 3,000 રૂપિયા મળતા હતા. તે સમયે ટીવી ઇન્ડસ્ટ્રીમાં અત્યાર જેવું મોટું બજેટ કે ઊંચી ફીનું માળખું નહોતું. પરંતુ તેણે મહેનત ચાલુ રાખી અને એ મામૂલી કમાણીમાંથી જ ધીરે-ધીરે મુંબઈમાં પોતાનું ઘર અને સપનાઓ સાકાર કર્યા. આજે રિપોર્ટ્સ અનુસાર, તેઓ એક એપિસોડ માટે અંદાજે 3 લાખ રૂપિયા સુધીની ફી વસૂલે છે, જે તેની શરૂઆતની ફી કરતા 100 ગણી વધારે છે.
પોતાના અંગત જીવન વિશે વાત કરતા સુધાજીએ જણાવ્યું કે, જ્યારે તેણે મોટા શૉ સાઇન કર્યા ત્યારે જ તેના લગ્ન થયા હતા. તે સમયે લોકો એવી અટકળો લગાવતા હતા કે તેનું કામ એટલું વધારે છે કે તેઓ ઘરને સમય નહીં આપી શકે અને જલ્દી છૂટાછેડા થઈ જશે. પરંતુ તેમના પતિએ તેને પૂરો સાથ આપ્યો અને આ તકનો લાભ લેવા પ્રોત્સાહિત કરી. પરિણામે, તેણે લગભગ 8 વર્ષ સુધી સતત દિવસ-રાત કામ કર્યું અને ઈન્ડસ્ટ્રીમાં પોતાનું એક અલગ સ્થાન બનાવ્યું.
અભિનેત્રીનું માનવું છે કે આજે તેઓ જે કંઈ પણ કમાઈ રહ્યા છે, તે તે સમયના સંઘર્ષ અને પાત્રોને આભારી છે. તેણે ઉમેર્યું કે, “વાત માત્ર પૈસાની નથી, પરંતુ તે પૈસાથી જે માન-સન્માન અને ખ્યાતિ મળી છે તે સૌથી મોટી મૂડી છે.” સુધા ચંદ્રનની આ સફર એ વાતની સાબિતી છે કે જો મનમાં દ્રઢ નિશ્ચય હોય, તો નાની શરૂઆત પણ તમને સફળતાના શિખરો સુધી પહોંચાડી શકે છે. આજે તેઓ નવી પેઢીના કલાકારો માટે એક આદર્શ સમાન છે.
