શાહરૂખ ખાનની હિરોઈન બીજી વખત દુલ્હન બની
પાકિસ્તાનની જાણીતી અભિનેત્રીઓમાંની એક માહિરા ખાન આ દિવસોમાં ચર્ચામાં છે. તેણે ફરી લગ્ન કર્યા છે. હવે તે બિઝનેસમેન સલીમ કરીમ સાથે લગ્નના બંધનમાં બંધાઈ ગઈ છે. શાહરૂખ ખાન સાથે ફિલ્મ ‘રઈસ’માં કામ કરનાર અભિનેત્રીના લગ્નનો વીડિયો વાયરલ થઈ રહ્યો છે, જેમાં તેનો પતિ તેને દુલ્હનના રૂપમાં જોઈને ભાવુક જોવા મળી રહ્યો છે.
સામાન્ય રીતે એવુ જોવા મળે છે કે દુલ્હન પોતાના લગ્ન સમયે ભાવુક થઈ જાય છે, પરંતુ આ લગ્નમાં તેનાથી ઉલટું જોવા મળ્યું હતું. અહીં વરરાજા પોતાની ભાવનાઓ પર કાબૂ ન રાખી શક્યા. માહિરા ખાને લગ્ન પહેલા પાંચ વર્ષ સલીમને ડેટ કર્યા હતા, ત્યારબાદ બંનેએ જીવનમાં આગળ વધવાનું નક્કી કર્યું હતું.
પોતાના આ ખાસ દિવસ માટે, માહિરા ખાને મેચિંગ ચુનરી સાથે હળવા વાદળી રંગનો લહેંગા પહેર્યો હતો. વાયરલ થઈ રહેલા વીડિયોમાં જોઈ શકાય છે કે દુલ્હન લાંબા દુપટ્ટાથી મોઢું ઢાંકીને વરરાજાની તરફ આગળ વધી રહી છે. તેમને જોઈને સલીમ કરીમ પોતાના આંસુ કાબુમાં રાખી શકતા નથી. આ સમય દરમિયાન, તેણે ઘેરા વાદળી રંગની શેરવાની પહેરી છે અને આછા વાદળી રંગની પાઘડીમાં તે સુંદર દેખાઈ રહ્યો છે.
માહિરા વરરાજા પાસે આવતાની સાથે જ વરરાજા તેનો ઘુંઘટ ઉપાડે છે અને તેનો ચહેરો જોઈને સ્મિત કરે છે. આ પછી સલીમ અને માહિરાએ એકબીજાને ગળે લગાવ્યા હતા. માહિરા ખાનના પહેલા લગ્ન વર્ષ 2007માં અલી અક્સરી સાથે થયા હતા, જે એક અભિનેતા, નિર્દેશક અને નિર્માતા છે. જો કે લગ્નના 5 વર્ષ પછી આ દંપતી અલગ થઈ ગયું હતું, પરંતુ દંપતીને એક પુત્ર પણ છે જે તેની માતા સાથે રહે છે.
થોડા વર્ષો પહેલા એવા અહેવાલો આવ્યા હતા કે માહિરા અને રણબીર કપૂર એકબીજાને ડેટ કરી રહ્યા છે. જોકે બંનેએ ક્યારેય પોતાના સંબંધો પર મૌન તોડ્યું નથી. વર્ષ 2017માં રણબીર કપૂરની કેટલીક તસવીરો સોશિયલ મીડિયા પર વાયરલ થઈ હતી જેમાં તે માહિરા ખાન સાથે ન્યૂયોર્કની સડકો પર સિગારેટ પીતો જોવા મળ્યો હતો. જેના કારણે બંને ખૂબ ટ્રોલ થયા હતા.
