‘થામા’ એ તોડ્યો ‘સૈયારા’નો રેકોર્ડ: જાણો પહેલા દિવસે કરી કેટલી કમાણી

મુંબઈ: ભારતમાં બોલિવૂડનું માર્વેલ કહી શકાય એવા મેડોક ફિલ્મ્સે ચાહકોને ‘થામા’ના રૂપમાં દિવાળીની એક પ્રભાવશાળી ભેટ આપી છે. આયુષ્માન ખુરાના, રશ્મિકા મંદાના અને નવાઝુદ્દીન સિદ્દીકી અભિનીત આ ફિલ્મને લઈને ઘણી અપેક્ષાઓ હતી કારણ કે તેના ટ્રેલરને દર્શકો તરફથી જબરદસ્ત પ્રતિસાદ મળ્યો હતો. આ હોરર-કોમેડી ફિલ્મે રિલીઝ થયાના પહેલા જ દિવસે રેકોર્ડ સર્જ્યો છે.

‘થામા’એ તોડ્યો ‘સૈયારા’નો રેકોર્ડ

‘થામા’ મેડોકની હોરર-કોમેડી યુનિવર્સની પાંચમી ફિલ્મ છે. આ સિનેમેટિક બ્રહ્માંડમાં અગાઉ ‘સ્ત્રી’, ‘ભેડિયા’ અને ‘મુંજ્યા’ જેવી ફિલ્મોનો સમાવેશ થતો હતો.‘થામા’ ફિલ્મના ટ્રેલરમાં સ્ટાર કાસ્ટની એક્ટિંગ અને સ્ટોરીના અંદાજ પરથી તે ઓપનિંગ ડે પર મોટા પાયે કમાણી કરશે એવી ફિલ્મી વિવેચકોએ આગાહી કરી હતી. આ આગાહી સાચી પડી છે.

‘થામા’ ફિલ્મે તેના પહેલા દિવસે “સૈયારા” (સૈયારા) દ્વારા સેટ કરેલા રેકોર્ડને તોડી નાખ્યો છે. ફિલ્મી સૂત્રો પાસેથી મળતી માહિતી મુજબ, ‘થામા’ ફિલ્મે રિલીઝ ડેની રાત્રે 8 વાગ્યા સુધીમાં રૂ. 22.5 કરોડની કમાણી કરી લીધી હતી. દિવસના અંત સુધીમાં આ કમાણી રૂ. 24 કરોડની આસપાસ પહોંચી હતી. આ કલેક્શન અહાન પાંડેની ફિલ્મ ‘સૈયારા’ની પહેલી ફિલ્મ કરતાં વધુ છે. ‘સૈયારા’ ફિલ્મે પહેલા દિવસે રૂ. 21 કરોડની કમાણી કરી હતી. થિયેટર ઓક્યુપન્સીની દ્રષ્ટિએ, ‘થામા’ના સવારના શોમાં 13.92% દર્શકો જોવા મળ્યા હતા. બપોરના શોમાં 21.22% દર્શકોનો અને સાંજના શોમાં 19.98% દર્શકોનો વધારો થયો હતો.

ફેમિલી સાથે જોવાય એવી મનોરંજક ફિલ્મ

આ ફિલ્મ એક વેમ્પાયર વાર્તા પર એક નવો દેખાવ આપે છે. પ્લોટ આયુષ્માન ખુરાનાના પાત્ર પર કેન્દ્રિત છે, જે અચાનક વેમ્પાયરમાં ફેરવાય જાય છે અને રશ્મિકા મંદાન્ના સાથે પ્રેમમાં પડે છે. જો કે, તેમની પ્રેમકથા અનેક પડકારોનો સામનો કરે છે. દિનેશ વિજન અને અમર કૌશિક દ્વારા નિર્મિત આ ફિલ્મને “લોહિયાળ પ્રેમકથા” કહેવામાં આવી રહી છે.

આયુષ્માન ખુરાનાએ પોતાના પાત્ર અંગે મીડિયાને જણાવ્યું હતું કે, “મારું પાત્ર ન તો ‘સ્ત્રી’ છે, ન ‘ભેડિયા’ છે, ન તો ‘મુંજ્યા’ છે. તે ‘થામા’ અથવા ‘વેતાલ’ છે. જે તદ્દન અલગ છે. આ ફિલ્મ મેડોકના હોરર-કોમેડી યુનિવર્સને આગળ લઈ જશે. આ ફિલ્મ આખા પરિવાર માટે મનોરંજક છે.”

આ પણ વાંચો…આયુષ્યમાન અને રશ્મિકા મંદાનાની થામાને મળ્યો જબરો રિસ્પોન્સ, આ ફિલ્મો સાથે થશે ટક્કર