મૂળ મરાઠી ફિલ્મ પરથી કરણ જોહરે ઈશાન ખટ્ટર અને જાન્હવી કપૂરને લઈને ધડક ફિલ્મ બનાવી હતી. આ ફિલ્મ મરાઠી ફિલ્મ જેટલો ક્રેઝ તો ન જગાવી શકી પણ તેના ગીતો અને બંને નવોદિતો ખાસ્સા લોકપ્રિય થયા હતા. હવે કરણ જોહર ‘ધડક 2’ લઈને આવી રહ્યો છે. તેનું ટ્રેલર આજે એટલે કે આજે રિલીઝ થયું છે. ચાહકો ઘણા સમયથી આ ટ્રેલરની રિલીઝની આતુરતાથી રાહ જોઈ રહ્યા હતા. ફિલ્મના ટ્રેલર પરથી તમને સ્પષ્ટપણે ખબર પડશે કે આ વખતે ‘ધડક 2’ની વાર્તા જાતિવાદની આસપાસ ફરશે.
ધડકના 6 વર્ષ પછી તેની સિક્વલ ‘ધડક 2’ ટૂંક સમયમાં સિનેમાઘરોમાં આવવા જઈ રહી છે. પહેલા ભાગની જેમ ‘ધડક 2’ ની વાર્તા પણ બે પ્રેમીઓ પર આધારિત છે, જેમની વચ્ચે સામાજિક દરજ્જાની દિવાલ એટલી મોટી છે કે તેમનો અતૂટ પ્રેમ પણ તેને તોડી શકતો નથી. કરણ જોહરની ફિલ્મ ‘ધડક 2’ માં સિદ્ધાંત ચતુર્વેદી અને તૃપ્તિ ડિમરી મુખ્ય ભૂમિકામાં છે. ‘ધડક 2’નું ટ્રેલર આજે રિલીઝ થયું છે. ચાલો જાણીએ કેવું છે ફિલ્મનું ટ્રેલર અને કેવી છે ફેન્સની પ્રતિક્રિયા?
ટ્રેલરની શરૂઆત કોલેજમાં નીલેશ (સિદ્ધાંત ચતુર્વેદી) અને વિધિ (તૃપ્તિ ડિમરી)ની મુલાકાતથી થાય છે. બંને એક જ વર્ગમાં હોય છે, મિત્રતાથી શરૂ થયેલો તેમનો સંબંધ પ્રેમમાં ફેરવાય છે. શરૂઆતમાં બધું બરાબર ચાલે છે, પણ વિધિના પરિવારને નીલેશ વિશે ખબર પડતાં જ તોફાન મચી જાય છે. પરિવારને એ વિચાર ગમતો નથી કે ઉચ્ચ જાતિની નિધિ નીચલી જાતિના છોકરાને પ્રેમ કરે કે તેની સાથે રહે. તેઓ નિલેશને માર મારે છે, તેનું અને તેના પરિવારનું અપમાન કરે છે અને તેના પર કાદવ ઉછાળે છે. પરિવાર વિધિને નિલેશથી દૂર રાખવાનો પૂરો પ્રયાસ કરે છે, પરંતુ તે તેને છોડવા તૈયાર નથી.
આપણ વાંચો: રશ્મિકા મંદાનાને ફિલ્મ ‘એનિમલ’ માટે એવું શું કહ્યું કે લોકો તેને ટ્રોલ કરી રહ્યા છે?
સિદ્ધાંત ચતુર્વેદી અને તૃપ્તિ ડીમરી પહેલી વાર કોઈ ફિલ્મમાં સાથે જોવા મળશે. તેના ટ્રેલર પર ટિપ્પણી કરતા ઘણા યુઝર્સે લખ્યું છે કે હવે તેમને ફિલ્મની રિલીઝની આતુરતાપૂર્વક રાહ જોઈ રહ્યા છે. એકે લખ્યું હતું કે ‘ગઈ વખતની જેમ આ વખતે મને નિરાશ નહીં કરતા.’ એકે લખ્યું, ‘તૃપ્તિ ફરી તેના અંદાજમાં આવી ગઈ છે.’ તમને જણાવી દઈએ કે આ ફિલ્મ આ વર્ષે 1 ઓગસ્ટના રોજ સિનેમાઘરોમાં રિલીઝ થશે. ‘ધડક 2’ માં તૃપ્તિ ડિમરી, સિદ્ધાંત ચતુર્વેદી, સૌરભ સચદેવ, મંજીરી પુપાલા, વિપિન શર્મા, દિશાંક અરોરા જેવા કલાકારો મુખ્ય ભૂમિકામાં છે.
