આજથી મહારાષ્ટ્રના મુંબઈ સહિત દેશભરમાં ભક્તોએ ધામધૂમથી ગણપતિ બાપ્પાનું સ્વાગત કર્યું છે અને આગામી 10 દિવસ સુધી આખો દેશ ગણેશોત્સવના રંગે રંગાયેલું જોવા મળશે. આ બધામાં અનેક બોલીવૂડ સેલેબ્સ પણ બાપ્પાની પોતાના ઘરે સ્થાપના કરીને પૂજા-અર્ચના કરે છે. ટૂંકમાં કહીએ તો બોલીવૂડ સેલેબ્સ જ નહીં પણ બોલીવૂડની ફિલ્મોમાં પણ ગણેશોત્સવની ધામ-ધૂમ દેખાડવામાં આવી છે. ચાલો એક નજર કરીએ બોલીવૂડની એવી ફિલ્મો અને સોન્ગ પર કે જેમાં લાડકા બાપ્પાનો જાદુ જોવા મળે છે-
દેવા શ્રી ગણેશા… (અગ્નિપથ)
2012માં આવેલી રીતિક રોશન સ્ટારર આ ફિલ્મમાં ગણેશોત્સવની ભવ્યતા દેખાડવામાં આવી છે અને આ ફિલ્મમાં દેવા શ્રી ગણેશા નામનું એક સોન્ગ પણ ફિલ્માવવામાં આવ્યું છે. આ સોન્ગ પર રીતિક રોશનનું એનર્જેટિક પર્ફોર્મન્સ આજે પણ દર્શકોના માનસપટ પર એકદમ તરોતાજા છે. આ ગીત જ ફિલ્મની સ્ટોરીનો એક મહત્ત્વનો હિસ્સો છે.
મોર્યા રે મોર્યા રે… (ડોન)
શાહરુખ ખાનની 2006માં આવેલી ફિલ્મ ડોનમાં શાહરૂખ ખાન પર આ ગીત ફિલ્માવવામાં આવ્યું છે. આ ગીત એક રીતે જોવા જઈએ તો શાહરૂખ ખાનના કેરેક્ટરની એન્ટ્રી માટેનું છે. કિંગ ખાન આ ગીતમાં ઢોલ વગાડતો અને ગણેશભક્તિના રંગે રંગાયોલે જોવા મળે છે. ફિલ્મનું આ ગીત સુપરહિટ રહ્યું હતું.
મેરા હી જલવા (વોન્ડેટ)
2009માં આવેલી ફિલ્મ વોન્ટેડમાં સલમાન ખાન લીડ રોલમાં જોવા મળ્યો હતો. આ ફિલ્મમાં પણ સલમાન ખાન મેરા હી જલવા ગીત પર પર્ફોર્મન્સ આપતો જોવા મળ્યો હતો. આ ગીત પણ ગણેશોત્સવ પર જ આધારિત હતું. એટલું જ નહીં પણ આ ફિલ્મમાં અનિલ કપૂરની પણ એક ઝલક જોવા મળી હતી.
ગજાનન ગજાનન… (બાજીરાવ મસ્તાની)
2010માં આવેલી ફિલ્મ બાજીરાવ મસ્તાનીના આ ગીતમાં પણ ગણેશોત્સવની ઝલક દેખાડવામાં આવી છે. આ ફિલ્મમાં રણવીર સિંહ અને દીપિકા પદુકોણ લીડ રોલમાં જોવા મળ્યા હતા. ફિલ્મમાં ગણપતિજીની વિશાળકાય પ્રતિમાની સામે રણવીર સિંહ આરતી કરતાં જોવા મળ્યો હતો. દર્શકો આ દ્રશ્યની ભવ્યતા જોઈને અંજાઈ ગયા હતા.
સુનો ગણપતિ બપ્પા મોરયા… (જુડવા)
વરુણ ધવન સ્ટારર ફિલ્મ જુડવા 2017માં આવેલી. ફિલ્મમાં સુનો ગણપતિ બપ્પા મોરયા ખુબ જ શાનદાર રીતે રજૂ કરવામાં આવ્યું છે. વરુણે આ ગીતમાં કમાલનું પર્ફોર્મન્સ આપ્યું છે. ગણેશોત્સવમાં આ ગીત અચૂક વગાડવામાં આવે છે.
