‘કાંટા લગા ગર્લ’ શેફાલી જરીવાલાના નિધનથી સોશિયલ મીડિયા પર એક વિચિત્ર ચર્ચા શરૂ થઈ છે. હકીકતમાં અભિનેત્રીના અકાળે નિધન પછી સમાચાર આવ્યા છે કે તે વૃદ્ધત્વ વિરોધી સારવાર લઈ રહી હતી. કદાચ આ પણ તેના મૃત્યુનું કારણ હોઈ શકે છે. ત્યારે સોશિયલ મીડિયા પર ચર્ચાએ જોર પકડ્યું છે કે શું સુંદર દેખાવા માટે આ દવાઓ લેવી જરૂરી છે? આ દરમિયાન કરીના કપૂરનું એક નિવેદન વાયરલ થઈ રહ્યું છે.
ઘણી બોલીવુડની અભિનેત્રીઓ બોટોક્સની વિરુદ્ધ છે. કરીના કપૂર પણ તેમાં સામેલ છે. તેનું એક જૂનું નિવેદન વાયરલ થઈ રહ્યું છે. જેમાં તેણે કહ્યું હતું કે તે બોટોક્સની સંપૂર્ણ વિરુદ્ધ છે. કરીના કપૂરે બરખા દત્તને આપેલા ઇન્ટરવ્યુમાં આ વિશે વાત કરી હતી.
અભિનેત્રીએ કહ્યું હતું કે હું બોટોક્સની વિરુદ્ધ છું. હું સ્વસ્થ રહેવા, સારું અનુભવવા માટે કુદરતી ઉપાયો અને સ્વ-બચાવના પક્ષમાં છું. આનો અર્થ મારો પોતાનો અને મારી પ્રતિભાનો બચાવ કરવાનો પણ છે કારણ કે આ મારું સૌથી મોટું હથિયાર છે. સોય અને છરીને બદલે, સ્વ-બચાવનો એક સારો રસ્તો એ છે કે વેકેશન લો અને તમારા મિત્રો અને પરિવાર સાથે ક્વાલિટી ટાઈમ વિતાવો.
બોલીવુડની લોકપ્રિય અભિનેત્રી શેફાલી જરીવાલાનું શુક્રવારે મોડી રાત્રે હૃદયરોગના હુમલાને કારણે અવસાન થયું હોવાનું કહેવાય છે. જોકે, અભિનેત્રીનો પોસ્ટમોર્ટમ રિપોર્ટ હજુ સુધી જાહેર કરવામાં આવ્યો નથી.
અહેવાલો અનુસાર અભિનેત્રી પાંચ વર્ષથી વૃદ્ધત્વ વિરોધી સારવાર (એન્ટિ એજિંગ ટ્રીટમેન્ટ) લઈ રહી હતી. જે દિવસે અભિનેત્રીનું અવસાન થયું તે દિવસે પણ તેણે વૃદ્ધત્વ વિરોધી ઇન્જેક્શન લીધા હતા. પોલીસ હાલમાં સમગ્ર કેસની તપાસ કરી રહી છે. આ કેસમાં અત્યાર સુધીમાં લગભગ 14 લોકોના નિવેદનો નોંધવામાં આવ્યા છે.
આપણ વાંચો : વાયરલ વીડિયો: પારસ છાબડાએ શેફાલીને આપ્યા હતા મૃત્યુના અણસાર, જન્માક્ષર જોઈ કરી હતી ભવિષ્યવાણી…
