ગુરુનાનક જયંતી સંસારમાં રહીને પણ ભગવદ્ ભક્તિ થઇ શકે છે

આચમન -કબીર સી. લાલાણી

શાંતિ પમાડે તે સંત અને લઘુતા દૂર કરે તે ગુરુ.
૫૫૦-૫૫૫ વર્ષ પૂર્વે જન્મેલા ગુરુ નાનકદેવ સંત અને ગુરુ બન્ને હતા.

• અન્યો સાથે વહેંચો
• ઇમાનદારીપૂર્વક જીવો અને
• સતત ઇશ્ર્વરનું નામ જપતા રહો…
• ગુરુ નાનકદેવે આ ત્રણ મુખ્ય પાયા પર શીખ ધર્મની સ્થાપના કરી.
• હિન્દુ-ઇસ્લામના સુભગ સમન્વયસમા શીખ ધર્મમાં બંને ધર્મનું નવનીત છે.
  વહાલા શ્રદ્ધાળુ વાચક મિત્રો ! મૂળ હિન્દુ પરિવારમાં જન્મેલા નાનકદેવે ભક્તિ અને સૂફી ચળવળો-સંપ્રદાયોમાંથી કેટલીક બાબતો લીધી અને નવો ધર્મ સ્થાપ્યો :
• શીખ ધર્મ માત્ર રહેણીકરણી કે ધાર્મિક વિધિઓ પૂરતો સીમિત નથી.
• સાડા પાંચ સદી પૂર્વે ભારતની સમકાલીન સ્થિતિને અનુરૂપ ધર્મ છે.
• પંજાબના તલવંડી નગરના કારભારી કાલુચંદને ત્યાં ઇ. સ. ૧૪૬૦ના જન્મેલા નાનક સાહિબના જન્મકુંડલી બનાવનાર પંડિત હરદયાળે કહ્યું કે આ છોકરો કાં તો મહાન બાદશાહ થશે અથવા જગવિખ્યાત સંત.
• એનું નામ નાનક રાખો.
• બાળપણથી નાનક બીજાં બાળકો કરતાં જુદા તરી આવતા.
• માતા કાંઇક આપે તો નાનક તરત શેરીમાં દોડી જાય અને બીજાઓને વહેંચીને પછી વધે તો પોતે ખાય.
• બીજાઓને ખાતાં જોઇને એ ખૂબ ખુશ થતા.
• એના મનમાં થતું કે મારા પિતાની પાસે અખૂટ ધનસંપત્તિ છે તો પછી શા માટે કોઇ ભૂખ્યું-તરસ્યું કે અર્ધનગ્ન રહે.
• પિતાએ પોતાની સંપત્તિથી બધાને સંતોષવા જોઇએ.
  સમભાવના સ્વામી:
• બાળપણથી નાનકમાં ગજબનો સમભાવ જોવા મળતો.
• કોઇ પીર-ફકીર કે મૌલવી દેખાય તો આપોઆપ આ બાળક બોલતો-
  અલ્લાહ મહાન છે.
• પરવરદિગાર દયાળુ છે.
• કોઇ હિન્દુ સાધુ-સંત દેખાય તો બાળનાનક બોલી ઊઠતા:
• ધાર્યું ધણીનું થાય.
• ગોવિંદાનો મહિમા અપાર છે.
• આમ હિન્દુ-મુસલમાન બન્નેને આ બાળક ખુશ કરતો.
• નાનકનો કુરાન શરીફનો અભ્યાસ એટલો બધો ઊંડો છે કે તેમનાં લગભગ બધાં ભજનો કાવ્યોમાં કુરાન કરીમની ઊંડી અસર દેખાય છે.
• નાનકની ઇશ્ર્વરપ્રીતિ જોઇને તેમના શિક્ષક ગોપાલે પિતાને સમજાવ્યા કે દીકરા નાનકને કોઇ પંડિતના હાથ નીચે હિન્દુ ધર્મના શાસ્ત્રો ભણાવો.
• નાનકની જબરદસ્ત ગ્રહણશક્તિ અને તેજસ્વી પ્રતિભા જોઇને પંડિત બ્રિજનાથ પણ અંજાઇ ગયા.
  સંસ્કૃત ભાષા અને સાહિત્યના ઊંડા અભ્યાસી પંડિત બ્રિજનાથને નાનક પર આધ્યાત્મિક પ્રભાવ જોઇને થયું કે ખરેખર તો મારી આ છોકરા પાસે કોઇ વિસાત નથી.
  જાણવા જેવું:
• નાનકદેવે કદી સંસાર તજ્યો નહોતો.
• બટાલાના પટવારી મુલચંદની પુત્રી સુલક્ષણી સાથે તેમનાં લગ્ન થયાં હતાં અને આ લગ્નથી તેમને બે દીકરા પણ થયા હતા.
• સંસારમાં રહીને નાનક સતત ઇશ્ર્વર સ્મરણ કરતાં.
  તેમણે પુરવાર કર્યું છે કે-
• પ્રભુની ભક્તિ કરવા માટે સંસાર છોડીને ભગવાં પહેરવાની જરૂર નથી.
• સંસારમાં રહીને પણ ભગવદ્ ભક્તિ થઇ શકે છે.
• સાચા ભક્તને તેની દરેક આપત્તિમાં ભગવાન મદદ કરે છે.
  -કોમ -ભાઇબંધ કોમના સૌ વાચકોને ગુરુનાનક જયંતીની શુભેચ્છા.
  સત્નામ-વાહેગુરુ.