(વાણિજ્ય પ્રતિનિધિ તરફથી)
નવી મુંબઈઃ મહારાષ્ટ્રની ખાંડ મિલો પર ગઈકાલે સ્થાનિક તેમ જ દેશાવરોની માગ ખપપૂરતી મર્યાદિત રહેતાં ટેન્ડરોમાં વેપાર ક્વિન્ટલે રૂ. 10ના ઘટાડા સાથે રૂ. 3860થી 3900માં થયાના નિર્દેશો હતા. જોકે, આજે સ્થાનિક જથ્થાબંધ ખાંડ બજારમાં સપ્તાહના અંતને કારણે સ્ટોકિસ્ટોની લેવાલી ખપપૂરતી અને રિટેલ સ્તરની માગ છૂટીછવાઈ રહેતાં હાજર ભાવમાં માગ તથા માલની ગુણવત્તા અનુસાર મિશ્ર વલણ રહ્યું હતું, જ્યારે નાકા ડિલિવરી ધોરણે મથકો પાછળ ભાવમાં ક્વિન્ટલે રૂ. પાંચથી 20નો ઘટાડો જોવા મળ્યો હતો.
બજારનાં સાધનોના જણાવ્યાનુસાર આજે સ્થાનિકમાં અંદાજે 27થી 28 ટ્રકની આવક સામે સ્ટોકિસ્ટો નવી લેવાલીથી દૂર રહ્યા હતા. તેમ જ રિટેલ સ્તરની માગ પણ ખપપૂરતી રહેતાં ઉપાડ અંદાજે 25થી 26 ટ્રકનો રહ્યો હતો. જોકે, મથકો પરના નિરુત્સાહી અહેવાલ સાથે આજે હાજરમાં માગ તથા માલની ગુણવત્તાને ધ્યાનમાં લેતા સ્મોલ ગ્રેડની ખાંડના વેપાર નીચલા મથાળેથી ક્વિન્ટલે રૂ. 20ના સુધારા અને ઉપલા મથાળેથી રૂ. 10ના ઘટાડા સાથે રૂ. 4032થી 4062માં અને મિડિયમ ગ્રેડની ખાંડના વેપાર નીચલા મથાળેથી ક્વિન્ટલે રૂ. ચારના સુધારા અને ઉપલા મથાળેથી રૂ. 10ના ઘટાડા સાથે રૂ. 4066થી 4132માં ગુણવત્તાનુસાર ધોરણે થયા હતા.
આ પણ વાંચો: ખાંડમાં મથકો પાછળ ટકેલું વલણ
વધુમાં આજે નાકા ડિલિવરી ધોરણે ઔદ્યોગિક વપરાશકારો તથા સ્થાનિક ડીલરોની છૂટીછવાઈ માગ જળવાઈ રહી હતી. તેમ છતાં મથકો પાછળ ભાવમાં નરમાઈનું વલણ રહેતાં સ્મોલ ગ્રેડની ખાંડના વેપાર નીચલા મથાળેથી ક્વિન્ટલે રૂ. પાંચના ઘટાડા સાથે રૂ. 3930થી 3960માં અને મિડિયમ ગ્રેડની ખાંડના વેપાર ઉપલા મથાળેથી ક્વિન્ટલે રૂ. 20ના ઘટાડા સાથે રૂ. 3970થી 4000માં થયાના અહેવાલ હતા.
