(વાણિજ્ય પ્રતિનિધિ તરફથી)
મુંબઈઃ સ્થાનિક ઈક્વિટી માર્કેટમાં સુધારાતરફી વલણ ઉપરાંત આજે વિશ્વ બજારમાં બે્રન્ટ ક્રૂડતેલના વાયદામાં ભાવઘટાડો જોવા મળ્યો હોવાના અહેવાલ અને અમેરિકા સાથે ટૂંક સમયમાં ટ્રેડ ડીલ થઈ જવાના આશાવાદ સાથે આજે સ્થાનિક ફોરેક્સ માર્કેટમાં ડૉલર સામે રૂપિયામાં ચાર પૈસાના સુધારા સાથે 88.56ની સપાટીએ બંધ રહ્યો હતો. જોકે, આજે વિશ્વ બજારમાં ડૉલર ઈન્ડેક્સમાં સુધારો અને ગઈકાલે વિદેશી સંસ્થાકીય રોકાણકારોની ઈક્વિટીમાં વેચવાલીનું દબાણ જળવાઈ રહ્યું હોવાથી રૂપિયામાં સુધારો મર્યાદિત રહ્યો હોવાનું ફોરેક્સ ટ્રેડરોએ જણાવ્યું હતું.
બજારનાં સૂત્રોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના 88.60ના બંધ સામે સુધારાના અન્ડરટોને 88.57ની સપાટીએ ખૂલ્યા બાદ સત્ર દરમિયાન નીચામાં 88.59 અને ઉપરમાં 88.41 સુધી મજબૂત થયા બાદ અંતે ગઈકાલના બંધ સામે ચાર પૈસા વધીને 88.56ના મથાળે બંધ રહ્યો હતો.
આ પણ વાંચો: ડૉલરની મજબૂતી સાથે વૈશ્વિક સોનામાં ઘટ્યા મથાળેથી ટકેલું વલણ
હાલમાં અમેરિકા સાથેની ટ્રેડ ડીલના આશાવાદ અને વૈશ્વિક બજારમાં સુધારાતરફી વલણના નિર્દેશો સાથે ડૉલર સામે સુધારાતરફી વલણ રહે તેવી શક્યતા વ્યક્ત કરતાં મિરે એસેટ્ શૅરખાનના વિશ્લેષક અનુજ ચૌધરીએ જણાવતાં ઉમેર્યું હતું કે શક્યતઃ ડૉલરમાં આયાતકારોની લેવાલી અને વિદેશી સંસ્થાકીય રોકાણકારોની વેચવાલીનું દબાણ રૂપિયામાં સુધારો મર્યાદિત રાખી શકે છે. તેમ છતાં અમારા મતે આગામી ટૂંકા સમયગાળા દરમિયાન ડૉલર સામે રૂપિયાની રેન્જ 88.25થી 88.70ની રહે તેમ જણાય છે.
દરમિયાન આજે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 513.45 પૉઈન્ટનો અને 142.60 પૉઈન્ટનો સુધારો આવ્યો હોવાથી તેમ જ વિશ્વ બજારમાં બે્રન્ટ ક્રૂડતેલના વાયદામાં ભાવ ગઈકાલના બંધ સામે 0.46 ટકા ઘટીને બેરલદીઠ 64.58 ડૉલર આસપાસ ક્વૉટ થઈ રહ્યા હોવાથી રૂપિયાના સુધારાને ટેકો મળ્યો હતો. જોકે, ગઈકાલે વિદેશી સંસ્થાકીય રોકાણકારની ઈક્વિટીમાં રૂ. 728.82 કરોડની ચોખ્ખી વેચવાલીના તેમ જ વિશ્વ બજારમાં ડૉલર ઈન્ડેક્સ 0.18 ટકા વધીને 99.63 આસપાસ ક્વૉટ થઈ રહ્યો હોવાથી રૂપિયામાં સુધારો સીમિત રહ્યો હોવાનું સૂત્રોએ ઉમેર્યું હતું.
