(વાણિજ્ય પ્રતિનિધિ તરફથી)
મુંબઈઃ સ્થાનિક ફોરેક્સ માર્કેટમાં આજે ડૉલરમાં આયાતકારોની લેવાલી ઉપરાંત વિશ્વ બજારમાં ડૉલર ઈન્ડેક્સમાં મજબૂત વલણ રહ્યું હોવાના નિર્દેશો સાથે સ્થાનિક ફોરેક્સ માર્કેટમાં ડૉલર સામે રૂપિયો ગઈકાલના બંધ સામે પાંચ પૈસાના ઘટાડા સાથે ગત 30મી સપ્ટેમ્બરની ઐતિહાસિક નીચી 88.80ની નીચી સપાટીએ બંધ રહ્યો હતો.
એકંદરે તાજેતરના અમેરિકી ગવર્મેન્ટ શટડાઉનને કારણે આર્થિક ડેટાઓની ગેરહાજરીને કારણે રૂપિયો સાંકડી વઘઘટે અથડાઈ ગયો હોવાનું ટ્રેડરોએ જણાવ્યું હતું.
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના 88.75ના બંધ સામે સાધારણ નરમાઈના અન્ડરટોને 88.76ના મથાળે ખૂલ્યા બાદ સત્ર દરમિયાન નીચામાં 88.81 અને ઉપરમાં 88.74ની રેન્જમાં અથડાઈને અંતે પાંચ પૈસાના ઘટાડા સાથે 88.80ના મથાળે બંધ રહ્યો હતો. નોંધનીય બાબત એ છે કે ગઈકાલે ડૉલર સામે રૂપિયો ચાર પૈસા નબળો પડ્યો હતો.
એકંદરે ડૉલરમાં મજબૂત વલણ રહ્યું હોવાથી રૂપિયો દબાણ હેઠળ આવ્યો હતો. જોકે, સ્થાનિક ઈક્વિટી માર્કેટમાં સુધારાતરફી વલણ અને બે્રન્ટ ક્રૂડતેલના વાયદામાં નરમાઈ રહેવાની સાથે સંભવિતપણે રિઝર્વ બૅન્કનો પણ બજારમાં હસ્તક્ષેપ રહ્યો હોવાથી રૂપિયાને ટેકો મળ્યો હોવાનું મિરે એસેટ શૅરખાનના વિશ્લેષક અનુજ ચૌધરીએ જણાવ્યું હતું.
આપણ વાંચો: ફરી ડૉલર સામે રૂપિયો ગગડ્યોઃ જાણો ક્યા પહોંચ્યો
દરમિયાન આજે વિશ્વ બજારમાં ડૉલર ઈન્ડેક્સ ગઈકાલના બંધ સામે 0.01 ટકા વધીને 98.92 આસપાસ ક્વૉટ થઈ રહ્યો હતો, જ્યારે બે્રન્ટ ક્રૂડતેલના વાયદામાં ભાવ ગઈકાલના બંધ સામે 0.20 ટકા ઘટીને બેરલદીઠ 66.12 ડૉલર આસપાસ ક્વૉટ થઈ રહ્યા હતા.
તેમ જ સ્થાનિક સ્તરે બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 398.44 પૉઈન્ટનો અને 135.65 પૉઈન્ટનો સુધારો આવ્યો હોવાથી અને ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 81.21 કરોડની ચોખ્ખી લેવાલી રહી હોવાથી રૂપિયામાં મોટું ધોવાણ અટક્યું હોવાનું સૂત્રોએ જણાવ્યું હતું.
