(વાણિજ્ય પ્રતિનિધિ તરફથી)
મુંબઈઃ સ્થાનિક ઈક્વિટી માર્કેટમાં આજે જોવા મળેલા નરમાઈતરફી વલણ ઉપરાંત ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 4171.75 કરોડની ચોખ્ખી વેચવાલી રહી હોવાના નિર્દેશો સાથે સ્થાનિક ફોરેક્સ માર્કેટમાં આજે વિશ્વ બજારમાં બે્રન્ટ ક્રૂડતેલના વાયદામાં ભાવઘટાડો આવ્યો હોવાથી ડૉલર સામે રૂપિયામાં સત્ર દરમિયાન જોવા મળેલો 14 પૈસાનો સુધારો ધોવાઈ ગયો હતો અને સત્રના અંતે રૂપિયો છ પૈસાની નરમાઈ સાથે 89.22ની સપાટીએ બંધ રહ્યો હોવાનું ફોરેક્સ ટ્રેડરોએ જણાવ્યું હતું.
બજારનાં સાધનોના જણાવ્યાનુસાર આજે સત્રના આરંભે ડૉલર સામે રૂપિયો ગઈકાલના 89.16ના બંધ સામે મજબૂત અન્ડરટોને 89.02ની સપાટીએ ખૂલ્યા બાદ સત્ર દરમિયાન નીચામાં 89.27 અને ઉપરમાં 89.02ની રેન્જમાં અથડાઈને અંતે ગઈકાલના બંધ સામે છ પૈસા ઘટીને 89.22ના મથાળે બંધ રહ્યો હતો. અત્રે ઉલ્લેખનીય બાબત એ છે કે ગત શુક્રવારે રૂપિયામાં 98 પૈસાનો કડાકો બોલાઈ ગયા બાદ ગઈકાલે 50 પૈસાનું બાઉન્સબૅક જોવા મળ્યું હતું.
આ પણ વાંચો: નાણાકીય વર્ષ 2026માં દેશનું અર્થતંત્ર ચાર ટ્રિલ્યન ડૉલર પાર કરશે
આજે સ્થાનિક ઈક્વિટી માર્કેટમાં સત્રના આરંભે સુધારાતરફી વલણ રહેવાની સાથે વિશ્વ બજારમાં બે્રન્ટ ક્રૂડતેલના વાયદામાં પણ ભાવઘટાડો આગળ ધપ્યો હોવાથી રૂપિયાના સુધારાને ટેકો મળ્યો હતો, પરંતુ ત્યાર બાદ ઈક્વિટી માર્કેટમાં પીછેહઠ અને વિદેશી સંસ્થાકીય રોકાણકારોની વેચવાલી જળવાઈ રહી હોવાના અહેવાલે રૂપિયામાં પીછેહઠ જોવા મળી હોવાનું મિરે એસેટ્ શૅરખાનના વિશ્લેષક અનુજ ચૌધરીએ જણાવતાં ઉમેર્યું હતું કે ફેડરલ રિઝર્વ દ્વારા આગામી ડિસેમ્બર મહિનાની નીતિવિષયક બેઠકમાં વ્યાજદરમાં કાપ મૂકશે કે કેમ તેની અવઢવ વચ્ચે રૂપિયામાં ચંચળતાનું વલણ જળવાઈ રહેતાં રૂપિયો 89થી 89.50 આસપાસની રેન્જમાં રહે તેવી શક્યતા નકારી ન શકાય.
દરમિયાન આજે વિશ્વ બજારમાં ડૉલર ઈન્ડેક્સ ગઈકાલના બંધ સામે 0.06 ટકા ઘટીને 100.01 આસપાસ અને બે્રન્ટ ક્રૂડતેલના વાયદામાં ભાવ 0.49 ટકા ઘટીને બેરલદીઠ 63.06 આસપાસ ક્વૉટ થઈ રહ્યા હતા. તેમ છતાં સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 313.70 પૉઈન્ટનો અને 74.70 પૉઈન્ટનો ઘટાડો આવ્યો હોવાથી રૂપિયો વધુ દબાણ હેઠળ આવ્યો હોવાનું સૂત્રોએ ઉમેર્યું હતું.
