(વાણિજ્ય પ્રતિનિધિ તરફથી)
મુંબઈઃ સ્થાનિક ઈક્વિટી માર્કેટમાં આગળ ધપી રહેલી નરમાઈ, વિદેશી સંસ્થાકીય રોકાણકારોની વેચવાલી તેમ જ વિશ્વ બજારમાં બે્રન્ટ ક્રૂડતેલના વાયદામાં ભાવ વધી આવ્યા હોવા છતાં આજે ખાસ કરીને આંતરરાષ્ટ્રીય વિનિમય બજારમાં ડૉલર ઈન્ડેક્સમાં નરમાઈનું વલણ રહ્યું હોવાના નિર્દેશો સાથે સ્થાનિક ફોરેક્સ માર્કેટમાં ડૉલર સામે રૂપિયો સાધારણ ચાર પૈસાના સુધારા સાથે ઐતિહાસિક નીચી સપાટીએથી પાછો ફરીને 88.72ના મથાળે બંધ રહ્યો હતો.
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના 88.76ના બંધ સામે સુધારાના અન્ડરટોને 88.72ની સપાટીએ ખૂલ્યા બાદ સત્ર દરમિયાન નીચામાં 88.74 અને ઉપરમાં 88.67ની સાંકડી રેન્જમાં અથડાઈને અંતે ગઈકાલના બંધ સામે સાધારણ ચારપૈસાના સુધારા સાથે 88.72ના મથાળે રહ્યા હતા. નોંધનીય બાબત એ છે કે ગઈકાલે ડૉલર સામે રૂપિયો એક પૈસાની નરમાઈ સાથે નવી નીચી સપાટીએ બંધ રહ્યો હતો.
આજે શક્યતઃ સત્રના આરંભે રિઝર્વ બૅન્કે બજારમાં હસ્તક્ષેપ કરતાં ડૉલર સામે રૂપિયામાં સુધારાતરફી વલણ જોવા મળ્યું હતું. જોકે, અમેરિકાએ ફાર્મા, ફર્નિચર અને ટ્રક પર 100 ટકા ટૅરિફ લાદવાની જાહેરાત કરી હોવાથી રૂપિયો દબાણ હેઠળ આવ્યો હતો અને સત્ર દરમિયાન જોવા મળેલો નવ પૈસાનો સુધારો ધોવાયો હોવાનું ફિનરેક્સ ટ્રેઝરી એડ્વાઈઝર્સનાં ટ્રેઝરી હેડ અને એક્ઝિક્યુટિવ ડિરેક્ટર અનિલકુમાર ભણસાળીએ જણાવતા ઉમેર્યું હતું કે અમારા મતાનુસાર આગામી ટૂંકા સમયગાળામાં ડૉલર સામે રૂપિયો 88.50થી 89 આસપાસની રેન્જમાં રહે તેવી શક્યતા છે.
દરમિયાન આજે વિશ્વ બજારમાં બે્રન્ટ ક્રૂડતેલના વાયદામાં ભાવ ગઈકાલના બંધ સામે 0.39 ટકા વધીને બેરલદીઠ 69.15 ડૉલર આસપાસ ક્વૉટ થઈ રહ્યા હતા, જ્યારે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 733.22 પૉઈન્ટનો અને 236.15 પૉઈન્ટનો ઘટાડો આવ્યો હતો તેમ જ ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. 4995.42 કરોડની ચોખ્ખી વેચવાલી રહી હોવાના અહેવાલ હતા. જોકે, આજે વિશ્વ બજારમાં ડૉલર ઈન્ડેક્સ ગઈકાલના બંધ સામે .019 ટકા ઘટીને 98.37 આસપાસ ક્વૉટ થઈ રહ્યો હોવાથી તેમ જ સંભવિતપણે રિઝર્વ બૅન્કના હસ્તક્ષેપથી રૂપિયાના સુધારાને ટેકો મળ્યો હોવાનું સૂત્રોએ ઉમેર્યું હતું
