(વાણિજ્ય પ્રતિનિધિ તરફથી)
મુંબઈઃ સ્થાનિક જથ્થાબંધ ધાતુ બજારમાં ગઈકાલે સ્ટોકિસ્ટોની આક્રમક લેવાલીને ટેકે ભાવમાં ઉછાળા જોવા મળ્યા બાદ આજે ઊંચા મથાળેથી નફારૂપી વેચવાલીનું દબાણ જોવા મળ્યું હતું. જેમાં મુખ્યત્વે ટીન, નિકલ, કોપર સ્ક્રેપ હેવી સિવાય કોપરની અન્ય વેરાઈટીઓ, બ્રાસ શીટ કટિંગ્સ અને એલ્યુમિનિયમ ઈન્ગોટ્સમાં કિલોદીઠ રૂ. બેથી 16 સુધીનો ઘટાડો આવ્યો હતો.
જોકે, આજે માત્ર ઝિન્ક સ્લેબમાં વપરાશકાર ઉદ્યોગની લેવાલીને ટેકે ભાવ કિલોદીઠ રૂ. એક વધી આવ્યા હતા અને કોપર સ્ક્રેપ હેવી, બ્રાસ યુટેન્સિલ્સ સ્ક્રેપ, એલ્યુમિનિયમ યુટેન્સિલ્સ સ્ક્રેપ તથા લીડ ઈન્ગોટ્સમાં ખપપૂરતી માગને ટેકે ભાવમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે સ્થાનિકમાં મુખ્યત્વે નિકલ, કોપર વાયરબાર, કોપર યુટેન્સિલ્સ સ્ક્રેપ અને ટીનમાં સ્ટોકિસ્ટોની આક્રમક નફારૂપી વેચવાલી અને વપરાશકારોની માગ ખપપૂરતી રહેતાં ભાવ અનુક્રમે કિલોદીઠ રૂ. 16 ઘટીને રૂ. 1352, રૂ. 11 ઘટીને રૂ. 1037, રૂ. 10 ઘટીને રૂ. 860 અને રૂ. નવ ઘટીને રૂ. 3266ના મથાળે રહ્યા હતા.
વધુમાં આજે અન્ય ધાતુઓ જેમાં સ્ટોકિસ્ટોની છૂટીછવાઈ વેચવાલી અને સાર્વત્રિક સ્તરેથી માગ નિરસ રહેતાં ભાવમાં ઘટાડાતરફી વલણ જોવા મળ્યું હતું તેમાં બ્રાસ શીટ કટિંગ્સના ભાવ કિલોદીઠ રૂ. પાંચ ઘટીને રૂ. 650, કોપર કેબલ સ્ક્રેપ અને કોપર આર્મિચરના ભાવ કિલોદીઠ રૂ. બે ઘટીને અનુક્રમે રૂ. 956 અને રૂ. 926 અને એલ્યુમિનિયમ ઈન્ગોટ્સના ભાવ કિલોદીઠ રૂ. એક ઘટીને રૂ. 273ના મથાળે રહ્યા હતા.
જોકે, આજે એકમાત્ર ઝિન્ક સ્લેબમાં ઔદ્યોગિક વપરાશકારોની માગને ટેકે ભાવ કિલોદીઠ રૂ. એક વધીને રૂ. 304ના મથાળે અને ખપપૂરતી માગને ટેકે કોપર સ્ક્રેપ હેવી, બ્રાસ યુટેન્સિલ્સ સ્ક્રેપ, એલ્યુમિનિયમ યુટેન્સિલ્સ સ્ક્રેપ તથા લીડ ઈન્ગોટ્સના ભાવ અનુક્રમે કિલોદીઠ રૂ. 942, રૂ. 600, રૂ. 217 અને રૂ. 184ના મથાળે ટકેલા રહ્યાના અહેવાલ હતા.
