(વાણિજ્ય પ્રતિનિધિ તરફથી)
મુંબઈઃ વૈશ્વિક વિનિમય બજારમાં ડૉલર ઈન્ડેક્સની નરમાઈનું વલણ રહેતાં આજે લંડન મેટલ એક્સચેન્જ ખાતે સત્રના આરંભે કોપર સહિતની ચોક્કસ ધાતુઓમાં સુધારાતરફી વલણ રહ્યું હોવાના નિર્દેશો સાથે સ્થાનિક જથ્થાબંધ ધાતુ બજારમાં પણ ખાસ કરીને કોપર વાયરબારમાં રહેલા ટકેલા વલણને બાદ કરતાં કોપરની અન્ય તમામ વેરાઈટીઓમાં ઔદ્યોગિક વપરાશકારોની માગને ટેકે ભાવમાં કિલોદીઠ રૂ. બેથી ત્રણનો સુધારો આવ્યો હતો. જોકે, આજે નિકલ, ટીન અને ઝિન્ક સ્લેબમાં સ્ટોકિસ્ટોની વેચવાલીનું દબાણ રહેતાં ભાવમાં અનુક્રમે કિલોદીઠ રૂ. 21, રૂ. આઠ અને રૂ. ત્રણનો ઘટાડો આવ્યો હતો અને અન્ય ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે વૈશ્વિક પ્રોત્સાહક અહેવાલે કોપરની અમુક વેરાઈટીઓમાં ઔદ્યોગિક વપરાશકારો તથા સ્થાનિક ડીલરોની માગને ટેકે ભાવમાં સુધારાતરફી વલણ જોવા મળ્યું હતું, જેમાં કોપર કેબલ સ્ક્રેપ, કોપર આર્મિચર અને કોપર યુટેન્સિલ્સ સ્ક્રેપના ભાવ કિલોદીઠ રૂ. ત્રણ વધીને અનુક્રમે રૂ. 864, રૂ. 837 અને રૂ. 776 તથા કોપર ક્રેપ હેવીના ભાવ કિલોદીઠ રૂ. બે વધીને રૂ. 776ના મથાળે રહ્યા હતા, જ્યારે કોપર વાયરબારના ભાવ કિલોદીઠ રૂ. 940ના મથાળે ટકેલા રહ્યા હતા.
વધુમાં આજે નિકલ, ટીન અને ઝિન્ક સ્લેબમાં સ્ટોકિસ્ટોની વેચવાલીનું દબાણ રહેવાની સાથે વપરાશકાર ઉદ્યોગ તથા સ્થાનિક ડીલરોની માગ નિરસ રહેતાં ભાવ અનુક્રમે કિલોદીઠ રૂ. 21 ઘટીને રૂ. 1342, રૂ. આઠ ઘટીને રૂ. 3127 અને રૂ. ત્રણ ઘટીને રૂ. 276ના મથાળે રહ્યા હતા. આ સિવાય બ્રાસ, એલ્યુમિનિયમ અને લીડ ઈન્ગોટ્સમાં છૂટીછવાઈ માગને ટેકે ભાવમાં ટકેલું વલણ રહ્યું હોવાનું સૂત્રોએ જણાવ્યું હતું.
