(વાણિજ્ય પ્રતિનિધિ તરફથી)
મુંબઈઃ વૈશ્વિક વિનિમય બજારમાં ડૉલર ઈન્ડેક્સમાં નરમાઈનું વલણ રહ્યું હોવાથી આજે લંડન ખાતે સત્રના આરંભે કોપર સહિતની ચોક્કસ ધાતુઓના ભાવમાં સુધારાતરફી વલણ રહ્યું હોવાના પ્રોત્સાહક અહેવાલ છતાં આજે સ્થાનિક જથ્થાબંધ ધાતુ બજારમાં સપ્તાહના આરંભે એકંદરે કામકાજો પાંખાં રહ્યા હોવાથી સ્ટોકિસ્ટોની લે-વેચ તથા ઔદ્યોગિક વપરાશકારો તથા સ્થાનિક ડીલરોની માગ અનુસાર ભાવમાં મિશ્ર વલણ જોવા મળ્યું હતું. બજારનાં સાધનોના જણાવ્યાનુસાર આજે સ્થાનિકમાં નિકલમાં સ્ટોકિસ્ટોની લેવાલીને ટેકે ભાવમાં કિલોદીઠ રૂ. આઠનો અને કોપર યુટેન્સિલ્સ સ્ક્રેપ, એલ્યુમિનિયમ ઈન્ગોટ્સ તથા ઝિન્ક સ્લેબમાં વપરાશકાર ઉદ્યોગની માગને ટેકે ભાવમાં કિલોદીઠ રૂ. એકથી બેનો સુધારો આવ્યો હતો.
જોકે, આજે કોપર વાયરબાર અને ટીનમાં સ્ટોકિસ્ટોની વેચવાલીના દબાણે ભાવ અનુક્રમે કિલોદીઠ રૂ. સાત અને રૂ. છ ઘટી આવ્યા હતા. તેમ જ કોપરની અન્ય વેરાઈટીઓ તથા બ્રાસ શીટ કટિંગ્સમાં નિરસ માગે ભાવ કિલોદીઠ રૂ. બેથી ત્રણ ઘટી આવ્યા હતા અને અન્ય ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે સતત બીજા સત્રમાં નિકલમાં સ્ટોકિસ્ટોની લેવાલી ઉપરાંત સાર્વત્રિક સ્તરેથી માગને ટેકે ભાવ કિલોદીઠ રૂ. આઠ વધીને રૂ. 1363ના મથાળે રહ્યા હતા. આ સિવાય વપરાશકાર ઉદ્યોગની માગને ટેકે ઝિન્ક સ્લેબના ભાવ કિલોદીઠ રૂ. બે વધીને રૂ. 279 અને કોપર યુટેન્સિલ્સ સ્ક્રેપ અને એલ્યુમિનિયમ ઈન્ગોટ્સના ભાવ કિલોદીઠ રૂ. એક વધીને અનુક્રમે રૂ. 773 અને રૂ. 260ના મથાળે રહ્યા હતા.
વધુમાં આજે કોપર વાયરબાર અને ટીનમાં સ્ટોકિસ્ટોની આક્રમક વેચવાલી અને સાર્વત્રિક સ્તરેથી માગ પાંખી રહેતાં ભાવ અનુક્રમે કિલોદીઠ રૂ. સાત ઘટીને રૂ. 940 અને રૂ. છ ઘટીને રૂ. 3135ના મથાળે રહ્યા હતા. આ સિવાય નિરસ માગે કોપર કેબલ સ્ક્રેપ અને કોપર સ્ક્રેપ હેવીના ભાવ કિલોદીઠ રૂ. ત્રણ ઘટીને અનુક્રમે રૂ. 861 અને રૂ. 850 તથા કોપર આર્મિચરના ભાવ કિલોદીઠ રૂ. બે ઘટીને રૂ. 834ના મથાળે રહ્યા હતા.
આ સિવાય આજે ખપપૂરતી છૂટીછવાઈ માગને ટેકે બ્રાસ યુટેન્સિલ્સ સ્ક્રેપ, એલ્યુમિનિયમ યુટેન્સિલ્સ સ્ક્રેપ અને લીડ ઈન્ગોટ્સના ભાવ અનુક્રમે કિલોદીઠ રૂ. 565, રૂ. 217 અને રૂ. 184ના મથાળે ટકેલા રહ્યા હોવાનું સૂત્રોએ જણાવ્યું હતું.
