(વાણિજ્ય પ્રતિનિધિ તરફથી)
મુંબઈઃ મલયેશિયાના બુર્સા મલયેશિયા ડેરિવેટીવ્સ એક્સચેન્જ ખાતે આજે ક્રૂડ પામતેલના વાયદામાં 48 રિંગિટ ઘટી આવ્યાના નિર્દેશો ઉપરાંત આજે સપ્તાહના આરંભે હાજર, ડાયરેક્ટ ડિલિવરી તેમ જ સેલરિસેલ ધોરણે કામકાજો પાંખાં રહ્યા હોવાથી સ્થાનિકમાં આયાતી તેલના ભાવમાં નરમાઈનું વલણ જોવા મળ્યું હતું, જેમાં 10 કિલોદીઠ સન રિફાઈન્ડમાં રૂ. 15, આરબીડી પામોલિનમાં રૂ. 10 અને સોયા રિફાઈન્ડમાં રૂ. પાંચનો ઘટાડો આવ્યો હતો.
જોકે, ગત શનિવારના મથકો પરનાં પ્રોત્સાહક અહેવાલને ધ્યાનમાં લેતા આજે દેશી તેલમાં સિંગતેલના ભાવમાં 10 કિલોદીઠ રૂ. 10નો સુધારો આવ્યો હતો, જ્યારે કપાસિયા રિફાઈન્ડમાં રૂ. 25 ઘટી આવ્યા હતા.
આપણ વાંચો: ડિસેમ્બરમાં મલયેશિયાની પામતેલની આયાત 4.22 ટકા ઘટી…
બજારનાં સાધનોના જણાવ્યાનુસાર આજે સ્થાનિકમાં ડાયરેક્ટ ડિલિવરી શરતે 10 કિલોદીઠ એડબ્લ્યુએલના આરબીડી પામોલિનના રૂ. 1270, સોયા રિફાઈન્ડના રૂ. 1255 અને સન રિફાઈન્ડના રૂ. 1485, ઈમામીના આરબીડી પામોલિનના રૂ. 1270 અને સન રિફાઈન્ડના રૂ. 1450, પતંજલિ ફૂડ્સના આરબીડી પામોલિનના રૂ. 1290, રિલાયન્સ રિટેલના સોયા રિફાઈન્ડના રૂ. 1250 અને એવીઆઈના સોયા રિફાઈન્ડના રૂ. 1242 ક્વૉટ થઈ રહ્યા હતા, પરંતુ વેપારો છૂટાછવાયા હતા.
આજે ગુજરાતમાં ગોંડલ મથકે મગફળીની 75,000 ગૂણીની અને રાજકોટ મથકે ગત શનિવારની શેષ 12,000 ગૂણીની આવક સામે બન્ને મંડીમાં વેપાર મણદીઠ રૂ. 950થી 1250માં થયા હોવાના અહેવાલ હતા. વધુમાં આજે મધ્ય પ્રદેશનાં મથકો પર 3.25 લાખ ગૂણી સોયાસીડની આવક સામે મંડીમાં વેપાર ક્વિન્ટલે રૂ. 3300થી 4350માં અને પ્લાન્ટ ડિલિવરી શરતે રૂ. 4250થી 4350માં થયાના અહેવાલ હતા.
આજે હાજરમાં વિવિધ દેશી-આયાતી તેલના 10 કિલોદીઠ ભાવમાં આરબીડી પામોલિનના રૂ. 1290, સોયા રિફાઈન્ડના રૂ. 1285, સન રિફાઈન્ડના રૂ. 1475, સિંગતેલના રૂ. 1410, કપાસિયા રિફાઈન્ડના રૂ. 1315 અને સરસવના રૂ. 1515ના મથાળે રહ્યા હતા, જ્યારે ગુજરાતનાં મથકો પર આજે સિંગતેલમાં તેલિયા ટીનના વેપાર 15 કિલોદીઠ રૂ. 2205માં અને લૂઝમાં 10 કિલોદીઠ રૂ. 1375માં ટકેલા ધોરણે થયા હોવાનું સૂત્રોએ જણાવ્યું હતું.
