(વાણિજ્ય પ્રતિનિધિ તરફથી)
મુંબઈઃ લંડન મેટલ એક્સચેન્જ ખાતે આજે સત્રના આરંભે કોપર સહિતની અમુક ધાતુઓના ભાવમાં સુધારાતરફી વલણ રહ્યું હોવાના પ્રોત્સાહક અહેવાલ સાથે સ્થાનિક જથ્થાબંધ ધાતુ બજારમાં આજે એકમાત્ર ટીનમાં સ્ટોકિસ્ટોની વેચવાલીના દબાણ હેઠળ જોવા મળેલા કિલોદીઠ રૂ. નવના ઘટાડાને બાદ કરતાં કોપર, બ્રાસ યુટેન્સિલ્સ સ્ક્રેપ, એલ્યુમિનિયમ ઈન્ગોટ્સ અને ઝિન્ક સ્લેબમાં વપરાશકાર ઉદ્યોગ તથા સ્થાનિક ડીલરોની માગને ટેકે ભાવમાં કિલોદીઠ રૂ. એકથી ચારનો સુધારો આવ્યો હતો, જ્યારે અન્ય ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે સ્ટોકિસ્ટોની છૂટીછવાઈ લેવાલી અને વપરાશકાર ઉદ્યોગની માગને ટેકે કોપર વાયરબારના ભાવ કિલોદીઠ રૂ. ચાર વધીને રૂ. 944, કોપર કેબલ સ્ક્રેપ અને બ્રાસ યુટેન્સિલ્સ સ્ક્રેપના ભાવ કિલોદીઠ રૂ. ત્રણ વધીને અનુક્રમે રૂ. 867 અને રૂ. 568, કોપર સ્ક્રેપ હેવી અને કોપર આર્મિચરના ભાવ કિલોદીઠ રૂ. બે વધીને અનુક્રમે રૂ. 854 અને રૂ. 839 અને એલ્યુમિનિયમ ઈન્ગોટ્સ તથા ઝિન્ક સ્લેબના ભાવ કિલોદીઠ રૂ. એક વધીને અનુક્રમે રૂ. 261 અને રૂ. 277ના મથાળે રહ્યા હતા.
આ પણ વાંચો: એલ્યુમિનિયમ અને કોપરની અમુક વેરાઈટી સહિત ચોક્કસ ધાતુઓમાં સુધારો
જોકે, આજે એકમાત્ર ટીનમાં સ્ટોકિસ્ટોની વેચવાલીના દબાણ સામે નવી લેવાલીનો અભાવ અને વપરાશકાર ઉદ્યોગની લેવાલી પણ પાંખી રહેતાં ભાવ કિલોદીઠ રૂ. નવના ઘટાડા સાથે રૂ. 3119ના મથાળે રહ્યા હતા. આ સિવાય છૂટીછવાઈ માગને ટેકે બ્રાસ શીટ કટિંગ્સના ભાવ કિલોદીઠ રૂ. 615, એલ્યુમિનિયમ યુટેન્સિલ્સ સ્ક્રેપના ભાવ કિલોદીઠ રૂ. 217, લીડ ઈન્ગોટ્સના કિલોદીઠ રૂ. 184 અને નિકલના ભાવ કિલોદીઠ રૂ. 1342ની સપાટીએ ટકેલા રહ્યા હોવાનું સૂત્રોએ જણાવ્યું હતું.
