(વાણિજ્ય પ્રતિનિધિ તરફથી)
મુંબઈઃ આંતરરાષ્ટ્રીય બજારમાં આજે ડૉલર ઈન્ડેક્સમાં નરમાઈ આગળ ધપી હોવાના અહેવાલ તેમ જ સ્થાનિક ઈક્વિટી માર્કેટમાં જોવા મળેલા સુધારાતરફી વલણ અને ગઈકાલે વિદેશી સંસ્થાકીય રોકાણકારોની ઈક્વિટીમાં 68.64 કરોડની ચોખ્ખી લેવાલી રહી હોવાના એક્સચેન્જના અહેવાલ ઉપરાંત સંભવિતપણે રિઝર્વ બૅન્કનો હાજર બજારમાં હસ્તક્ષેપ જળવાઈ રહેતા આજે સતત બીજા સત્રમાં ડૉલર સામે રૂપિયામાં આગેકૂચ જળવાઈ રહી હતી અને વધુ 13 પૈસાના સુધારા સાથે 87.95ના મથાળે બંધ રહ્યો હતો.
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના 88.08ના બંધ સામે સુધારાના અન્ડરટોને 87.76ના મથાળે ખૂલ્યા બાદ સત્ર દરમિયાન નીચામાં 87.95 અને ઉપરમાં 87.68ની રેન્જમાં રહ્યા બાદ અંતે ગઈકાલના બંધ સામે 13 પૈસાના સુધારા સાથે 87.95ની સપાટીએ બંધ રહ્યો હતો. નોંધનીય બાબત એ છે કે ગઈકાલે ડૉલર સામે રૂપિયો 73 પૈસા મજબૂત થયો હતો. આમ છેલ્લાં બે સત્રમાં 86 પૈસાનો સુધારો જોવા મળ્યો છે.
આ પણ વાંચો: વૈશ્વિક સોનાએ 4100 ડૉલરની સપાટી કુદાવતા સ્થાનિકમાં વધુ રૂ. 1997ની તેજી, ચાંદીમાં રૂ. 2775નો ચમકારો…
એકંદરે આજે ડૉલર ઈન્ડેક્સની નરમાઈ, વિદેશી સંસ્થાકીય રોકાણકારોની ઈક્વિટીમાં લેવાલી અને રિઝર્વ બૅન્કનો શક્યતઃ બજારમાં વ્યૂહાત્મક ધોરણે હસ્તક્ષેપ રહેતાં રૂપિયામાં સુધારો જોવા મળ્યો હોવાનું એચડીએફસી સિક્યોરિટીઝનાં વિશ્લેષ દિલીપ પરમારે જણાવતાંં ઉમેર્યું હતું કે આગામી ટૂંકા સમયગાળા દરમિયાન ડૉલર સામે રૂપિયો 87.60થી 88.70ની રેન્જમાં જોવા મળે તેવી શક્યતા જણાય છે.
દરમિયાન આજે વિશ્વ બજારમાં ડૉલર ઈન્ડેક્સ ગઈકાલના બંધ સામે 0.21 ટકા ઘટીને 98.548 આસપાસ ક્વૉટ થઈ રહ્યો હતો, જ્યારે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે 862.23 પૉઈન્ટનો અને 261.75 પૉઈન્ટનો સુધારો આવ્યો હોવાથી રૂપિયાના સુધારાને ટેકો મળ્યો હતો. જોકે, આજે બે્રન્ટ ક્રૂડ તેલના વાયદામાં ભાવ ગઈકાલના બંધ સામે 0.36 ટકા વધીને બેરલદીઠ 62.12 આસપાસ ક્વૉટ થઈ રહ્યા હોવાથી રૂપિયામાં સુધારો મર્યાદિત રહ્યો હોવાનું સૂત્રોએ જણાવ્યું હતું.
