(વાણિજ્ય પ્રતિનિધિ તરફથી)
મુંબઈઃ સ્થાનિક ફોરેક્સ માર્કેટમાં આજે સંભવીતપણે રિઝર્વ બૅન્કનો હસ્તક્ષેપ રહેતાં સત્ર દરમિયાન એક તક્ક્કે ડૉલર સામે રૂપિયો 29 પૈસા મજબૂત થયો હતો, પરંતુ ત્યાર બાદ વિશ્વ બજારમાં ડૉલર ઈન્ડેક્સમાં ઊંચી સપાટીએથી જોવા મળેલી સાધારણ નરમાઈ, સ્થાનિક ઈક્વિટી માર્કેટમાં જળવાતી પીછેહઠ અને વિદેશી સંસ્થાકીય રોકાણકારોના બાહ્યપ્રવાહનું વલણ જળવાઈ રહ્યું હોવાથી આજે સત્રના અંતે ડૉલર સામે રૂપિયો ગઈકાલના બંધ સામે વધુ 11 પૈસા નબળો પડીને 90.34ના મથાળે બંધ રહ્યો હોવાનું ફોરેક્સ ટ્રેડરોએ જણાવ્યું હતું.
આજે સ્થાનિકમાં ડૉલર સામે રૂપિયો ગઈકાલના 90.23ના બંધ સામે નરમાઈના અન્ડરટોને 90.26ની સપાટીએ ખૂલ્યા બાદ સત્ર દરમિયાન નીચામા 90.32 અને ઉપરમાં 89.94 સુધી મજબૂત થયા બાદ અંતે ગઈકાલના બંધ સામે 11 પૈસાના ઘટાડા સાથે 90.34ની સપાટીએ બંધ રહ્યો હતો.
આપણ વાચો: ડૉલર સામે રૂપિયો છ પૈસા નરમ
એકંદરે આજે સત્રના આરંભમાં રિઝર્વ બૅન્કના સંભવીત હસ્તક્ષેપ સાથે થોડો સુધારો જોવા મળ્યો હતો, પરંતુ ત્યાર બાદ ડૉલર ઈન્ડેક્સમાં સુધારો, ઈક્વિટી માર્કેટમાં પીછેહઠ અને વિદેશી સંસ્થાકીય રોકાણકારોની અવિરત વેચવાલીના નિર્દેશો સાથે રૂપિયામાં સુધારો ધોવાઈ ગયો હોવાનું મિરે એસેટ્ શૅરખાનના વિશ્લેષક અનુજ ચૌધરીએ જણાવતાં ઉમેર્યું હતું કે વૈશ્વિક બજારોની સ્થિતિ તેમ જ ભૂરાજકીય તણાવોને ધ્યાનમાં લેતા આગામી ટૂંકા સમયગાળા દરમિયાન ડૉલર સામે રૂપિયામાં નરમાઈનું વલણ જળવાઈ રહેતાં 89.95થી 90.50ની રેન્જમાં રહે તેવી શક્યતા જણાય છે.
દરમિયાન આજે વિશ્વ બજારમાં ડૉલર ઈન્ડેક્સ ગઈકાલના વધ્યા મથાળાના બંધ સામે સાધારણ 0.02 ટકા ઘટીને 99.11 આસપાસ ક્વૉટ થઈ રહ્યો હતો, જ્યારે સ્થાનિકમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ેટીમાં અનુક્રમે 244.98 પૉઈન્ટનો અને 66.70 પૉઈન્ટનો ઘટાડો આવ્યો હતો.
તેમ જ ગઈકાલે વિદેશી સંસ્થાકીય રોકાણકારોની રૂ. 1499.81 કરોડની ચોખ્ખી વેચવાલી રહી હોવાથી રૂપિયો દબાણ હેઠળ આવ્યો હતો. જોકે, આજે વિશ્વ બજારમાં બે્રન્ટ ક્રૂડતેલના વાયદામાં ભાવ 1.04 ટકા ઘટીને બેરલદીઠ 64.81 ડૉલર આસપાસ ક્વૉટ થઈ રહ્યા હોવાથી અને રિઝર્વ બૅન્કના સંભવીત હસ્તક્ષેપને કારણે રૂપિયાને અમુક અંશે ટેકો મળ્યો હતો.
